1 “Xenni ad tiři Tgeldit n ijenwan amecnaw ɛecra n teɛzariyyin iwyent řefnarat nsent, ffɣent, ḥima ad mmeřqent ak-d wesři d tesřit. 2 Xemsa zzaysent d timiɣisin u xemsa d tifɣař. 3 Tinni iǧan d tifɣař ksint řefnarat nsent, maca war iwyint ca zzect. 4 Timiɣisin iwyent-i-dd zzect di tziyyatin nsent ak-d řefnarat nsent. 5 Řami iɛḍeř umuřay, bdant ttnudument marra uca ṭṭṣent.

6 Di řwesṭ n ǧiřet tuɣa din tɣuyyit: ‘Xzarem, aqa amuřay yusa-dd, ffɣem-dd, ad t teřqam!’ 7 Xenni kkarent teɛzariyyin nni, ssewjdent-i-dd řefnarat nsent. 8 Tifɣař nnant i tmiɣisin: ‘Wcent aneɣ zi zzect nkent minzi řefnarat nneɣ xesyent.’ 9 Arrint-i-dd xasent tmiɣisin, nnant: ‘Ɛemmarṣ, war d aneɣ ittqeddi i neccin d kennint. Ruḥent ɣar isebbaben, maḥend ad tesɣent i yixef nkent.’ 10 Řami ruḥent nitenti ḥima ad sɣent, yusa-dd umuřay, u tinni tuɣa iwejden udfent akides ɣar taddart n řefraḥet n wurar uca tbelleɛ tewwart. 11 Awarni man aya usint teɛzariyyin nneɣni, qqarent: ‘A siditneɣ, a siditneɣ, arzem aneɣ!’ 12 Netta yarra-dd, inna: ‘S tidett, necc ad akent iniɣ, war kennint ssineɣ.’ 13 S uyenni ḥḍam, minzi kenniw war tessinem ca ass uřa d tasaɛɛet.” ◘25:13 Mt. 24:42; Mk. 13:33,35.

14 “Minzi tamesřact am yijj n bnadem isafar barra i temmurt nnes, iřaɣa-dd x imsexxaren nnes uca ikellef i-ten x wagřa nnes. ◘25:14 [Lk. 19:11-27] 15 Iwca i yijjen xemsa talint, i wenneɣni tnayen, i wenni wiss třata icten n talint, kuř ijjen ɛlaḥsab tizemmar nnes, řexdenni ikkar, isafar deɣya. ◼25:15 talintat - ict n talint tᵉssekkwi ɛřaḥař 58-80 arḍeř n wureɣ niɣ n nnuqart. 16 Iruḥ wenni iṭṭfen xemsa talint, isebbeb daysen uca yarbeḥ xemsa. 17 Amenni ɛawed wenni iṭṭfen tnayen talint, yarbeḥ tnayen nneɣni. 18 Maca wenni iṭṭfen ict n talint, iruḥ, iɣza di temmurt uca issnuffar tmenyat n nnuqart n bab nnes.

19 Řami teɛdu aṭṭas n řweqt yusa-dd bab n imsexxaren nni uca igga akidsen řeḥsab. 20 Xenni yusa-dd wenni iṭṭfen xemsa talint, yiwi-dd xemsa talint nneɣni, inna: ‘A sidi, tewcid ayi xemsa talint, aqa da, arebḥeɣ xemsa nneɣni ktar.’ 21 Yarra-dd xas bab nnes, inna: ‘Mliḥ i teggid, a amsexxar aṣebḥan d amtiqqi. Tuɣa cek d amtiqqi x drus, ad ac ggeɣ x waṭṭas, adef-dd ɣar řefraḥet n sidi nnec.’ 22 Xenni yusa-dd ɛawed wenni iṭṭfen tnayen talint, inna: ‘A sidi, tewcid ayi tnayen talint, aqa arebḥeɣ tnayen nneɣni ktar.’ 23 Inna as sidi nnes: ‘Mliḥ i teggid, a amsexxar aṣebḥan d amtiqqi. Tuɣa cek d amtiqqi x drus, ad ac ggeɣ x waṭṭas, adef-dd ɣar řefraḥet n sidi nekk.’

24 Maca wenni iṭṭfen ict n talint, yusa-dd ɛawed, inna: ‘A sidi, ssneɣ aqa cek d bnadem tqesḥed, tmejjared mani war tzarrɛed, tyarrwed mani war tᵉssarwated. 25 S uyenni ggʷedeɣ uca ruḥeɣ, ssnuffareɣ talint nnec di temmurt. Aɣac tenni nnec.’ 26 Yarra-dd sidi nnes, inna as: ‘A amsexxar aɛeffan ameɛguz, aqa tessned belli aqa mjareɣ mani war zarɛeɣ u yarweɣ mani war ssarweteɣ. 27 Xenni mři tiwyed nnuqart inu ɣar řbanku, xenni necc, xmi dd ɣa yaseɣ, ad ttareɣ min iǧan inu s arriba. 28 S uya kksem as talint nni, ewc i-tt i wenni ɣar iǧa ɛecra talint!’ 29 Minzi i kuř ijjen wenni ɣar iǧa ad as immewc uca ad ɣares yiři s waṭṭas, maca wenni war ɣar iǧi, uřa d min ɣares ad as ittwakkes. ◘25:29 Mt. 13:12; Mk. 4:25; Lk. 8:18; 19:26. 30 Nḍarem amsexxar ibeṭṭřen ɣar barra deg uneggar n taǧest mani ɣa iřin imeṭṭawen d uɣezzi n teɣmas.” ◘25:30 Mt. 8:12; 13:42; 22:13; 24:51; Lk. 13:28.

