1 Bulus, rrasul n Yasuɛ Lmasiḥ ɛlaḥsab řxaḍar n AREBBI, ɛlaḥsab lwaɛd n Tudart i din iǧan di Yasuɛ Lmasiḥ. ◼1:1 rrasul - niɣ ‘amazan’.

2 I Timutiyu, mmi iɛizzen: arḍa d arreḥmet d řehna zi AREBBI, Babatneɣ, u zi Yasuɛ Lmasiḥ, Siditneɣ. ◘1:2 Gal. 1:3; 1 Tim. 1:2; 1 Bṭ. 1:2.

3 Necc ttqadiɣ AREBBI wenni umi ɛebdeɣ am řejdud inu s tnefsect tezdeg, am ttidareɣ cek břa qeṭṭu di tẓaǧitin inu ass d ǧiřet. ◘1:3 Řex. 22:3; Rum. 1:9; 1 Ts. 1:2; 3:10. 4 Weḥḥceɣ ad cek ẓareɣ, xmi ttfekkareɣ deg imeṭṭawen nnec u ttwaccureɣ s řefraḥet, 5 umi ttidareɣ di l’iman nnec břa nnifaq, l’iman nni tuɣa izeddɣen amezwar di ḥennac Luwis u deg yemmac Uniki, uca, aqa ssneɣ nican belli izdeɣ dayek ɛawed. 6 S uyenni ssɛeqřeɣ cek ad tessekkared tawhibt n AREBBI tenni dayek s webrid n wesrusi n ifassen inu xak. ◘1:6 Řex. 6:6; 8:17; 13:3; 19:6, 7; 1 Tim. 4:14; 5:22.

7 Minzi AREBBI war d aneɣ iwci arruḥ n řɛurret, maca arruḥ n jjehd d tayri d utebbet. ◘1:7 Rum. 8:15. 8 S uya war ttseḍḥi ca ḥima ad tewced cchadet x Siditneɣ, u war ttseḍḥi zzayi necc, wenni d ameḥbus nnes, maca ksim marra řɣar di ṭṭweɛ n L’Injil s jjehd n AREBBI, ◘1:8 Řex. 21:33; Rum.1:16; Afa. 3:1; 4:1; Kul. 4:18; Flmn. 1, 9, 13. 9 wenni aqa iwca aneɣ Tudart uca iřaɣa aneɣ-dd s třaɣit iqeddsen, war iǧi ɛlaḥsab řexdayem nneɣ, maca ɛlaḥsab řxaḍar nnes d arḍa nni i d aneɣ immewcen di Yasuɛ Lmasiḥ qbeř řweqt n zzmanat. ◘1:9 Afa. 1:3; Tit. 3:4, 5, 6. 10 Aqa arḍa-ya ittwasseḍhar řexxu s uxecci n wenni d aneɣ itticen Tudart, Yasuɛ Lmasiḥ, wenni tuɣa ibeḍřen řmewt uca isseḍhar Tudart war ifennin s L’Injil. ◘1:10 Ica. 25:8; Rum. 16:25; Afa. 1:9; 3:9; Kul. 1:26; Tit. 1:2; Ɛbr. 2:14; 1 Bṭ. 1:20. 11 Zzayes ttwassgeɛɛdeɣ necc d ambarreḥ d rrasul d umseřmad n řegnus. ◘1:11 Řex. 9:15; 13:2; 22:21; Gal. 1:15; 2:8; Afa. 3:8; 1 Tim. 2:7. 12 X ssibbet-a ɛawed ksiɣ armeḥ u war ttseḍḥiɣ ca, minzi ssneɣ man wen i zi ttamneɣ uca aqa ttwassqenɛeɣ belli Netta aqa ɣares ṣṣulṭa, maḥend ad iḥḍa i necc aḍman inu ař ass nni. 13 Ejj ad ɣarek iqqim lmital n wawařen iṣeḥḥen i zzayi tesřid s l’iman d tayri i iǧan di Yasuɛ Lmasiḥ. ◘1:13 2 Tim. 3:14. 14 Ḥḍa aḍman aṣebḥan i d ac ittwawekkřen s Arruḥ Iqeddsen nni dayneɣ izeddɣen.

15 Aqa tessned belli marra inni iǧan di Asiya jjin ayi, zzaysen Fixilus d Hirmuxinis. ◘1:15 Řex. 19:10. 16 Ad yarzef Siditneɣ s arreḥmet di taddart n Unisifurus, minzi tuɣa issareyyeḥ ayi aṭṭas n twařawin uca war iseḍḥi ca zi ssnaseř n tmeḥbast inu. ◘1:16 2 Tim. 4:19. 17 Maɣar řami dd-yusa ɣar Ruma, tuɣa yarezzu xafi s cḍaret aṭṭas uca yufa ayi. 18 Ad as iwc Siditneɣ, aqa ad yaf arreḥmet ɣar Siditneɣ deg wass nni. Uca mecḥař isexxar ayi di Afasus, cek tessned ktar.