1 Yusa-dd ɣari wawař n SIDI n řɛeskarat, inna:

2 “Ammu i iqqar SIDI n řɛeskarat: ‘S wasam d ameqqran usmeɣ zi Ṣihyun, s wesɛar tameqqrant usmeɣ di ṭṭweɛ nnes.’◘8:2 Zak. 1:14 3 Ammu i iqqar SIDI: ‘Necc ɛeqbeɣ-dd ɣar Ṣihyun u ad zedɣeɣ di řwesṭ n Urcalim uca Urcalim ad as řaɣan ‘Tandint n tidett!’, u adrar n SIDI n řɛeskarat ad as inin ‘Adrar Iqeddsen!’ ◘8:3 Asa. 14:1-5

4 Ammu i iqqar SIDI n řɛeskarat: ‘Ad iřin ɛawed iwessura d twessura deg wazzayen n Urcalim. Kuř aryaz ad ɣares tiři teɣɣarct nnes deg ufus nnes zi ssibbet n waṭṭas n wussan i ɣa iddar. 5 Azzayen n tendint ad dewřen ccuren s iḥenjiren d tḥenjirin i ittiraren deg wazzayen nnes.’

6 Ammu i iqqar SIDI n řɛeskarat: ‘Maɣar d řeɛjeb qaɛ di tiṭṭawin n min iqqimen n řgens-a deg wussan nni, ma ad yiři aya uřa i Necc d řeɛjeb qaɛ?’, iqqar SIDI n řɛeskarat.

7 Ammu i iqqar SIDI n řɛeskarat: ‘Xzarem, Necc ad ssnejmeɣ řgens inu zi temmurt n wenqar n tfuct u zi temmurt n uɣeǧi n tfuct, 8 u Necc ad ten awyeɣ din ḥima ad zedɣen di Urcalim. Nitni ad iřin d řgens i Necc u Necc ad iřiɣ d AREBBI i nitni, di tidett u di tsegda.’

9 Ammu i iqqar SIDI n řɛeskarat: ‘Meḥḍem ifassen nwem, kenniw inni isřin deg wussan-a awařen-a zeg uqemmum n inabiyyen nni din iǧan deg wass nni di ittwassars dsas n Taddart n SIDI n řɛeskarat, maḥend ad xas tᵉttwabna Zzawect Tameqqrant zi jdid. 10 Maɣar qbeř i wussan nni war iqqim walu zi řmunet n bnadem u ict n řebhimet war dd-tᵉttawi walu u wenni dd-iffɣen d wenni dd-idewřen, war yiwi řaman zi ssibbet n řeɛdu, maɣar Necc ssekkareɣ kuř ijj x jjar nnes. ◼8:10 kuř ijj x jjar nnes - s Tɛibranit ‘aryaz x jjar nnes’. 11 Řexxu maca Necc war ttiřiɣ i min iqqimen n řgens-a am wussan imezwura, iqqar SIDI n řɛeskarat. 12 Maɣar zzariɛet n řehna, tazayart, ad tewc řɣiǧet nnes u tammurt ad tewc ṣṣabet nnes u ajenna ad iwc nnda nnes u Necc ad wceɣ marra aya d tasɣart i min iqqimen n řgens-a. 13 Ad imsar, aqa am mammec tuɣa kenniw d nneɛřet jar regnus, kenniw, a taddart n Yahuda d taddart n Israil, aqa Necc ad kenniw ssnejmeɣ u ad iřiɣ d lbaraka i kenniw. War tteggʷedem, meḥḍem ifassen nwem!’

14 Maɣar ammu i iqqar SIDI n řɛeskarat: ‘Am mammec Necc xarrṣeɣ ad awem ggeɣ řɣar, řami d ayi ssfugmen řejdud nwem, ammu i iqqar SIDI n řɛeskarat, u Necc war ndimeɣ zi man aya, 15 ammu i dd-dewřeɣ Necc řexxu ad xarrṣeɣ deg wussan-a maḥend ad ggeɣ řxar di Urcalim u di taddart n Yahuda. War tteggʷedem ca! 16 Tina d timesřayin i kenniw ittxeṣṣan ad tent teggem: Siwřem tidett kuř ijj ak-d jjar nnes, carrɛem di tewwura nwem s tidett u s yijj n řḥukm iřiqqen. ◘8:16 Afa. 4:25 17 War ttejjim ad ixarreṣ ijj n weryaz di řɣar x jjar nnes u war ttexsem tajaǧit ẓur, maɣar Necc carrheɣ marra aya!’, iqqar SIDI.” ◘8:17 Zak. 5:3, 4; 7:10

18 Yusa-dd ɣari wawař n SIDI n řɛeskarat, inna:

19 “Ammu i iqqar SIDI n řɛeskarat: ‘Aẓummi n uyur wiss arebɛa u aẓummi n uyur wiss xemsa u aẓummi n uyur wiss sebɛa u aẓummi n uyur wiss ɛecra ad dewřen d řefraḥet u d warceq i taddart n Yahuda. Ad iřin d řeɛyudat cnan. Xsem tidett d řehna!’

20 Ammu i iqqar SIDI n řɛeskarat: ‘Aqa řegnus uřa d imezdaɣ n waṭṭas n tneddam ad dd-asen ɛad danita! ◘8:20 Ica. 2:2, Irm. 16:19, Mixa 4:1, Zak. 8:2 21 Imezdaɣ n ict n tendint ad raḥen ɣar imezdaɣ n ict n tendint nneɣnit, ad inin: Jjem aneɣ ad neṭṭef abrid ḥima ad nettar zzat i wudem n SIDI u ḥima ad narzu SIDI n řɛeskarat. Uřa d necc ad raḥeɣ. 22 Aṭṭas n iyduden d waṭṭas n řegnus ijehden ad dd-asen ḥima ad arzun x wudem n SIDI n řɛeskarat di Urcalim u ḥima ad ttaren arḍa zzat i wudem n SIDI.’

23 Ammu i iqqar SIDI n řɛeskarat: ‘Deg wussan nni ad imsar, aqa ɛecra n yeryazen, zi marra tutlayin n řegnus ad ṭṭfen, wah, ad ṭṭfen abeḥřuř n ijj n weryaz d Uday, ad inin: ‘Neccin ad nraḥ akidwem, maɣar nesřa aqa AREBBI akidwem!’ ”