1 Uca iwḍent xenni tnayen n lmalakat nni ɣar Sadum s ǧiřet. Tuɣa Luṭ iqqim ɣar tewwart n Sadum. Umi ten iẓra Luṭ, ikkar maḥend ad ten iřqa uca ibendeq s uɣembub nnes ɣar temmurt. ◼19:1 ibendeq - niɣ ‘isjed’. 2 Inna: “Xzar, a isiditen inu, ttzawageɣ kenniw ad dd-tasem ɣar taddart n umsexxar nwem uca ad dayes tessensem, ad tessirdem iḍaren nwem. Xenni ad tfaqem zic, ad tkemmřem x webrid nwem.” Maca nitni nnan: “Lla, aqa deg wazzay ad neqqim ad nessens.” ◘19:2 Amz. 18:4. 3 Maca netta ikellef xasen aṭṭas ařami akides ruḥen, udfen ɣar taddart nnes uca igga asen amensi, iggʷa aɣrum břa antun uca ccin. ◘19:3 Ɛbr. 13:2.

4 Aqa qbeř i ɣa ṭṭṣen, qewwaren i taddart iryazen n tendint, iryazen n Sadum, zeg umeẓyan ař awessar, marra iwdan zi marra imucan iṭṭurfen n tendint. 5 Nitni řaɣan i Luṭ, nnan as: “Mani ǧan iryazen inni ɣarek dd-yusin ǧiret-a? Suffeɣ i-ten-dd, ḥima ad ten nessen.” ◼19:5 ḥima ad ten nessen - man aya ixs ad yini aqa iryazen n Sadum tuɣa xsen ad ten ɣeṣben. 6 Iffeɣ-dd ɣarsen Luṭ, ɣar tewwart, uca iqqen tawwart awarni as. 7 Inna: “Ttzawgeɣ, a aytma inu, war tteggem qaɛ řɣar! 8 Xzar, ɣari tnayen n yessi, tinni ɛad war issinen aryaz. Ejj ayi ad awem tent i-dd-ssuffɣeɣ barra uca ggem daysent min tᵉttwařam mliḥ di tiṭṭawin nwem. Mɣir i iryazen-a war daysen tteggem walu, aqa x uya dd-usin nitni swadday n tiři n tzeqqa inu ɣar tmensiwt.” ◼19:8 afessar - ad taɣ igga Luṭ ammu maḥend ad yejj yessis ad tᵉttwaɣeṣbent zeg iryazen n Sadum, minzi tuɣa itteggʷed řḥukm n Arebbi x tmegga n iryazen nni ixsen ad ggen min war iḥeǧřen, min iǧan ḍidd i ṭṭbiɛet n bnadem maḥend ad ittwagg. Issen Luṭ aqa Arebbi tuɣa iḥekkem x ddunect s sseḥřet deg wussan n Nuḥ maɣar ‘tarwa n Arebbi’ (aqa-ten d lmalakat n Arebbi) usin-dd ɣar yessis n bnadem u man aya d nnɛi di tiṭṭawin n Arebbi (xzar Amz. 6:1-4, Yahuda 6,7). Ammu ixḍar Luṭ ḥima ad iwc tiḥenjirin nnes maḥend ad issenjem tandint n Sadum zi řḥukm ameqqran n Arebbi. 9 Nitni nnan: “Aggʷej diha!” Uca nnan ɛawed: “Aqa wanita yusa-dd da d abarrani uca ixs ad xaneɣ iḥkem am řqaḍi! Řexxu ad cek nḍarr ktar zzaysen.” Uca ggin aṭṭas n uɣiř x weryaz nni, x Luṭ, uca qarrben-dd ḥima ad arẓen tawwart. ◘19:9 Uf. 2:14; Řex. 7:27; 2 Bṭ. 2:7, 8. 10 Maca iryazen nni sswiẓẓḍen afus nsen, ssidfen Luṭ ɣar taddart akidsen uca bellɛen tawwart. 11 Nitni wtin iryazen nni tuɣa ibedden ɣar tewwart n taddart s tuddarɣeč, am umeẓyan am umeqqran, ařami ssihřen nitni ixef nsen di tarezzut x tewwart. 12 Xenni nnan iryazen nni i Luṭ: “Wi ɣarek da ɛad? Ma aḍeggʷař niɣ iḥenjiren niɣ tḥenjirin, marra inni ɣarek di tendint, ejj i-ten ad ffɣen zeg wemcan-a. 13 Aqa ad nareddeǧ amcan-a, minzi tɣuyyit nnes temɣar zzat i wudem n SIDI, u SIDI issekk aneɣ-dd, ḥima ad tt nareddeǧ.”

