1 X ayt n Ɛammun

“Ammu i iqqar SIDI: ‘Ma Israil war ɣares bu iḥenjiren? Ma war ɣares bu awrit? Mayemmi xenni iṭṭef ujeǧid nwem tammurt n Jad d řwart i yixef nnes u mayemmi izeddeɣ řgens nnes di tneddam n Jad? ◘49:1 Ɛam. 1:13 2 S uya, xzar, ussan ad dd-asen, ammu i iqqar SIDI, ad jjeɣ ad ttwasřen iɣuyyan n umenɣi x tendint n Rabba n ayt n Ɛammun. Ad tedweř tendint d ict n řgeɛɛdet n řxarbet u tineddam i ɣares dd-iqqnen ad tent qqden s tmessi. Israil ad iwart ɛawed min zzayes kksen d řwart, ammu i iqqar SIDI.◘49:2 Ɛam. 1:14 3 Ru, a Ḥacbun, maɣar tandint n Ɛay tᵉttwareddeǧ, sɣuyyent, a kennint yessis n Rabba, ḥezzment s txuncay n wecḍan, ceḍnent uca uyurent ɣar da d diha ɣar uɣezdis n icbaren, maɣar ajeǧid nwem, Milkum, ad ittwandeh di lmenfa, ikehhanen nnes ak-d řḥukkam nnes.’ ” ◘49:3 Ica. 32:12; Irm. 4:8; 6:26; 48:7

4 “Mecḥař tᵉttfeyyced s řewḍat n teɣzurin nnem, s ufeyyeḍ n řewḍa nnem n teɣzurt, a cem yeǧis ikfaren, tenni ittcařan x wagřa nnes, teqqar: ‘Wi dd ɣari i ɣa iqarrben?’ ◘49:4 Irm. 21:13; 48:7 5 Xzar, ad xam dd-ɣeḍreɣ tiggʷudi zi marra iɣezdisen nnem, ammu i iqqar Sidi inu, SIDI n řɛeskarat. Kenniw ad tᵉttwaɛarrnem, kuř ijj nican ɣar zzat, uca war din uřa d ijjen wenni i ɣa issmunen inni yarewřen. 6 Maca awarni as ad ssenqeřbeɣ tameḥbast n ayt n Ɛammun, ammu i iqqar SIDI.”

7 X Idum

“Ammu i iqqar SIDI n řɛeskarat: ‘Ma war teǧi ɛad tiɣit di Tiyman? Ma ibḍeř ccwar n imiɣisen? Ma tḍeyyeɛ tiɣit nsen? ◘49:7 Ɛub. 8 8 Arewřem, dewřem, ffarem deg imucan yuǧɣen, kenniw imezdaɣ n Dadan, maɣar Necc ad xas awyeɣ aḍeyyeɛ n Ɛisu, řweqt nni di ad t ɛaqbeɣ. ◘49:8 Irm. 25:23 9 Mařa usin-dd ɣarek imeřqaḍ n uḍiř, ma xenni war ttejjin ca awarni asen? Mařa usin-dd ixewwanen s ǧiřet, ma xenni war ttḍeyyiɛen ař ɣa jjiwnen? ◘49:9 Ɛub. 5 10 Necc maca qeccareɣ tammurt n Ɛisu, ɛarriɣ x imucan nnes innuffaren ařami war izemmar ɛad ad innuffar. Tarwa nnes ttwareddǧen, uřa d aytmas d jjiran nnes, aqa netta war iǧi ɛad. 11 Ejj iyujiřen nnec, Necc ad ten ḥḍiɣ ad qqimen ddaren, tijjař nnec ejj i-tent ad xafi ttecřent.’ 12 Maɣar ammu i iqqar SIDI: ‘Xzar, inni war t issdiheǧen ad swen zi řkas, ad zzayes swen. U cek wenni t issdaheǧen, ma ad tᵉttwabarrid? War tᵉttwabarrid ca ɛemmarṣ, ad zzayes teswed s uɣiř! 13 Maɣar Necc jjuǧeɣ ɣar ixef inu, ammu i iqqar SIDI, aqa Buṣra ad idweř d ict n řqecɛet n unexřiɛ d řḥegra, uřa d ict n řxirbet d nneɛřet, uca marra tineddam nnes ad dewřent d řxirbat i řebda.’ ”

