1 Xenni iffeɣ Yasuɛ zi Zzawect Tameqqrant maḥend ad yuyur, maca usin-dd ɣares imeḥḍaren nnes, ssecnen as řebniyyat n Zzawect Tameqqrant. ◘24:1 [Mk. 13:1-37; Lk. 12:41-48; 17:26-30; 34-36; 21:5-33]   *

2 Netta inna asen: “Ma war teẓrim marra man aya? S tidett, Necc ad awem iniɣ: War da ittɣimi uřa d ijj n weẓru x weẓru nneɣni i war ittnehdim.” ◘24:2 1 Ij. 9:7, 8; Mixa 3:12; Lk. 19:44.

3 Umi tuɣa Yasuɛ iqqim x wedrar n Zzitun, usin-dd imeḥḍaren nnes, tuɣa ttemsawařan, nnan as: “Ini aneɣ, meřmi i ɣa imsar aya u man řeɛřamet n twasit nnec u n qeṭṭu n ddunect?” ◘24:3 Mk. 13:1, 3; Lk. 21:7; Řex. 1:6. 4 Yasuɛ yarra-dd, inna asen: “Ḥḍam ixef nwem, war kenniw ixeddeɛ ḥed. ◘24:4 Irm. 29:8; Afa. 5:6; Kul. 2:18; 2 Ts. 2:3; 1 Yḥ. 4:1. 5 Minzi aṭṭas ad dd-asen s Yisem inu, ad inin: ‘Aqa Necc d Lmasiḥ!’, uca ad xedɛen aṭṭas. ◘24:5 Irm. 14:14; 23:25; Yḥ. 5:43. 6 Uca ad tesřem x garrat u x řexburat n imenɣan. Ɣarwem aqa ad teggʷedem, minzi s uɣiř ad yiři man aya, maca war ittiři ɛad d aneggar. 7 Minzi řgens ad iɣewweɣ x ijj n řgens nneɣni u tageldit x tgeldit nneɣni, ad yiři řaẓ d řehřacat yewɛaren d inhezzan n temmurt da d diha. ◘24:7 Ica. 19:2. 8 Marra man aya d beddu n řewjeɛ n tarut. 9 Xenni ad kenniw dd-awyen ɣar řmeḥnet uca ad kenniw nɣen, u marra řegnus ad kenniw carhen zi ssibbet n Yisem inu. ◘24:9 Mt. 10:17; Lk. 21:11, 12; Yḥ. 15:20; 16:2; Asa. 2:10. 10 Řexdenni ad nqarḍen waṭṭas, ad carhen ijjen wenneɣni uca ad sellmen ijjen wenneɣni. 11 Ad kkaren waṭṭas n inabiyyen issxarriqen uca ad ɣwan aṭṭas. ◘24:11 2 Bṭ. 2:1. 12 S waṭṭas n řmuɛṣiyyet ad tudrus tayri n waṭṭas n iwdan, ◼24:12 tayri - niɣ ‘řemḥibbet’.  ◘24:12 2 Tim. 3:1. 13 maca wi ɣa iṣbaren ɣar uneggar, aqa netta ad iddar. ◘24:13 Mt. 10:22; Mk. 13:13; Lk. 21:19; Asa. 2:7, 10; 3:10. 14 Řexbar-a Aṣebḥan n Tgeldit ad zzayes barrḥen di ddunect marra d cchadet i marra řegnus uca řexdenni ad dd-yas uneggar.”