14 Iffeɣ Luṭ uca issiweř ak-d iḍeggʷařen nnes, inni iggin ad meřcen yessis, inna: “Kkarem, ffɣem zeg wemcan-a, minzi SIDI ad yareddeǧ tandint-a.” Maca iban-dd ittqeṣṣar di tiṭṭawin n iḍeggʷařen nnes. 15 Umi iṣbeḥ řhař, ssqeǧqent lmalakat Luṭ, nnant: “Kkar, teksid tamɣart nnec d tnayen n yessic, tinni akidek, ḥima war thelliked ca di řmuɛṣiyyet n tendint-a.” 16 Maca netta war izɛim. Xenni ṭṭfen iryazen nni afus nnes d ufus n temɣart nnes d ifassen n tnayen n yessis, minzi SIDI tuɣa ixs ad xas iḥinn. Nitni ssuffɣen t ɣar barra, nedhen t barra i tendint. 17 Ařami ten ssuffɣen barra, inna Netta: “Senjem ixef nnec! War xezzar awarni ac, war ttbeddi di jjihet-a am tekmeř. Arweř ɣar idurar, ḥima war tᵉttwateḥḥid ca.” ◼19:17 ixef nnec - s Tɛibranit ‘řeɛmar nnec’. 18 Inna asen Luṭ: “Lla, ttzawageɣ, a Sidi inu! 19 Xzar, amsexxar nnec yufa arḍa di tiṭṭawin nnec, wah tessemɣared tamexsiwt nnec icewwaren, tenni kidi teggid umi d ayi tejjid ddareɣ. Maca war zemmareɣ ad arewřeɣ ɣar idurar qbeř d ayi ɣa iṭṭef řɣar uca ad mmteɣ! 20 Xzar řexxu, tandint-a aqa tudes-dd aṭṭas, aqa zemmareɣ ad dinni arewřeɣ. Nettat d tameɛnanuct. Ejj ayi ad arewřeɣ řexxu dinni. Ma war teǧi d ict n tendint d tameɛnanuct? Xenni zemmareɣ ad qqimeɣ ddareɣ.” 21 Yarra-dd xas: “Xzar, tiweḍ ayi-dd ɛawed tzawegt nnec x uya, war ttareddǧeɣ ca tandint min xef tessiwřed. 22 Qeǧeq, arweř din, minzi war zemmareɣ ad ggeɣ walu ař dd ɣa tawḍed ɣar dinni.” X uya semman isem n tendint nni Ṣuɣar. ◼19:22 Ṣuɣar - isem wanita ixs ad yini ‘ameẓyan’ niɣ ‘amuqřiř’. 23 Ařami yiweḍ Luṭ ɣar Ṣuɣar, tenqar-dd tfuct x temmurt.

