Adlis Iqeddsen Ifasusiyyen 4

Ict n Arrimet d ijj n Arruḥ s Lmasiḥ

1 Am umeḥbus di Siditneɣ, ziyyareɣ xawem, ḥima ad tuyurem am mammec dd-tusa ak-d třaɣit i zi tᵉttwařaɣam, ◘ 2 s marra awaḍeɛ n buḥbeř, s temhint u s ttasiɛ n řxaḍar, aqa ad tqebbřem ijj wenneɣni di tayri, ◘ 3 ad tecḍarem maḥend ad teqqimem tmunem d ijj di Arruḥ s tseɣwin n řehna, 4 maḥend ad tiřim deg ict n Arrimet u deg ijj n Arruḥ am mammec umi tᵉttwařaɣam deg usitem n třaɣit nwem d ijjen. 5 Maɣar SIDI d Ijjen, d l’iman d ijjen uřa d aseɣḍeṣ d ijjen, ◘ 6 u AREBBI d Ijjen, Babatneɣ marra u x marra u s marra u dayneɣ marra. 7 Maca arḍa immewc aneɣ marra idneɣ ɛlaḥsab řmijař n min d aneɣ iwca Lmasiḥ. ◘ 8 S uyenni qqaren:

“Igeɛɛed ɣar řuɛřa,

yiwyi akides imeḥbas di tmeḥbast,

iwca tirzifin i iwdan.” ◘

9 Maca min iɛna ɛawed wawař-a, aqa Netta igeɛɛed sennej, mɣir aqa Netta ɣar umezwar ɛawed tuɣa ihwa-dd ɣar ṭṭrufa n temmurt n wadday qaɛ?! ◘ 10 Wenni tuɣa dd-ihwan, Netta ɛawed d Wenni tuɣa igeɛɛden sennej i marra ijenwan, ḥima ad issiweḍ marra ɣar řekmařet. ◘

11 Netta yarra ca d rrusul, ca d inabiyyen, ca d imbeccaren, ca d imeksawen u ca d imseřmaden, ◘ 12 ḥima ad zzaysen ttwakemmřen imqeddasen i řxedmet n tsexxart, i řebni n Arrimet n Lmasiḥ, ◘ 13 ař i ɣa naweḍ marra ɣar umuni d ijjen di l’iman u di tussna n Mmis n AREBBI, ad niři d ijj n bnadem ikmeř s řeɛbar n ṣṣifet tmun n Lmasiḥ. 14 Ittxeṣṣa war nettiři am iḥenjiren inni ittwaɛarran zi ṭṭarf ɣar wenneɣni uca dewřen iggʷjen zi kuř asemmiḍ n useřmed d aḥraymi zeg iwdan nni yarezzun ad aneɣ ɣarren s teḥraymect nsen, ◘ 15 maca ittxeṣṣa ad nbedd nican di tayri nneɣ, maḥend marra min ɣarneɣ iǧan ad igma di Lmasiḥ wenni d Azeǧif. ◘ 16 Zzayes tennejru u tᵉttwassmun Arrimet marra s marra řemfaṣeř, ɛlaḥsab min immewcen s řeɛbar i mkuř aɣezdis i tyumi n Arrimet, ař ɣa ittwakemmeř řebni nnes di tayri. ◘

Bnadem n jdid

17 Maca necc qqareɣ u cehhdeɣ man aya di SIDI, ḥima war teggurem ɛad am mammec uyuren řegnus inneɣni, inni iddaren di řbaṭeř n ixarriṣen nsen, ◘ 18 barcnen di řeɛqeř nsen u aggʷejen x Tudart n AREBBI, minzi war daysen bu tussna, u x ssibbet n tqubbanect i daysen iǧan, u x ssibbet n řeqsaḥet n wuř nsen. ◘ 19 Nitni qeḍɛen ixef nsen zeg usitem, sellmen ixef nsen i ufucceḥ u i weḍfar n marra markat n řexmej ɛlaḥṣab meẓri nsen. 20 Maca war iǧi ammu i tessnem Lmasiḥ, 21 řami zeɛma kenniw tuɣa tesřam ɣares nican uca třemdem zzayes ɛlaḥsab tidett i iǧan di Yasuɛ. 22 Maca s řɛeks ittxeṣṣa kenniw ad tenḍarem ticři nwem n zic, ad tejjem bnadem aqdim i ittwassexsaren s nnecwat iɣeccen. ◘ 23 Ttwaɛedřem zi jdid s nneyyet n řeɛqeř nwem. 24 Arḍem bnadem n jdid i dd-ittwaxeřqen di AREBBI di tsegda u di taqeddast d tidett. ◘

25 S uyenni jjem ixarriqen, siwřem tidett kuř ijj ak-d jjar nnes, minzi neccin d ixfawen ijjen i wenneɣni. ◘ 26 Xeyyqem, maca war tteggem ca ddnub, war ttejji ad teɣri tfuct x ijj n uduqqez n uxeyyeq nwem. ◘ 27 War tticem ca amcan i ibřis. ◘ 28 War tejji wenni ittacaren ad yacar ɛad, maca ḥsen ad yarber s ifassen nnes maḥend ad issuffeɣ ict d řḥajjet d taṣebḥant, maḥend ad tt iwc i yinni iḥdajen. ◘ 29 War dd-ittekk ca wawař n wecrah zeg uqemmum nwem, maca min iṣebḥen u min ineffɛen i řebni, ḥima ad tessiwḍem arḍa i yinni i ɣa isřan. ◘ 30 War ttessffugmem ca Arruḥ Iqeddsen n AREBBI i zi tᵉttwacemmɛem ař ass n usenjem. ◘ 31 Jjem ad zzaywem tᵉttwakkes marra tarzugi d tefqeḥt d weɣḍab d uṣeddeɛ d uceqqef ak-d marra tuɛeffna i dd-ittasen ak-d man aya. ◘ 32 Iřim tḍarfem u ggem řeḥnunect deg wayawa. Samḥem i wayawya am AREBBI ɛawed aqa iɣfar aneɣ di Lmasiḥ. ◘

◘4:1 4:1 Amz. 17:1; 1 Kur. 7:20; Fil. 1:27; Kul. 1:10; 1 Ts. 2:12.

◘4:2 4:2 Kul. 1:11; 3:12; 1 Ts. 5:14.

◘4:5 4:5 Aɛwd. 4:39; Mal. 2:10; 1 Kur. 8:4, 6.

◘4:7 4:7 Rum. 12:6; 1 Kur. 12:11; 2 Kur. 10:13; 1 Bṭ. 4:10.

◘4:8 4:8 Izhd. 68:19.

◘4:9 4:9 Yḥ. 3:13; 6:62; 1 Bṭ. 3:18-19

◘4:10 4:10 Ɛbr. 1:1-3

◘4:11 4:11 1 Kur. 12:28.

◘4:12 4:12 Rum. 12:5; 1 Kur. 12:27; Afa. 1:23; 5:23; Kul. 1:24.

◘4:14 4:14 Mt. 11:7; 1 Kur. 14:2.

◘4:15 4:15 Afa. 5:23; Kul. 1:18.

◘4:16 4:16 Rum. 12:5; 1 Kur. 12:27; Afa. 2:21.