1 Inna ayi SIDI: “Waxxa mařa ibedd Musa d Camwil zzat i wudem inu, ɛad war ittiři řeɛmar inu ak-d řgens-a. Siggʷej i-ten zi zzat n wudem inu, ejj i-ten ad uyuren. ◘15:1 Uf. 32:14; 1 Ṣm. 7:9; Ḥiz. 14:14, 20 2 Xmi d ac i ɣa inin: ‘Mani ɣa nuyur?’, xenni ad asen tinid: ‘Ammu i iqqar SIDI: Wi iǧan i řmewt, ɣar řmewt, wi iǧan i ssif, ɣar ssif, wi iǧan i řaẓ, ɣar řaẓ u wi iǧan i řeḥbes, ɣar řeḥbes!’◘15:2 Zak. 11:9; Asa. 13:10 3 Ad ten xeǧṣeɣ s arebɛa n webriden, ammu i iqqar SIDI: s ssif ařami ɣa ttwanɣen, s yiṭan ařami ten jarren zeg webrid, s ijḍaḍ n ujenna d řewḥuc n temmurt ař ɣa ttwaṣarḍen u ad ttwareddǧen. ◘15:3 Lawi 26:16; Irm. 7:33 4 Necc ad ten arreɣ d ict n řqecɛet n unexřiɛ i marra tigeldiwin n ddunect zi ssibbet n Manassa, mmis n Ḥizqiya, ajeǧid n Yahuda, d axřaf zi min igga di Urcalim.” ◘15:4 Aɛwd. 28:25

5 “Maɣar man wen umi ɣa tezziǧed, a Urcalim? Wi d am i ɣa issḥissfen niɣ wi dd ɣa iffɣen zeg webrid maḥend ad xam isseqsa x umeddur nnem? ◘15:5 Ica. 51:19 6 Cem tsemḥed dayi, ammu i iqqar SIDI, tdewřed ɣar ḍeffar. S uyenni i ɣa sswiẓẓḍeɣ afus inu ḍidd nnem uca ad cem areddǧeɣ. Necc uḥreɣ s uḥinni xawem.” ◘15:6 Irm. 5:7

7 “Necc ad ten zuzzareɣ s ǧuḥ di tewwura n temmurt. Necc keccḍeɣ iḥenjiren zi řgens inu uca sshellkeɣ ten. Nitni war dd-dwiřen ca zeg ibriden nsen iɛeffanen.◘15:7 Irm. 4:11 8 Tijjař nsen ad iřint wesɛent x yejdi n řebḥurat. Di ṭṭya n wass ad xasen ssiwḍeɣ ijj n umteḥḥay, x yemmas d uḥudri. Deɣya ad xas wḍiɣ Necc s tiggʷudi d inexřiɛen. ◼15:8 x yemmas n uḥuḍri - xzar ɛawed Irm. 15:9. 9 Tenni i dd-yurwen sebɛa n iḥenjiren, texsi. Nettat tedřeq i buḥbeř nnes, teɣři tfuct nnes am iǧa ɛad d wass. Nettat tᵉttseḍḥa uca tᵉtteṭṭef i-tt i-dd řefḍiḥet. Min iqqimen zzaysen ad t wceɣ i ssif zzat i wudem n řɛedyan nsen, ammu i iqqar SIDI.” ◘15:9 Ɛam. 8:9

10 “Uct xafi, yemma, aqa cem turwed ayi-dd: ijj n weryaz n umcubbec, ijj n weryaz n umenɣi i marra tammurt. Necc war d asent arḍřeɣ uca nitni war d ayi ttᵉttursen, waxxa amenni marra neɛɛřen ayi.” ◼15:10 afessar - anabi Irmiya issawař.  ◘15:10 Ayub 3; Irm. 20:14-18 11 Inna SIDI: “Ah, mařa Necc war teggeɣ s tcuni akidek, mařa Necc war ggiɣ ad cek iḥcem řeɛdu di řweqt n tecti taɛeffant u di řweqt n řeḥṣaret.” 12 Ma izemmar bnadem ad yarẓ uzzař, uzzař i dd-yusin zi ccamal, niɣ nnḥas? ◘15:12 Irm. 6:28 13 Agřa nnec d řeknuz nnec ad ten wceɣ d takeccaḍt i řegnus, břa ttaman, zi ssibbet n marra ddnub nnec uca aya di marra tammurt nnec. ◘15:13 Irm. 17:3 14 Necc ad cek sseɛduɣ ak-d řeɛdu nnec ɣar ict n temmurt nni war tessined ca, maɣar s weɣḍab inu tarɣa tmessi nni i ɣa iqqimen tcemmeḍ ḍidd nwem.” ◘15:14 Aɛwd. 32:22

15 “A SIDI, Cek tessned tt, idar ayi uca řha-dd akidi! Ntaqem ayi zeg yinni d ayi iḍeffaren! War d ayi ttekkes, minzi ɣarek ttasiɛ n řxaḍar aṭṭas. Ssen aqa necc ad xak ksiɣ řɛar di ṭṭweɛ nnec. ◘15:15 Irm. 11:20 16 Umi ttwafen wawařen nnec, cciɣ ten deɣya. Awař nnec tuɣa-t i necc d arcuq d řefraḥet i wuř inu maɣar ittwabarreḥ Isem nnec di tiwa inu, a SIDI, AREBBI n řɛeskarat.

17 Necc war ttɣimiɣ ca deg wegraw n yinni istehzan, war neggzeɣ s řefraḥet. Zi ssibbet n ufus nnec ttɣimiɣ weḥḥdi, maɣar teccured ayi s wesxeḍ nnec. ◘15:17 Izhd. 1:1 18 Mayemmi řeḥriq inu iddar řebda u mayemmi war izemmar uyezzim inu ɛemmarṣ ad iggenfa, ma netta yugi ad iggenfa? Ma s tidett aqa Cek am waman inhewřen inni war di iǧi řaman?” ◘15:18 Ayub 6:15-30; Irm. 30:15

19 “S uya, ammu i iqqar SIDI: ‘Mařa cek tdewřed-dd, Necc ad cek arreɣ ad dd-tdewřed u ad tbedded zzat i wudem inu. Mařa tessiwřed min iɣřan deg wemcan n min war isekkwin walu, xenni ad tiřid am uqemmum inu. Ejj i-ten ad ɣarek dd-dewřen, maca cek war tzemmared ad ɣarsen dd-tdewřed. 20 Maɣar Necc ad cek ggeɣ i řgens-a d řḥiḍ imetnen n nnḥas. Ad kidek mmenɣen, maca nitni war zemmaren ad cek arenyen, maɣar Necc akidek ḥima ad cek ssnejmeɣ u ḥima ad cek fekkeɣ, ammu i iqqar SIDI.◘15:20 Irm. 1:18 21 Necc ad cek fekkeɣ zeg ufus n iɛeffanen u Necc ad cek fdiɣ zeg wemnaɛ n ayt n bu-řexcunet.”