24 Ijja SIDI ad iwwet wenẓar x Sadum u x Ɛamurra, d řecbareyyet d tmessi zeg ujenna zi ɣar SIDI. ◼19:24 afessar - deg wussan-a ufin imusnawen n umezruy marra min iqqimen n tneddam nni d iɣɣeḍ. Ittɣiř asen aqa řqedd n řeḥmu di Ɣammura yiweḍ ɣar 3000 Salsiyus. Řeḥyuḍ d txudam n wureɣ dewřen d iɣɣeḍ. Řecbareyyet ad tafed ɛad řexxu di jjwayeh n Řebḥar Immuten.  ◘19:24 Aɛwd. 29:22; Ica. 13:19; Irm. 20:16; 50:40; Igjd. 4:6; Ḥiz. 16:50; Ḥuc. 11:8; Ɛam. 4:11; Ṣaf. 2:9; Lk. 17:29; 2 Bṭ. 2:6; Yah. 7. 25 Yareddeǧ Netta tineddam nni d marra adewwar nni, ak-d marra imezdaɣ n tneddam nni uřa d aɣemmuy n temmurt. 26 Tamɣart nnes, tenni tuyur ɣar ḍeffar nnes, texzar awarni as uca tedweř d ijj n uqellij n tmeǧaḥt. ◘19:26 Lk. 17:32.

27 Ɣar ṣṣbeḥ zic ikkar Ibrahim, yuyur ɣar wemcan mani tuɣa ibedd zzat i wudem n SIDI. 28 Isweḍ ɣar Sadum d Ɛamurra u ɣar marra tammurt n udewwar nni, uca iẓra belli ddexxan ittgeɛɛad zi temmurt am ddexxan n ict n tefqunt. 29 Ařami yareddeǧ AREBBI tineddam n udewwar nni, ifekkar AREBBI di Ibrahim uca issekk Luṭ barra zi řwesṭ n uceřwaw, umi iqřeb tineddam i di izdeɣ Luṭ. ◼19:29 aceřwaw - s lḥarf ‘aneqřeb’

30 Igeɛɛed Luṭ zi Ṣuɣar uca iruḥ izdeɣ ak-d tnayen n yessis deg idurar, minzi iggʷed ad iqqim izeddeɣ di Ṣuɣar. Uca izdeɣ deg ifri ak-d tnayen n yessis. 31 Tenna tmenzut i tmaẓuẓt: “Babatneɣ d awessar, war iqqim uɛezri di temmurt ad xaneɣ dd-yadef am mammec teggur di marra ddunect. 32 Zid, ejj aneɣ ad newc binu i babatneɣ ad issu uca ad kis nezzeř, maḥend ad newc tudart i zzariɛet n babatneɣ.” ◼19:32 zzariɛet - ixs ad yini ‘tarwa’. 33 Di ǧiřet nni wcint binu i babatsent, iswa. Xenni tudef tmenzut, tᵉṭṭeṣ ak-d babas, maca netta war yuci ca belli tezzeř akides niɣ tekkar ɛawed. 34 Tiwecca nnes tenna tmenzut i tmaẓuẓt: “Aqa necc zzřeɣ ǧiret iɛdun ak-d baba, ad as newc ad issu binu ɛawed ǧiret-a. Xenni ad tadfed cem ad kides tezzřed, maḥend ad dd-nejj jjiř ad iqqim iddar zi ẓẓariɛet n babatneɣ.” 35 Wcint binu i babatsent ɛawed di ǧiret nni, iswa. Xenni tekkar tmaẓuẓt uca tᵉṭṭeṣ ak-d babas. Maca netta war yuci ca belli tezzeř akides niɣ tekkar ɛawed. 36 Ammu ksint tnayen n yessis n Luṭ s ddeyset zi babatsent. 37 Uca turuw-dd tmenzut aseymi, třaɣa isem nnes Mu’ab. Wa d babatsent n ayt n Mu’ab ɣar ass-a. ◼19:37 Mu’ab - isem wanita ixs ad yini ‘zi baba’. 38 Tamaẓuẓt ɛawed turuw-dd aseymi uca třaɣa isem nnes Ben-Ɛammi. Netta d babatsen n iḥenjiren n Ɛammun ɣar ass-a. ◼19:38 Ben-Ɛammi - isem wanita ixs ad yini ‘mmis n řgens inu’.