1 Umi munen ibarruten n řɣaci s waṭṭas, ařami bdan ɛřayen ɛeffsen ijj x wenneɣni, ibda iqqar i imeḥḍaren nnes: “Ɣar umezwar ḥḍam ixef nwem zeg wentun n Ifarisiyyen, aqa-t d nnifaq!◘12:1 [Mt. 10:28-33; 12:32; 10:19-20] — Mt. 16:16; Mk. 8:15. 2 Minzi war din min idřin, war ittᵉttwasseḍhar, u war din min inuffaren, war ittᵉttwissin. ◘12:2 Ayub 12:22; Mt. 10:26; Mk. 4:22; Lk. 8:17. 3 Minzi marra min tennam di taǧest, ad ittwaseř di tfawt, u min xef tessiwřem deg umezzuɣ deg wexxam n daxeř, ad ittwabarreḥ zzayes x tzeɣwin.”

4 “Necc ad awem iniɣ, a imeddukkař inu: War teggʷdem ca zeg inni ineqqen arrimet, maca awarni man aya war zemmaren ad ggen ktar ɛad. ◘12:4 Ica. 51:7; Irm. 1:8; Mt. 10:28. 5 Maca Necc ad awem ssecneɣ wenni zi ɣa teggʷedem: Ggʷedem zeg Wenni ɣar iǧa ṣṣulṭa, maḥend ad inḍar di jᵉhennama awarni řami inɣa. Wah, ad awem iniɣ, zeg Wanita i ɣa teggʷedem! 6 Ma war ttmenzin xemsa n ẓẓawec s tnayen n iṣuldiyyen n nnḥas? Uca uřa d ijj zzaysen war ittᵉttwattu zzat i AREBBI. ◘12:6 Mt. 10:29. 7 Maca zzaywem, ɛad iẓuṭṭan n ucuwwaf n uzeǧif nwem ttwaḥesben. S uyenni war teggʷdem ca, kenniw ḥsen zi ẓẓawec aṭṭas!” ◼12:7 ẓẓawec - niɣ: ‘iẓẓawjiwen’.  ◘12:7 1 Ṣm. 14:45; 2 Ṣm. 14:11; 1 Ij. 1:52; Lk. 21:18.

8 “Necc ad awem iniɣ, marra wi zzayi i ɣa icehden qibač i iwdan, ad zzayes iched ɛawed Mmis n bnadem zzat i lmalakat n AREBBI. ◘12:8 Mt. 10:32. 9 Maca wi d ayi ɣa inkaren qibač i iwdan, uřa d netta s yixef nnes ad ittwankar qibač i lmalakat n AREBBI. ◘12:9 Mt. 10:33; Mk. 8:38; Lk. 9:26; 2 Tim. 2:12; 1 Yḥ. 2:23.

10 Kuř ijj wenni i ɣa inin awař ḍidd n Mmis n bnadem, aqa ad as ittwaɣfar man aya. Maca wenni i ɣa iceqqfen di Arruḥ Iqeddsen war d as ittᵉttwaɣfar ca man aya!” ◘12:10 1 Yḥ. 5:16.

11 “Xmi kenniw i ɣa nedhen ɣar temzidawin, zzat i řḥukkam d ayt n bu-ṣṣulṭa, war kessim ca s wemnus min zi i dd ɣa tarrem niɣ min ɣa tinim, ◘12:11 Mt. 10:19; Mk. 13:11; Lk. 21:14. 12 minzi Arruḥ Iqeddsen ad awem isseřmed di tsaɛɛet nni min ittxeṣṣa ad tinim.”

13 Inna as ijjen zi řɣaci: “A Amseɣɣar, ini as i uma, ḥima ad kidi ibḍa řwart.” 14 Maca Yasuɛ inna as: “A bnadem, wi d ayi yarrin xawem d řqaḍi niɣ d řɛadeř?” 15 Inna i imeḥḍaren nnes: “Ɣarwem, ḥḍam ixef nwem zi ṭṭmeɛ, maɣar tudart war teǧi deg ufeyyeḍ n wagřa.” ◘12:15 1 Tim. 6:7.

