1 I umeqqran n imeɣnajen. Ak-d temja. Azehhed n Dawud.

2 A SIDI, seř i min ɣa iniɣ,

fehmet i unixses inu.

3 Ḥekkar i tmijja n tutra inu,

a Ajeǧid inu d AREBBI inu,

aqa i Cek umi ttẓaǧiɣ.

4 Ɣar tuffut, a SIDI, tesřid Cek i tmijja inu,

ɣar tuffut nnqeřbeɣ-dd ɣarek,

uca qqimeɣ ttrajiɣ Cek.

5 Cek war teǧid ca d Arebbi

nni ittexsen tuɛeffna,

bnadem aɛeffan war ɣarek ittif aɣimi.

6 Ibuḥařiyyen war ttɣimin ttbeddan

zzat i tiṭṭawin nnec,

Cek tcarrhed marra inni itteggen řɣar.

7 Ad thellked ayt n bu-ixarriqen,

SIDI ittɛiffa aryaz n idammen d řɣecc.

8 Maca s řemɣaret n tmexsiwt nnec icewwaren

ad adfeɣ ɣar Taddart nnec,

ad sejdeɣ ɣar Zzawect nnec Tameqqrant

s tiggʷudi zzayek.

9 A SIDI, suyur ayi x webrid n tsegda nnec,

di ṭṭweɛ n yinni i d ayi iḥeṣṣaren,

seggem abrid nnec zzat i wudem inu.

10 Minzi deg uqemmum nsen war din bu řaman,

jjuf nsen d axeyyeb,

tmijja nsen d anḍeř yarezmen,

arebbun txancet s yiřes nsen. ◘5:10 Izhd. 34:17; 94:20; Rum. 3:13

11 Xřef zzaysen, a AREBBI,

ejj i-ten ad wḍan

s řecwar n yixef nsen,

aẓẓeř xasen di ssibbet

n waṭṭas n ixeṭṭan nsen,

minzi nitni ɣewwɣen xak.

12 Marra inni ɣarek yarekkwařen

ad farḥen,

ad sřiweřwen i řebda.

Cek tfaryed xasen!

Aqa inni ittexsen Isem nnec

ad negzen s řefraḥet i ɣarsen dayek.

13 Minzi Cek, a SIDI, ad tbarked amseggad,

ad as tquwwared s uḥinni

am s tseddart n useřqi tameqqrant.