1 Řami Facḥur, mmis n Immir, akehhan nni ittwaggen d aweqqaf ameqqran x Taddart n SIDI, isřa i Irmiya ittnebba awařen-a, 2 iwta Facḥur anabi Irmiya uca iḥebbes i-t deg ukeccuḍ nni iǧan deg wexxam n sennej n Tewwart Yuɛřan n Binyamin nni iǧan di Taddart n SIDI.

3 Tiwecca nnes ijja Facḥur ad arxun i Irmiya zeg ukeccuḍ. Xenni inna as Irmiya: “War d ac iqqar SIDI Facḥur, maca Majur-Missabib. ◼20:3 Facḥur - isem wanita ixs ad yini ‘sřam’ niɣ ‘tiřelli’. Majur-Missabib - isem wanita ixs ad yini ‘anexřiɛ zi marra iɣezdisen’. 4 Maɣar ammu i iqqar SIDI: ‘Xzar, Necc ad cek ggeɣ d asnexřiɛ i yixef nnec u i marra inni cek ittexsen. Nitni ad wḍan s ssif n řɛedyan nsen, am t ttwařant tiṭṭawin nnec, u Necc ad wceɣ marra Yahuda deg ifassen n ujeǧid n Babil nni ten i ɣa inedhen di tmeḥbast ɣar Babil u ad ten ineɣ s ssif. 5 Marra agřa n tendint-a ad ten sellmeɣ u marra min dayes iɣřan d marra tixuba n ijeǧiden n Yahuda ad ggeɣ aya marra deg ufus n řɛedyan nsen. Nitni ad ten acaren, ad ten ksin akidsen uca ad ten i-dd-awyen ɣar Babil. ◘20:5 Irm. 15:13; 17:3 6 Cek, Facḥur, d marra ayt n taddart nnec, kenniw ad teffɣem d imeḥbas. Cek ad dd-tawḍed ɣar Babil uca ad temmted dinni uca ad ttwaneḍřed dinni, cek d marra imeddukkař nnec inni umi tnebbid s ixarriqen.’ ”

7 “Cek tjebded ayi, a SIDI, uca necc ttwassqenɛeɣ. Cek tjehded xafi aṭṭas, tɣeřbed ayi. Ass marra ttɣiman deḥḥcen dayi, marra idsen stehzan zzayi. 8 Maɣar meřmi ma ssiwřeɣ, sɣuyyuɣ ‘Řexcunect!’, řaɣiɣ ‘Anexřiɛ!’, maɣar awař n SIDI ittawi ayi-dd ass imun mɣir aseḥqar d ustehzi. ◘20:8 Ica. 57:4 9 Nniɣ: ‘Necc war t ttidareɣ ɛad u war ssiwiřeɣ ɛad s Yisem nnes!’, xenni idweř aya deg wuř inu am yict n tmessi yareqqen, tᵉttwaḥbes deg iɣsan inu. Necc ssaḥařeɣ ixef inu maḥend ad ṣbareɣ, maca war d as zemmareɣ. 10 Maɣar sřiɣ aceqqef s řhard n waṭṭas: ‘Majur-Missasib’, ‘Asiggʷed zi marra iɣezdisen!’, ammu i qqaren. Uca xenni qqaren: ‘Sargeb aneɣ!, xenni neccin ad zzayes nbarreḥ!’ Kuř aryaz ak-d ddareɣ di řehna, ittraja ař ɣa nqarḍeɣ. Qqaren: ‘Ad taɣ nzemmar ad t neɣwa, xenni ad t neɣřeb uca ad zzayes nexřef.’ ”

11 “SIDI ibedd akidi am yijj n bu-teɣruḍt d ameqqran, x uya i ɣa nnqarḍen inni d ayi iḍaffaren, war zemmaren ad ggen walu. Nitni ad seḍḥan s yixef nsen aṭṭas, minzi war ggin s řeɛqeř. Ad tiři d ict n řefḍiḥet i řebda i war ttᵉttun i řebda. ◘20:11 Irm. 1:8, 19; 15:20; 17:18; 23:40 12 Cek, a SIDI n řɛeskarat, wenni ittqeǧaben amsegged, wenni ittwařan tiẓẓař d wuř, scen ayi nneqmet nnec xasen, maɣar necc ggiɣ ac taɣawsa inu deg ufus.” ◘20:12 Irm. 11:20; 12:3; 15:15; 18:19-23

13 “Zehhdem i SIDI, semɣarem SIDI, maɣar Netta ifekk amezřuḍ zeg ufus n iɛeffanen.”

14 “Aqa ittwanɛeř ass i di dd-ttwarweɣ! Ass i d ayi dd-turu yemma war ittiři ittwabarek. ◘20:14 Irm. 15:10 15 Ittwanɛeř weryaz nni dd-yiwyen řexbar aṣebḥan i baba, inna: ‘Aqa ittwaruw ac-dd uḥenjir!’ uca issfarḥ i-t ammu s waṭṭas. ◘20:15 Ayub 3:3 16 Ejj aryaz nni ad yiři am tneddam nni issneqřeb SIDI břa ma indem zi man aya. Ejj i-t ad iseř i iɣuyyan n řeḥriq ɣar teffut u iɣuyyan n umenɣi ɣar ṭṭya n wass, ◘20:16 Amz. 19 17 minzi Netta war d ayi inɣi deg uɛeddis n yemma. Ammu tedweř yemma d anḍeř inu uca iqqim uɛeddis nnes iksi s ddeyset i řebda! 18 Mayemmi i dd-ffɣeɣ zeg uɛeddis? Ma ḥima ad ẓareɣ tamara d wecḍan waha u ḥima ad qḍiɣ ussan inu di řefḍiḥet?” ◘20:18 Ayub 3:20