16 Xas uca iḥaja asen ijj n umedya: “Tammurt n ijj n weryaz d bab n wagřa tiwyi as-dd ṣṣabet aṭṭas. 17 Ixarreṣ deg ixef nnes: ‘Min ɣa ggeɣ?, minzi war ɣari bu řmarsi i di i ɣa yarweɣ marra řɣiǧet inu.’ 18 Inna: ‘Ammu i ɣa ggeɣ: Ad hedmeɣ řemrasi inu, xenni ad bniɣ řemrasi d imeqqranen xasen uca ad daysen xezneɣ marra řɣiǧet d wagřa inu. 19 Ad iniɣ i yixef inu: ‘A řeɛmar inu, ɣarek aṭṭas n wagřa i ittwaxzen din i waṭṭas n iseggʷusa. Areyyeḥ, tecced, teswed u tfarḥed!’ ◘12:19 Amb. 11:9; 1 Kur. 15:32; Yaɛ. 5:5. 20 Maca inna as AREBBI: ‘A afɣuř, aqa ǧiřet-a ad zzayek ittwattar řeɛmar nnec. Xenni i umi ɣa yiři min tesswejded?’ ◘12:20 Izhd. 39:7; Izhd. 52:7; Amb. 2:18, 19; Irm. 17:11. 21 Ammu i ɣa imsar i wenni iyarrwen řeknuz i yixef nnes, maca war iǧi d bab n wagřa di AREBBI.”

22 Inna i imeḥḍaren nnes: “S uyenni Necc ad awem iniɣ: War kessim s wemnus i řeɛmar nwem min ɣa teccem, uřa i arrimet nwem min ɣa tyarḍem. ◘12:22 [Mt. 6:19-21; 25-34] — Izhd. 55:23; Mt. 6:25; Fil. 4:6; 1 Tim. 6:8; 1 Bṭ. 5:7. 23 Řeɛmar ktar zi macca u arrimet ktar zeg werruḍ. 24 Xzarem ɣar ibaɣřiwen! Aqa war zarrɛen, war mejjaren, war ɣarsen tisrafin niɣ d řemrasi, maca AREBBI issecca i-ten. Mecḥař aṭṭas tsekkwim kenniw ktar x ijḍaḍ! ◘12:24 Ayub 38:41; Izhd. 147:9. 25 Man wen zzaywem izemmar s wemnus nnes ad yarni di tuzzeggart nnes ijj n uɣiř waha? ◘12:25 Mt. 6:27. 26 Mařa kenniw war tzemmarem uřa x min iǧan d ameẓyan qaɛ, mayemmi ɣa teksim s wemnus x min iqqimen?”

27 “Xzarem mammec ɣemmyent tlillicin! War xeddment, war ttqareḍcent, maca Necc ad awem iniɣ, aqa uřa d Suliman di qaɛ aɛuǧi nnes war yarḍ ca am uřa d ict zzaysent. ◼12:27 tilillicin - ijj n marka n nnuwarat daysen aẓri aṭṭas. 28 Mařa AREBBI issyarḍ ammu arbiɛ i iǧan ass-a deg iyyar uca tiwecca ad immenḍar di tefqunt, mecḥař iḥřa aṭṭas ad issyarḍ Netta kenniw i di iǧa drus n l’iman!”

29 “S uyenni war arezzum ca x min ɣa teccem uřa x min ɣa teswem, war ttejjim ixarriṣen nwem ad ɣefřem x man aya. 30 Minzi marra timesřayin-a arezzun daysent řegnus n ddunect, maca Babatwem issen belli teḥdajem tent. 31 Maca arzum Tageldit n AREBBI uca timesřayin-a marra ad awem ttwammarnint.” ◘12:31 1 Im. 3:13; Izhd. 37:25.

32 “War tteggʷed, cem, a taḥimart tameẓyant, minzi yarḍa Babatwem ad awem iwc Tageldit. 33 Zenzem min ɣarwem, wcem ṣṣedqet! Ggem i yixef nwem ticyarin n tmenyat i war yareccin, uca xemmřem ijj n řkenz i war iqeṭṭin deg ijenwan, mani war ittidef uceffar uřa d tcinda war tᵉttegg ssuss. ◘12:33 Mt. 6:20; 19:21; Lk. 16:9; 1 Tim. 6:19. 34 Minzi mani ɣa yiři řkenz nwem, dinni i ɣa yiři ɛawed wuř nwem.”

35 “Ad iřint tejɛinnatin nwem ḥezzmemt s ibuyas u řefnarat nwem areqqent. ◘12:35 [Mt. 24:45-51] — Afa. 6:14; 1 Bṭ. 1:13. 36 Iřim am iwdan i ittrajan sidi nsen xmi dd ɣa yeɛqeb zeg wexxam n wurar, ḥima, xmi dd ɣa yas, ad issqarqeb, zemmaren ad as arzmen deɣya. 37 Sseɛd n imsexxaren nni, xmi dd ɣa yas siditsen, ad ten yaf faqen. S tidett, Necc ad awem iniɣ, aqa ad iḥezzem ixef nnes uca ad ten issɣim, xenni ad dd-yas ad xasen isexxar. 38 Mařa yusa-dd ɣar ḥeṭṭu wiss tnayen n ǧiřet niɣ ɣar ḥeṭṭu wiss třata uca yufa i-ten ammu, sseɛd n imsexxaren nni. ◘12:38 Mt. 24:42. 39 Maca ssnem aya: mařa bab n taddart issen di man tsaɛɛet i di ɣa ixecc uceffar, xenni ad yiři ifaq, war ittejji taddart nnes ad tt acaren. ◘12:39 Mt. 24:43; 1 Ts. 5:2; 2 Bṭ. 3:10; Asa. 3:3; 16:15. 40 Iřim kenniw ɛawed twejdem, minzi Mmis n bnadem ad dd-yas deg ict n tsaɛɛet i war tᵉttrijim.” ◘12:40 Mt. 24:44; 25:13; Mk. 13:33; Lk. 21:34; 1 Ts. 5:6.