31 “Xmi dd ɣa yas Mmis n bnadem deg uɛuǧi nnes u marra lmalakat nnes iqeddsen akides, xenni ad iqqim x řɛarc n uɛuǧi nnes. ◘25:31 Mt. 16:27; 26:64; Mk. 14:62; Lk. 21:27; Řex. 1:11; 1 Ts. 4:16; 2 Ts. 1:10; Asa. 1:7. 32 Ad ssmunen marra řegnus qibač nnes uca Netta ad ten imssebḍa am mammec ameksaw issbeṭṭa iḥuřiyyen x iɣayḍen. ◘25:32 Ḥiz. 34:17, 20; Mt. 13:49. 33 Netta ad igg iḥuřiyyen x ufusi nnes, maca iɣayḍen x uzeřmaḍ nnes.

34 Řexdenni ad ini Ujeǧid i yinni x ufusi nnes: ‘Asem-dd, a kenniw inni ittwabarken zi Baba, wartem Tageldit i d awem dd-iwejden zeg wami tᵉttwagg ddunect. ◘25:34 Mt. 20:23; Mk. 10:40. 35 Minzi tuɣa dayi řaẓ uca kenniw tesseccem ayi. Tuɣa ffudeɣ, tewcim ayi ad sweɣ. Tuɣa ayi d abarrani, kenniw tesszedɣem ayi, ◘25:35 Ica. 58:7; Ḥiz. 18:7; Ɛbr. 13:2. 36 tuɣa ayi d aɛaryan, kenniw tessyarḍem ayi, tuɣa heřceɣ, kenniw tessijem-dd xafi, tuɣa ayi di řeḥbes, kenniw tusim-dd ɣari.’ ◘25:36 Ica. 58:7; 2 Tim. 1:16; Yaɛ. 2:15, 16.

37 Xenni ad xas dd-arren imseggaden, qqaren: ‘A Siditneɣ, meřmi Cek neẓra tǧuẓed uca nessecc i Cek, niɣ meřmi Cek neẓra tᵉffuded uca newc ac ad teswed? 38 Meřmi Cek neẓra d abarrani uca nessezdeɣ i Cek, niɣ d aɛaryan uca nessyarḍ i Cek? 39 Meřmi Cek neẓra theřced niɣ di řeḥbes uca nusa-dd ɣarek?’

40 Ad dd-yarr ujeǧid, ad asen yini: ‘S tidett, Necc ad awem iniɣ, min i teggim i yijjen zeg wawmaten imeẓyanen inu, i Necc umi t teggim.’ ◘25:40 Awřn. 19:17; Mt. 10:42; Mk. 9:41; Yḥ. 13:20; 2 Kur. 9:6.

41 Řexdenni ad yini i yinni iǧan x uzeřmaḍ nnes: ‘Beɛɛdem xafi, a kenniw inni ittwaneɛřen, ɣar tmessi n řebda i iwejden i ibřis d lmalakat nnes. ◘25:41 Izhd. 6:9; Ica. 30:33; Mt. 7:23; Lk. 13:25, 27; Asa. 19:20. 42 Minzi tuɣa dayi řaẓ war d ayi tesseccem, ffudeɣ war d ayi tewcim ad sweɣ. 43 tuɣa ayi d abarrani, kenniw war d ayi tesszedɣem, tuɣa ayi d aɛaryan, war d ayi tessyarḍem, heřceɣ u ttwaḥebseɣ war xafi dd-tessijem ca.’

44 Řexdenni uřa d nitni ad xas dd-arren, ad inin: ‘A Siditneɣ, meřmi Cek neẓra teǧuẓed niɣ tᵉffuded niɣ d abarrani niɣ d aɛaryan niɣ theřced niɣ di řeḥbes, xenni neccin war xak nsexxar ca?’ 45 Xenni ad xasen dd-yarr, ad yini: ‘S tidett, Necc ad awem iniɣ: Min war teggim i yijjen zeg imeẓyanen inu, i Necc umi war t teggim ɛawed.’ ◘25:45 Awřn. 14:31; 17:5; Zak. 2:12. 46 Ad raḥen nitni ɣar řeɛdab ittduman, maca imseggaden ɣar Tudart ittduman.” ◘25:46 Dan. 12:2; Yḥ. 5:29.