14 “Necc sřiɣ ijj n řexbar zi SIDI, aqa ittwassekk-dd ijj n ureqqas jar řegnus ḥima ad yini: ‘Smunem, sgeɛɛdem xas, kkarem ɣar umenɣi!’ ◘49:14 Ɛub. 1 15 Minzi xzar, Necc ssemẓiyeɣ cek jar řegnus, tᵉttwasseḥqared jar iwdan. 16 Řeḥkamet nnec issaggʷaden tɣarr i cek uřa d zzɛamet n wuř nnec, a cek wenni izeddɣen deg ifeǧiqen n řejruf, wenni ittcebbaren di tqiccet n tewririn! Waxxa teggid řɛucc nnec sennej qaɛ am t ittegg ugider, Necc ad cek dd-ɣeḍřeɣ ssenni, iqqar SIDI. ◘49:16 Irm. 48:29 17 Idum ad idweř d ict n řqecɛet n unexřiɛ. Kuř ijj wenni dd as i ɣa ikken, ad innexřeɛ u ad iṣeffar s wesrubi x marra jjɛayef nnes. ◘49:17 Irm. 50:13 18 Am ɣar uneqřeb n Sadum d Ɛamurra d dcurat nnes yudsen, iqqar SIDI, war dinni izeddeɣ ɛad uřa d ijj u war dayes ittɣimi ɛad uřa d ijj n mmis n bnadem d abarrani. ◘49:18 Amz. 19:25; Irm. 50:40; Ɛam. 4:11 19 Xzar, am yijj n wayrad ad dd-igeɛɛed zi cbarq iqqnen n L’Urdun ḍidd i tzeddiɣt ijehden, xenni deg wermac n wabřiwen ad t arreɣ ad azzeř ssenni, u wenni umi farzeɣ, ad xas t areccḥeɣ. Maɣar man wen iǧan am Necc, man wen xafi i ɣa iřaɣan i ddeɛwet? Man wen d ameksaw wenni i ɣa iqqimen zzati ibedd? ◘49:19 Ayub 41:2; Irm. 12:5; 50:44 20 S uya, sřem i ucawar n SIDI nni iqḍeɛ x Idum, u sřem i inwayen nni ixarreṣ x imezdaɣ n Tayman: ‘S tidett, inni imeẓyanen aṭṭas zeg wuǧi ad ten jarren, s tidett, tazeddiɣt nsen ad tᵉttwassnexřeɛ!’ ◘49:20 Irm. 50:45 21 Tammurt tᵉttenhezza s řḥess n uweṭṭu nsen, s tɣuyyit i zi ɣa ittwaseř řḥess nnes ař Řebḥar n Telga. 22 Xzar, ittgeɛɛad am yijj n ugider ɣar ujenna, itteḥrara, ittbezzaɛ afriwen nnes tiwa n Buṣra. Deg wass nni ad yiři wuř n ayt n bu-teɣruḍt n Idum am wuř n ict n temɣart s řeḥriq n tarwa.” ◘49:22 Irm. 48:40,41

23 X Dimacq

“Ḥamat d Arfad seḍḥan, maɣar nitni sřin i wareqqas d aɛeffan, fecřen. Ɣar řebḥar tᵉttwaf řeḥṣaret, bnadem war izemmar ad yarsa din.◘49:23 Ica. 17:1 24 Tarxu tendint n Dimacq, tenneqřeb, maḥend ad tᵉṭṭef di tarewřa. Imneɛ i-tt uqdiddes. Řeḥṣaret d řewjeɛ am n ict temɣart ittarwen ṭṭfen tt. ◘49:24 Irm. 4:31; 6:24; 30:6 25 Tandint icennɛen, ma war teggi am tenni ittwajjen, tandint n řefraḥet inu? 26 S uya ad wḍan iḥudriyyen nnes deg wazzayen u marra iɛeskariyyen ad ttwaseɣden deg wass nni, ammu i iqqar SIDI n řɛeskarat. 27 Necc ad ssarɣeɣ timessi di řḥiḍ n Dimacq, ad tecc řeqṣur n Binhadad.” ◘49:27 Ɛam. 1:4, 14

