1 Uca dewřeɣ beddeɣ x ijdi ɣar tma n řebḥar, uca ẓriɣ ijj n řweḥc igeɛɛed-dd zi řebḥar, ɣares ɛecra n waccawen d sebɛa n izeǧifen. X waccawen nnes ɛecra n ttijan uca x izeǧifen nnes ittwari xasen ijj n yisem n ttekfir. ◘13:1 Dan. 7:20; Asa. 17:3. 2 Řweḥc i ẓriɣ, yarwes deg uɣiřas, iḍaren nnes am yiḍaren n ddub, axenfuc nnes am uxenfuc n wayrad. Řhaycet tewca as jjehd nnes d řɛarc nnes uřa d ṣṣulṭa imɣaren. 3 Ijjen zeg izeǧifen nnes igga axmi t wtin ař řmewt, xenni ittwassgenfa uyezzim nnes i iggin axmi iyzem ař řmewt, uca marra tammurt teḍfar řweḥc s utebhet ameqqran. 4 Aqa nitni ɛebden řhaycet, minzi nettat tewca ṣṣulṭa i řweḥc, uca nitni ɛebden řweḥc, nnan: “Wi yarwesen di řweḥc?” u: “Wi izemmaren ad kides immɛařan?” ◘13:4 Asa. 18:18. 5 Immewc as i řweḥc aqemmum nni issawařen s ukebbar u s uceqqef di AREBBI, uca temmewc as ṣṣulṭa ḥima ad ixdem i yijj n řqedd n tnayen u-rebɛin n iyuren. ◼13:5 tnayen u-rebɛin n iyuren - man aya ixs ad yini 1260 n wussan niɣ 3½ n iseggʷusa (xzar Asa. 12:6, 14).  ◘13:5 Ayub 15:25; Asa. 11:2. 6 Uca netta yarzem aqemmum nnes ḥima ad iceqqef di AREBBI, u ḥima ad iceqqef deg Yisem nnes u di Tzeddiɣt n yinni izeddɣen deg ujenna. 7 Immewc as ṣṣulṭa maḥend ad immneɣ ak-d imqeddasen u maḥend ad xasen iɣelleb. Temmewc as ṣṣulṭa x marra tiqebbař d ccuɛub d yiřsawen d řegnus. ◘13:7 Dan. 7:21; Asa. 11:7. 8 Marra inni tuɣa izeddɣen di temmurt ad t ɛebden, inni umi war ittwazemmemen ismawen nsen deg Wedlis ittwanḍen n Tudart n Yezmar wenni umi ittwaɣarṣ qbeř tamarsiwt n ddunect. ◘13:8 Uf. 32:33; Fil. 4:3; Asa. 3:5; 17:8; 20:12; 21:27; Asa. 21:27. 9 Wenni ɣar ǧan imezzuɣen, ejj i-t ad iseř.

10 Mařa din ijjen wenni issidfen ɣar tmeḥbast, ad ittwandeh netta s yixef nnes ɣar tmeḥbast. Inni inɣin s ssif, ad ttwanɣen s ssif: aqa da ittban-dd l’iman d ṣṣbar n imqeddasen. ◘13:10 Amz. 9:6; Irm. 43:11; Mt. 26:52; Asa. 14:12.

11 Xenni ẓriɣ ijj n řweḥc nneɣni ittgeɛɛad-dd zi temmurt. Tuɣa ɣares tnayen n waccawen uca yarwes deg Izmar, maca issiweř am řhaycet. ◘13:11 Asa. 11:7. 12 Tuɣa iḥekkem s marra ṣṣulṭa n řweḥc amezwaru zzates, yarra-dd tammurt d imezdaɣ nnes marra ad ɛebden řweḥc amezwaru, wenni iggenfan zeg uyezzim i iggin axmi iyzem ař řmewt. ◘13:12 Asa. 19:20. 13 Netta ad igg řeɛřamat timeqqranin ařami i ɣa yarr timessi ad dd-tehwa zeg ujenna x temmurt qibač i tiṭṭawin n iwdan. ◘13:13 2 Ts. 2:9; Asa. 16:14. 14 Ad iɣwa inni izeddɣen di temmurt s řeɛřamat i d as immewcen ḥima ad tent igg qibač i tiṭṭawin n řweḥc amezwaru, maḥend ad yini i yinni izeddɣen di temmurt ad kkaren ad ssbedden ijj n řexyař i řweḥc, wenni tuɣa iyzem s ssif, maca iddar ɛad. ◘13:14 Aɛwd. 13:2; Mt. 24:24; Asa. 16:14; 19:20. 15 Uca immewc as ad igg ijj n arruḥ i řexyař n řweḥc u ḥima ad igg belli marra inni war iɛebbden řweḥc, ad ttwanɣen. ◘13:15 Asa. 19:20. 16 Uca ad igg maḥend ad temmewc i marra, i imeẓyanen d imeqqranen, i aytbab n wagřa d imezřaḍ, i ayt n ccan d isemɣan, ict n řmarka x ufus nsen afusi niɣ x tenyart nsen, ◼13:16 tanyart - niɣ: ‘tawarna’. 17 maḥend uřa d ijj war izemmar ad iseɣ niɣ ad izzenz mɣir wenni x teǧa řmarka n yisem n řweḥc niɣ nnumru n yisem nnes. ◘13:17 Asa. 14:11.

18 Danita teǧa tiɣit: wenni ɣar iǧa řeɛqeř, ejj i-t ad iḥseb nnumru n řweḥc, minzi netta d nnumru n ijj n bnadem uca nnumru nnes d setta-mya u-setta u-settin. ◘13:18 1 Ij. 10:14; 2 Im. 9:13; Ɛiz. 2:13; Asa. 17:9.