15 “Xmi ɣa tẓarem řeɛřamet n nnɛi n wareyyeb, min xef issiweř unabi Daniyal, deg wemcan iqeddsen - ejj wenni t i ɣa iɣaren ad iften - ◘24:15 Dan. 9:27; Mk. 13:14; Lk. 21:20. 16 řexdenni jjem inni iǧan di Yahudiyya ad arewřen ɣar idurar. ◘24:16 Mk. 13:14; Lk. 21:21 17 Wenni iǧan x tzeqqa war dd-ihekkwi ca ḥima ad iksi ca zi taddart nnes, 18 u wenni iǧan deg iyyar, war dd-iddikkʷiř ca ḥima ad dd-yawi arruḍ nnes. 19 Uct x tinni iǧan s ddeyset d tinni issuṭṭuḍen deg wussan nni! 20 Ẓaǧem, ḥima war tᵉttiři tarewřa nwem di řmecta niɣ di ssebt, ◘24:20 Řex. 1:12. 21 minzi řexdenni ad tiři řmeḥnet tameqqrant i war imsaren ɛemmarṣ zeg wami teǧa ddunect ař i řexxu u ɛemmarṣ war tᵉttiři ɛad. ◘24:21 Dan. 12:1. 22 Mři ussan nni war ttwassmeẓyen, xenni war ittwassenjem uřa d ijj n bnadem, maca ussan nni ad ttwassmeẓyen di ṭṭweɛ n yinni ittwafarzen. 23 Mařa inna awem ḥed: ‘Xzarem, aqa da Lmasiḥ!’ niɣ: ‘Aqa-t diha!’ war t ttimnem. ◘24:23 Mk. 13:21; Lk. 21:8. 24 Minzi ad iřin imasiḥen ifalsuten d inabiyyen issxarriqen, ad ggen řeɛřamat mɣarent, ḥima, mři zemmaren, ad xedɛen ɛawed inni ittwafarzen. ◘24:24 Aɛwd. 13:2; 2 Ts. 2:11. 25 Xzarem, aqa nniɣ awem t qbeř. 26 Mařa nnan awem: ‘Xzarem, Netta aqa-t di řexřa!’, war ttriḥem ca din, niɣ: ‘Xzarem, Netta aqa-t daxeř i wexxam!’, war tt ttimnem. ◘24:26 Lk. 17:23. 27 Minzi am wajjaj i dd-itteffɣen zi ccarq uca ittegg tafawt ař řɣarb, ammu i ɣa tiři twasit n Mmis n bnadem. 28 Mani ɣa tiři arrimet diha ad munen igidaren.” ◘24:28 Ayub 39:30; Lk. 17:37.

29 “Řexdenni awarni řmeḥnet n wussan nni, ad tbarcen tfuct u taziri war tᵉttic ɛad ṭṭya nnes u itran ad dd-wḍan zeg ujenna u ṣṣulaṭat n ijenwan ad ttwanhezzent. ◘24:29 Ica. 13:10; 34:4; Ḥiz. 32:7; Yuw. 3:4; 3:15; Mk. 13:24; Lk. 21:25. 30 Xenni ad dd-teḍhar řeɛřamet n Mmis n bnadem deg ujenna u marra tiqebbař n temmurt ad wtent agejdur uca ad ẓarent Mmis n bnadem yusa-dd x iseynuten n ujenna s jjehd u s uɛuǧi aṭṭas. ◘24:30 Dan. 7:10; Mt. 16:27; 25:31; 26:64; Mk. 13:26; 14:62; Lk. 21:27; Řex. 1:11; 2 Ts. 1:10; Asa. 1:7. 31 Netta ad issekk lmalakat nnes s řḥess ijehden n usuḍi deg uyicc n icarri, uca ad dd-ssmunent inni ittwafarzen zi arebɛa n iɣezdisen n usemmiḍ, zi ṭṭarf aneggaru n ijenwan ař wenneɣni.” ◘24:31 1 Kur. 15:52; 1 Ts. 4:16.

32 “Řemdem zeg umedya n wartu: xmi ɣa dewřen řefruɛ nnes d iřeqqaɣen, ad dd-ssuffɣen tifray, ad tessnem aqa anebdu yudes-dd. ◘24:32 Mk. 13:28; Lk. 21:29. 33 Ammu ɛawed kenniw, xmi ɣa tẓarem marra man aya, ad tessnem aqa yudes-dd, ɣar tewwart.”

