1 Řewḥiy n Icaɛya, mmis n Amuṣ, nni iẓra x Yahuda d Urcalim, deg wussan n Ɛuzziya, Yutam, Aḥaz d Ḥizqiya, ijeǧiden n Yahuda.

2 “Sřem, a ijenwan, uca sseɣd, a tammurt, minzi SIDI issawař: ‘Necc sseymeɣ iḥenjiren u ssemɣareɣ ten, maca nitni ɣewwɣen xafi. ◘1:2 Aɛwd. 32:1 3 Afunas issen bab nnes d usnus řmedwed n sidi nnes, maca Israil war ɣares bu tussna, řgens inu war dayes teǧi řefhamet. 4 Uct x řgens i ixḍan, řgens i x iǧa ddqeř n řmuɛṣiyyet, zzariɛet n iɛeffanen, tarwa n usnexřiɛ. Nitni jjin SIDI, sseḥqaren Amqeddas n Israil, arrin as-dd s weɛrur. ◘1:4 Izhd. 78:8; Ica. 57:3 5 Mani tᵉttexsem ad tᵉttwawtem ɛad, umi kenniw teqqimem tᵉttɣewwaɣem. Azeǧif marra ihřec, uř marra yuheř aṭṭas. ◘1:5 2 Im. 28:22; Irm. 2:30 6 Zi třeqqa n uḍar ař azeǧif war dayes tᵉttifed min iṣebḥen! Mɣir iyezzimen, ṭṭeɛbayar d iyezzimen yarezmen, war ten hennḍen, war ten ssyarḍen, war ten ssareḍben s zzect. 7 Tammurt nwem texřa, tineddam nwem sscemḍen tent s tmessi, tammurt nwem ṣṣarden tt ibarraniyyen zzat i tiṭṭawin nwem, aqa-tt d řxirbet axmi ssenqeřben tt ibarraniyyen. ◘1:7 Aɛwd. 28:51, 52; Ica. 5:5 8 Yeǧis n Ṣihyun teqqim ɣar ḍeffar am yict n tɛiccut deg umarjeɛ n uḍiř, am texxant n uɛessas deg iyyar n řexyar, am tendint ittwaḥṣaren. 9 Mři SIDI n řɛeskarat war d aneɣ ijji drus min yarewřen, iři nedweř am Sadum, iři negga am Ɛamurra.’ ” ◘1:9 Amz. 19:24; Ica. 17:6; 24:6; 30:17; Rum. 9:29

10 “Sřem i wawař n SIDI, a řḥukkam n Sadum! Wcem amezzuɣ i Ccariɛa n AREBBI, a řgens n Ɛamurra! 11 Min ɣa ggeɣ s tɣarṣi nwem, iqqar SIDI. Necc jjiwneɣ zi tɣarṣa n wecmaḍ n icarriyyen u zi tadunt n řmař iṣeḥḥen. Idammen n ifunasen imeẓyanen d yezmaren d iɣayḍen war d ayi tteɛjiben. ◘1:11 Izhd. 50:8, 9; Awřn. 15:8; 21:27; Ica. 66:3; Irm. 6:20; Ɛam. 5:22 12 Xmi dd-tᵉttasem ḥima ad tbanem zzat i wudem inu, wi kenniw iɛarḍen i uya, maḥend ad tɛefsem x řemraḥat inu? 13 War d ayi dd-tawyem ɛad tawhibt ibeḍřen. Řebxur ɣari d nnɛi. Ussan n iyuren n jdid d wussan n ssebt d uřaɣi i tmesmunin iqeddsen war zemmareɣ ad ḥemřeɣ marra aya, aqa-t d řmuɛṣiyyet, ɛad uřa d amuni ifarzen. 14 Řeɛmar inu icarreh ussan n uyur n jdid nwem d řeɛyudat nwem ittwaggen. Aqa aten dewřen ɣari d řeḥmeř, Necc uḥřeɣ ad ten arbuɣ. 15 Xmi tᵉttsarraḥem ifassen nwem, ttřeḥḥfeɣ i tiṭṭawin inu zzaywem. Ɛad mařa kenniw tarnim di tẓaǧit, Necc war tt ttesřiɣ, maɣar ifassen nwem ɛemmaren s idammen.◘1:15 Awřn. 1:28 16 Sirdem, sizdegem ixef nwem, ssiggʷejem tuɛeffna n tmegga nwem zi zzat n tiṭṭawin inu. Sbeddem zi řɣar i tᵉtteggem. ◘1:16 Izhd. 34:15; 37:27; Ɛam. 5:15; Rum. 12:9 17 Řemdem ad teggem min iṣebḥen, arzum x řḥeqq, wcem afus i wenni iḥsaren, ggem tasɣart i uyujiř, wtem x tajjač.”

