1 Awař nni iẓra Icaɛya, mmis n Amuṣ, x Yahuda d Urcalim.

2 “Deg uneggar n wussan ad yiři wedrar n Taddart n SIDI ibedd imten x wedrar ameqqran qaɛ n idurar. Netta ad iɛdu marra tiwririn uca ad ɣares dd-azzřen marra řegnus. ◘2:2 Mixa 4:1 3 Aṭṭas n řegnus ad ṭṭfen abrid dinni, ad inin: ‘Asem-dd, ejj aneɣ ad ngeɛɛed ɣar wedrar n SIDI, ɣar Taddart n AREBBI n Yaɛqub, ḥima Netta ad aneɣ isseřmed ibriden nnes u neccin ad nuyur di tebridin nnes!’, maɣar zi Ṣihyun ad dd-teffeɣ Ccariɛa u awař n SIDI zi Urcalim. ◘2:3 Izhd. 110:2 4 Netta ad iḥkem jar ccuɛub u ad iḥakem x waṭṭas n řegnus. Nitni ad ggen řesyuf nsen d dduzan u fřitcat nsen d řemwas i wezbar. War issgeɛɛad ijj n řgens ɛad ssif x ijj n řgens nneɣni u war darriben ɛad i umenɣi. ◘2:4 Yuw. 4:10; Mixa 4:3 5 A taddart n Yaɛqub, araḥ-dd ejj aneɣ ad nuyur di tfawt n SIDI.”

6 “Maɣar Cek tenḍared řgens nnec, taddart n Yaɛqub, minzi nitni ccuren s uqarri zi temmura n ccarq uca ceɣřen ixef nsen s tbezgiwt am řgens n Ifilisṭiniyyen, uca wtin ifassen ak-d tarwa n ibarraniyyen. 7 Tammurt nsen teccur s nnuqart d wureɣ u war din aneggar ɣar txubay nsen. Tammurt nsen teccur s yeysan u war din aneggar ɣar ubarru n ikarruten nsen. 8 Tammurt nsen teccur s l’aṣnam, nitni bendqen zzat i řxedmet n ifassen nsen, i min ggin iḍewḍan nsen. 9 Ammu i ɣa iɣnes bnadem uca ad issehwa kuř ijj n weryaz ixef nnes. War d asen ttsamaḥ!”

10 “Adef ɣar řejruf, nuffar deg ucař zi ssibbet n usnexřiɛ n SIDI u zi ssibbet n řɛezz n lɛaḍama nnes! 11 Tiṭṭawin inefxen n iwdan ad dd-ttwassehwant u acenneɛ n yeryazen ad ihwa. Ad ittwassɛuǧa SIDI waha deg wass nni. ◘2:11 Ica. 5:15

12 Maɣar ass i SIDI ad dd-yas x kuř bu-nnfaxet d umɛeffar u x kuř ijj wenni issɛuǧan ixef nnes, ḥima ad dd-ittwassehwa. ◘2:12 Yuw. 2:10, 31; 3:15; Ica. 13:6-13; 24:23; Am. 8:9; Mt. 24:29; Řex. 2:20; Asa. 6:12-13 13 X marra ticejjura n tengelt yuɛřan d ittwassgeɛɛden n wedrar n Lubnan, x marra ticejjura n řbeǧuḍ n Bacan, 14 x marra idurar iɛeffaren, x marra tiwririn yuɛřan, 15 x kuř lburj yuɛřan, x kuř řḥiḍ n lqelɛa, 16 x marra iɣarruba n Tarcic u x marra řeqcuɛ iɣřan.

17 Nnfaxet n bnadem ad tessehwa u iryazen iɛeffaren ad ttwassehwan. Ad ittwassɛuǧa SIDI waha deg wass nni. 18 L’aṣnam ad ttwabeḍřen marra. 19 Xenni ad dd-adfen deg ifran n řejruf d iḥfrawen n temmurt zi ssibbet n usnexřiɛ n SIDI u zi ssibbet n uɛuǧi n lɛaḍama nnes, xmi Netta ad dd-ikkar ḥima ad issnexřeɛ tammurt. ◘2:19 Asa. 6:15-17

20 Deg wass nni ad inḍar bnadem l’aṣnam nnes n nnuqart d l’aṣnam nnes n wureɣ, inni ggin i yixef nsen ḥima ad asen bendqen, ařami i ɣa yiřin i ijarbuɛen d řweḍwaḍat, 21 maḥend ad dd-adfen di tezziyin n řejruf u deg ifran deg weẓru zi tiggʷudi n SIDI u zi ssibbet n řɛezz n lɛaḍama nnes, xmi dd ɣa ikkar ḥima ad issnexřeɛ tammurt.”

22 “Ḥeyydem x bnadem, wenni deg wenzaren nnes iǧa mɣir nnefs, minzi min iɛna netta qaɛ ad xas neḥseb?”