34 “S tidett, Necc ad awem iniɣ: Jjiř-a war iɛeddu ař ɣa imsar man aya marra. 35 Ajenna d temmurt ad ɛdun, maca awařen inu war ɛeddun ɛemmarṣ. ◘24:35 Izhd. 102:27; Ica. 51:6; Mk. 13:31; Ɛbr. 1:11.

36 Maca x wass nni niɣ x tsaɛɛet nni war xas issin uřa d ijj, uřa d lmalakat n ijenwan, mɣir Baba weḥḥdes. ◘24:36 Řex. 1:7 37 Am mammec tuɣa iǧa deg wussan n Nuḥ ammu i ɣa tiři ɣar twasit n Mmis n bnadem. ◘24:37 Amz. 6:2; Lk. 17:26; 1 Bṭ. 3:20; 2 Bṭ. 2:5. 38 Minzi am mammec ten tuɣa deg wussan qbeř ṭṭufan, ttᵉtten, sessen, meǧcen u ssmeǧacen ař ass i di yudef Nuḥ ɣar uɣarrabu, ◼24:38 ṭṭufan - ixs ad yini řḥemřet tameqqrant x marra ddunect deg wussan n Nuḥ, ɛřaḥař ařfayn u-xemsa-mya n iseggʷusa qbeř ma ad ixřeq Lmasiḥ. Xzar Amz. 6.  ◘24:38 Amz. 7:7. 39 uca war ucin walu ařami dd-yusa ṭṭufan, imḥa i-ten marra, ammu i ɣa tiři ɣar twasit n Mmis n bnadem. 40 Di řweqt nni ad iřin tnayen deg iyyar, ijjen ad t ksin u wenneɣni ad t jjen. ◘24:40 Lk. 17:34; 1 Ts. 4:17. 41 Tnayen n temɣarin ad ḥaryent s tsirt, icten ad tt ksin u tenneɣni ad tt jjen. 42 S uya ḥḍam, minzi war tessinem ca di man tasaɛɛet i dd ɣa yas Siditwem. ◘24:42 Mt. 25:13; Mk. 13:33; Lk. 12:40; 21:36. 43 Maca ssnem aya: mařa bab n taddart issen di man ḥeṭṭu n ǧiřet i dd ɣa yas uceffar, iři iqqim iḥeṭṭa, war t ittejji ad yadef ɣar taddart nnes. ◘24:43 Lk. 12:39; 1 Ts. 5:2; 2 Bṭ. 3:10; Asa. 3:3; 16:15. 44 S uya, iřim twejdem, minzi Mmis n bnadem ad dd-yas deg ict n tsaɛɛet war tt tᵉttrijim.”

45 “Wi iǧan xenni d amsexxar amtiqqi d amiɣis i igga bab nnes, ḥima ad ibḍa x aytbab n taddart nnes min ɣa ccen di řweqt nnes? ◘24:45 Mt. 25:21 46 Sseɛd n umsexxar wenni i ɣa yafen sidis iřha ammu xmi dd ɣa yas. 47 S tidett, Necc ad awem iniɣ, ad t igg x marra agřa nnes. 48 Maca mařa amsexxar aɛeffan nni ad yini deg wuř nnes: ‘Sidi inu iɛeṭṭař maḥend ad dd-yas!’, 49 uca ibda iccat imsexxaren imɛacaren nnes, ad icc ad isu ak-d imeskaren, 50 xenni ad dd-yas sidis n umsexxar nni deg ijj n wass i di war t ittriji u deg ict n tsaɛɛet war tt issin, 51 ad t iqess d iwetwiten uca ad tiři tesɣart nnes ak-d imnafqen. Din i ɣa yiřin imeṭṭawen d uɣezzi n teɣmas.” ◘24:51 Mt. 8:12; 13:42; 22:13; 25:30; Lk. 13:28.