41 Inna as Cimɛun Buṭrus: “A Siditneɣ, ma i neccin i tɛawded amedya-ya niɣ i marra?” 42 Inna as Yasuɛ: “Man wen iǧan xenni d awkiř amiɣis i di iǧa řaman, d wenni i ɣa yegg sidis x imsexxaren nnes ḥima ad asen iwc řeɛweč nsen di řweqt nnes? ◘12:42 Mt. 24:45; 25:21; 1 Kur. 4:2. 43 Sseɛd n umsexxar nni i ɣa yaf sidi nnes, xmi dd ɣa yas, ittegg ammu. 44 S tidett, Necc ad awem iniɣ, belli ad t yegg x marra agřa nnes. 45 Maca mařa amsexxar nni ad yini deg wuř nnes: ‘Aqa sidi inu iɛeṭṭař x weɛqab!’, uca ibda iccat imsexxaren d tiyya, ittett, isess, iscar, 46 xenni ad dd-yas sidi n umsexxar nni deg ijj n wass war ittriji u deg ict n tsaɛɛet i war issin. Wanita ad t iqeṭṭes d iceǧiqen, ad igg tasɣart nnes ak-d iɣeddaren. 47 Amsexxar nni issnen řxaḍar n sidi nnes uca war issewjed ixef nnes uřa war iggi ɛlaḥsab řxaḍar n sides, ad iksi tiyyita aṭṭas. ◘12:47 Yaɛ. 4:17. 48 Maca wenni war issinen řxaḍar n sides am igga ca min isdaheǧen tiyyita, ad ittwawwet s drus n tiyyita. Zi kuř ijjen umi immewc aṭṭas, ad zzayes ittwattar aṭṭas, u wi umi ittwakellef aṭṭas, ad zzayes ittwattar ktar.”

49 “Usiɣ-dd ḥima ad nḍareɣ timessi x temmurt u meɛlik ufiɣ ad tiři tarɣa. ◘12:49 [Mt. 10:34-36] 50 Maca ɣari ijj n useɣḍeṣ i zi ɣa ttwassɣeḍṣeɣ, u ttwaḥṣareɣ aṭṭas ař d ɣa ittwakemmeř. ◘12:50 Mt. 20:22; Mk. 10:38. 51 Ma ittɣiř awem belli usiɣ-dd ḥima ad ssiwḍeɣ řehna x temmurt? Lla, ad awem iniɣ, d amezwar abeṭṭu. ◘12:51 Mt. 10:34. 52 Minzi zi řexxu d tsawent ad mmsebḍan xemsa deg ict n taddart, třata ḍidd tnayen u tnayen ḍidd třata. 53 Babas ad immsebḍa x mmis, u mmis x babas, u yemmas x yeǧis, u yeǧis x yemmas, u řallas x tesřit, u tasřit x řallas.” ◘12:53 Mixa 7:6

54 Inna i řɣaci: “Xmi ɣa tẓarem ijj n useynu igeɛɛed-dd zi řɣarb, deɣya ad tinim: ‘Ad yiři wenẓar!’ uca ammu i ɣa imsar! ◘12:54 [Mt. 16:2-3] 55 Xmi ɣa tẓarem asemmiḍ n ljanub ittsuḍ, xenni ad tinim: ‘Ad yiři řeḥmu!’, uca ammu i ɣa imsar. 56 A imnafqen, aqa tessnem ad tmeyyzem udem n temmurt d ujenna. Ma zzman-a mammec war tzemmaren ad t tmeyyzem?”

57 “Mayemmi war tḥekkmem s yixef nwem min iǧan d ṣṣaḥ? ◘12:57 [Mt. 5:25-26] 58 Minzi, xmi ɣa traḥed ɣar řḥakem ak-d weɣrim nnec, egg tizemmar am teǧid ɛad akis deg webrid maḥend ad zzayes tᵉttwafekked, ḥima war cek ittjarri ɣar řqaḍi uca řqaḍi ad cek isellem i wemxazni, xenni ad cek inḍar umxazni di řeḥbes. 59 Ad ac iniɣ, cek war dd ssenni tᵉtteffɣed ař ɣa txeǧṣed aṣuldi aneggaru!”