28 X Weɛraben

X Qidar d tgelditin n Ḥaṣur nni iɣřeb Nabuxadraṣṣar, ajeǧid n Babil.

“Ammu i iqqar SIDI: ‘Kkarem uca hejmem x Qidar uca areddǧem ayt n ccarq. 29 Nitni ad asen kksen iqiḍan nsen d wuǧi nsen, tijartiřin n uqiḍan nsen d marra řqecc nsen. Uca uřa d iřeɣman nsen ad ten awyen akidsen. Ad xasen sɣuyen: Asiggʷed mani ma! 30 Arewřem, beɛɛdem, ffarem deg imucan yuǧɣen, kenniw imezdaɣ n Ḥaṣur, ammu i iqqar SIDI, maɣar Nabuxadraṣṣar, ajeǧid n Babil, iqḍeɛ xawem acawar uca ixarreṣ deg ijj n wenway xawem. 31 Kkarem, geɛɛdem x ijj n řgens nni izeddɣen di řhudnet u di řaman, ammu i iqqar SIDI, ijj n řgens war ɣares bu tewwura uřa d zzenkrun, wenni izeddɣen weḥḥdes. 32 Iřeɣman nsen ad ttwaḥewwsen uca abarru n tḥimriwin nsen n řmař ad ttwacarent u Necc ad ten zuzzareɣ ɣar marra iɣezdisen n usemmiḍ, marra inni ittḥeffan acuwwaf ɣar ṭṭrufa, . Necc ad xasen dd-awyeɣ aḍeyyeɛ zi marra iɣezdisen, ammu i iqqar SIDI. ◘49:32 Lawi 19:27; 21:5; Irm. 9:25; 25:23. 33 Haṣur ad idweř d tazeddiɣt i wuccanen n řexřa, ict n temmurt ittwareddǧen i řebda. War dayes izeddeɣ ɛad uřa d ijjen uca uřa d ijj n mmis n bnadem ad din iqqim ɛad am ubarrani.’ ” ◘49:33 Irm. 9:10; 10:22

34 X Ɛilam

Awař n SIDI i unabi Irmiya x Ɛilam, deg umezwaru n tgelda n Ṣidqiya, ajeǧid n Yahuda, inna: 35 “Ammu i iqqar SIDI n řɛeskarat: ‘Xzar, Necc ad arẓeɣ řqews n Ɛilam, amezwaru n tzemmar nsen n ayt n bu-teɣruḍt. 36 Necc ad dd-ssehwiɣ x Ɛilam arebɛa n isemmiḍen zi arebɛa n tɣemmura n ujenna u ɣar marra tiɣemmura n isemmiḍen ad ten zuzzareɣ. War ittiři bu řgens mani war dd-ttisen inni x uẓẓřen zi Ɛilam. 37 Necc ad ssnexřɛeɣ ayt n Ɛilam zzat i řɛedyan nsen u zzat i yinni yarezzun tudart nsen. Necc ad dd-ɣeḍřeɣ řɣar xasen, řḥaduq n weɣḍab inu, ammu i iqqar SIDI. Necc ad asen sseḍfareɣ ssif ař ten teḥḥiɣ. 38 Necc ad ssbeddeɣ řɛarc inu di Ɛilam uca ad teḥḥiɣ ajeǧid d řḥukkam ssenni, ammu i iqqar SIDI. 39 Deg uneggar n wussan ad ssenqeřbeɣ tameḥbast n Ɛilam ammu i iqqar SIDI.’ ” ◘49:39 Irm. 48:47