18 “Asettiw-dd u ejj aneɣ ad nᵉttemḥakem ak-d wayawya!, iqqar SIDI. Waxxa ddnub nnec d izeggʷaɣen am uzeggʷaɣ iḥedqen, ad dewřen d icemřaren am wedfeř, waxxa d izeggʷaɣen am uzeggʷaɣ yuǧɣen, ad dewřen d icemřařen am tḍuft. ◘1:18 Izhd. 51:9 19 Mařa kenniw tɛewwřem, u ad tesřem, xenni ad teccem min iṣebḥen n temmurt, 20 maca mařa kenniw tugim uca ad tɣewwɣem, ad kenniw yecc ssif, maɣar aqemmum n SIDI aqa issiweř!”

21 “Mammec tedweř tendint

nni dayes řaman

d tamɣart n farq-ccɣeř!

Nettat tuɣa teccur s řḥeqq,

tasegda tuɣa tᵉttnusa dayes,

maca řexxu iqettařen.

22 Nnuqart nnem tedweř d kuffu,

binu nnem ṣṣuren t ak-d waman. ◘1:22 Ḥiz. 22:18, 19; Ḥuc. 4:18

23 Řḥukkam nnem ttɣewwɣen,

aqa ggin ixewwanen d imeddukkař nsen,

marra ttexsen tirzifin

uca arezzun x arrecwet.

Nitni war ttiɣen i uyujiř tasɣart nnes,

ddeɛwet n tijjař war ten tᵉttikkwiḍ.” ◘1:23 Irm. 5:28; Zak. 7:10

24 “S uya iqqar Sidi, SIDI n řɛeskarat, Amzemmar n Israil: ‘Uct xawem! Necc ad ssfewwjeɣ ixef inu s iɣrimen inu, Necc ad xeřfeɣ ixef inu zi řɛedyan inu. 25 Necc ad wteɣ afus inu xawem, ad kenniw ṣeffiɣ ak-d llixiyya uca marra řexfif nnem ad t weddareɣ. ◘1:25 Irm. 6:29; Mal. 3:3 26 Necc ad am wceɣ ɛawed řquḍat nnem am ɣar umezwaru, d ayt n ccwar nnem am ɣar umezwaru. Awarni aya ad am řaɣan: ‘Tandint n tsegda!’ d ‘Tendint dayes řaman!’ 27 Ṣihyun ad tᵉttwassenjem s řḥeqq d yinni zzayes ittuben ad ttwassenjmen s tsegda, 28 maca imɣewwɣen d imednab ad ttwarẓen jmiɛ, uca inni i ɣa iḥeyyden x SIDI, ad ttwaqḍan. ◘1:28 Ayub 31:3; Izhd. 1:6; 5:6; 73:27; 92:10; 104:35 29 Nitni ad seḍḥan zi ssibbet n tcejjura n l’aṣnam nni di temmeẓrem uca kenniw ad tseḍḥam zi ssibbet n iḥwicen nni tixḍarem kenniw. 30 Maɣar kenniw ad tiřim am tcejjart n yigg i zi afar nnes isřaw, u am weḥwic i war ɣar ǧin waman. 31 Ad idweř wenni ijehden d ijj n ufiřu n tiffest u řxedmet nnes d ict n tfeṭṭut, ad arɣen s tnayen idsen munen uca war din iǧi uřa d ijj wi ɣa issxesyen.’ ”