1 I xenni, man řefḍeř ɣar Wudayen, niɣ man tizi n wextan? 2 Aṭṭas x kuř iɣezdisen! Xenni ɣar umezwar mmewcen asen ‬wawařen n‮ ‬AREBBI. ◘3:2 Izhd. 147:19; Rum. 9:4. 3 Maɣar mařa tuɣa ca zzaysen war uminen ca, ma xenni beḍřen nitni řaman n AREBBI zi ssibbet n břa l’iman nsen? ◘3:3 Řxř. 23:19; Rum. 9:6; 2 Tim. 2:13. 4 Ɛemmarṣ! Maɣar AREBBI d tidett uca kuř bnadem d bu-ixarriqen, am mammec tura:

“Cek ad tbaned d Amsegged s wawařen nnec,

ad tiřid tkemmřed di řeṣfayet

xmi Cek i ɣa ḥasben.” ◘3:4 Izhd. 51:6; 116:11; Yḥ. 3:33.

5 Maca mařa min war isseggden dayneɣ aqa issbeyyen tasegda n AREBBI, min ɣa nini ɛad xenni? Ma AREBBI war ɣares bu řḥeqq umi xaneɣ igga aɣḍab nnes? Necc ssawařeɣ am yijj n bnadem d amednub. 6 War xas nessiwiř! Mammec i ɣa iḥaseb AREBBI ddunect řexdenni? 7 Mammec mařa tfeyyeḍ tidett n AREBBI ɣar uɛuǧi nnes s uxarriq inu, mayemmi ɛad i ɣa ttwaḥasbeɣ am umednub? 8 War iɛeddeř aqa tamesřact teǧa am mammec qqaren inni dayneɣ iceqqfen belli neccin neqqar: “Ejj aneɣ ad negg tuɛeffna, ḥima ad zzayes dd-yekk min icnan!”?, inni aqa řḥukm xasen ad ittwaxemmeř ař ccreɛ iseggden.

9 I xenni mammec? Ma neccin ḥsen? Qbeř aqa nufa aqa Udayen d Iramiyyen marra sadu ddenb, ◘3:9 Gal. 3:22. 10 am mammec tura:

“Uřa d ijj war iǧi d amsegged, ◘3:10 Izhd. 14:3; 53:4.

11 uřa d ijj war ifehhem,

uřa d ijj war yarezzu x AREBBI.

12 Marra ffɣen zeg webrid, mmenḍaren,

uřa d ijj war ittegg tcuni, uřa d ijj. ◘3:12 Izhd. 14:1-3; 53:2-4; Amb. 7:20

13 Tmijjawin nsen d imeḍřan yarezmen,

s iřsawen nsen cemmten,

ssem n ifiɣran sadu iyencicen nsen, ◘3:13 Izhd. 5:10; 140:4.

14 aqemmum nsen iccur s nneɛřet d tarzugi, ◘3:14 Izhd. 10:7.

15 s iḍaren nsen ttqeǧiqen

ɣar usizzeř n idammen, ◘3:15 Awřn. 1:16; Ica. 59:7.

16 areyyeb d tamara deg ibriden nsen,

17 abrid n řehna war t ssinen ca, ◘3:17 Ica. 59:7, 8

18 tiggʷudi n AREBBI

war teǧi qibač i tiṭṭawin nsen.”◘3:18 Izhd. 36:2.

19 Neccin nessen belli marra min teqqar Ccariɛa, aqa teqqar i-t i yinni iǧan sadu Ccariɛa, ḥima ad ittwaqqen kuř aqemmum uca ad tedweř marra ddunect dayes řɛib zzat i AREBBI, 20 maɣar zi řexdayem n Ccariɛa war ittwasegged uřa d ijj n bnadem qibač nnes, minzi s Ccariɛa aqa ttwassnen ddnub. ◘3:20 Rum. 7:7; Gal. 2:16; Ɛbr. 7:18.

21 Maca řexxu aqa teḍhar-dd tsegda n AREBBI břa Ccariɛa, tcehhed xas Ccariɛa d Inabiyyen, ◘3:21 Rum. 1:17; Fil. 3:9. 22 aqa tasegda n AREBBI zi l’iman n Yasuɛ Lmasiḥ ɣar marra u x marra inni zzayes yumnen, minzi war din bu řfarz. 23 Minzi marra xḍan uca ineqṣ i-ten uɛuǧi n AREBBI, 24 uca ttwaseggden baṭeř s arḍa nnes s ufekki i iǧan di Yasuɛ Lmasiḥ. ◘3:24 Ica. 53:5. 25 AREBBI igga i-t d aṣřaḥ qbeř s l’iman deg Idammen nnes, di ssibbet n ddnub nneɣ nni tuɣa negga zic di řmijař n řweqt i d aneɣ iwca AREBBI s ttasiɛ n řxaḍar nnes, ḥima ad isscen tasegda nnes di řweqt-a, ◘3:25 Uf. 25:17; 2 Kur. 5:19; Kul. 1:20; Ɛbr. 4:16; 1 Yḥ. 4:10. 26 maḥend di tsegda ad yarr d amseggad wi iǧan di l’iman n Siditneɣ Yasuɛ Lmasiḥ.

27 Mani iǧa xenni usemɣar? War xas nessiwiř. S man Ccariɛa? S man řexdayem? Ɛemmarṣ, maca s Ccariɛa n l’iman. 28 S uya neḥseb belli bnadem ad ittwasegged s l’iman, war iǧi s řexdayem n Ccariɛa. ◘3:28 Řex. 13:38; Rum. 8:3; Gal. 2:16; Ɛbr. 7:25. 29 Niɣ AREBBI n Wudayen waha, war iǧi n řegnus ɛawed? Wah, uřa n řegnus! 30 Minzi AREBBI d Ijjen wenni i ɣa iseggden inni ittwaxetnen s l’iman, u ɛawed inni war ittwaxtinen s l’iman. 31 Ma nbeṭṭeř Ccariɛa s l’iman? Wayyaw, s řemqřub, neccin ad neḍmen Ccariɛa.