4
Areyyeḥ i řgens n Arebbi
1 Ejj aneɣ ad neḥḍa xenni, aqa uřa d ijj zzaywem, umi ɛad din ijj n lwaɛd n wadaf di arraḥet nnes, ad iḍhar ittɣima ɣar ḍeffar ɣar wadaf. 2 Minzi ittwabarreḥ Řexbar Aṣebḥan ɛawed i neccin, am ittwabarreḥ uřa i nitni, maca awař war d asen infiɛ i yinni d as isřin, minzi tuɣa war dd-ittis ca ak-d l’iman deg inni d as isřan. 3 Maca neccin, inni yumnen, ad nadef ɣar arraḥet.
Maca am mammec inna:
“Am mammec jjuǧeɣ deg weɣḍab inu:
‘Nitni war dd-ttidfen ca ɣar arraḥet inu!’ ”
U xzar, řexdayem n AREBBI aqa ttwakemmřent zeg wami tᵉttwagg ddunect, ◘4:3 Izhd. 95:11. 4 am mammec inna x ssebt:
“Yareyyeḥ AREBBI zi marra řexdayem nnes
deg wass wiss sebɛa.” ◘4:4 Amz. 2:2; Uf. 20:11; 31:17.
5 Ammu i inna ɛawed deg wawař-a wanita:
“War dd-ttidfen ca ɣar arraḥet inu!” ◘4:5 Izhd. 95:11.
6 Umi teqqim belli marra zemmaren ad dd-adfen ɣar arraḥet-a, maca inni umi ittwabarreḥ s Řexbar Aṣebḥan ɣar umezwaru, war udifen ca x ssibbet n řmuɛṣiyyet nsen, 7 aqa Netta igga ɛawed, awarni aṭṭas n řweqt, ijj n wass nneɣni, am mammec ittwari qbeř aqa Dawud inna:
“Ass-a mařa tesřim i tmijja nnes,
war seqsiḥem ca uřawen nwem!” ◘4:7 Izhd. 95:7; Ɛbr. 3:7.
8 Minzi mařa tuɣa Yacuwa, mmis n Nun, issidef i-ten di arraḥet, war ɣares ittiři ɛad řhard s uqemmum n Dawud x ijj n wass nneɣni awarni man aya. 9 S uya ad teqqim aqa din ɛad arraḥet n ssebt i řgens n AREBBI. 10 Minzi wi yudfen ɣar arraḥet nnes, yareyyeḥ ɛawed zi řexdayem nnes am mammec AREBBI zi tinni nnes.
11 S uya jjem aneɣ ad nemkabar ḥima ad nadef ɣar arraḥet nni, maḥend war nweṭṭi am mammec wḍan inni war iṭṭiɛen. 12 Minzi Awař n AREBBI iddar, ixeddem mani ma, iqḍeɛ ktar zi kuř ssif s tnayen n wudmawen, ittakkwaḍ ař abeṭṭu n řeɛmar d arruḥ, ař ttasiɛ jar řemfaṣeř, ař aymir jar waḍuf d iɣsan, uca iḥekkem x tnawi d ixarriṣen n wuř. ◘4:12 Amb. 12:11; Ica. 49:2; Afa. 6:17. 13 Uřa d ict n tmesřact i zzayes dd-ittwaxeřqen war zzayes tᵉttwassnuffar ca, maca marra timesřayin aqa atent ttwaɛarryent, ttwarezzment ɣar tiṭṭawin n Wenni umi i-k-dd i ɣa negg řeḥsab. ◘4:13 Izhd. 33:13.
Yasuɛ d Arrays nneɣ imɣar n ikehhanen
14 S uyenni, am ɣarneɣ Arrays n ikehhanen imɣar, Yasuɛ Lmasiḥ, Mmis n AREBBI, wenni issgeɛɛden ɣar ujenna, ejj aneɣ ad ncebbar di cchadet nnes. ◘4:14 Ɛbr. 3:1; 6:20; 8:1; 9:11. 15 Minzi war ɣarneɣ arrays n ikehhanen i war izemmar ad yaca ak-d tuḍɛeft nneɣ, maca Ijjen wenni ittwajarrben di marra am neccin, maca břa ddenb. ◘4:15 Ica. 53:9; 2 Kur. 5:21; Fil. 2:7; Ɛbr. 2:18; 1 Bṭ. 2:22; 1 Yḥ. 3:5. 16 S uyenni ejj aneɣ ad dd-nqarreb xenni s ttiqqet ɣar řɛarc n arḍa nnes, ḥima ad neksi arreḥmet uca ad naf arḍa di řweqt n řmeḥnet. ◘4:16 Rum. 3:25.
◘4:3 4:3 Izhd. 95:11.
◘4:4 4:4 Amz. 2:2; Uf. 20:11; 31:17.
◘4:5 4:5 Izhd. 95:11.
◘4:7 4:7 Izhd. 95:7; Ɛbr. 3:7.
◘4:12 4:12 Amb. 12:11; Ica. 49:2; Afa. 6:17.
◘4:13 4:13 Izhd. 33:13.
◘4:14 4:14 Ɛbr. 3:1; 6:20; 8:1; 9:11.
◘4:15 4:15 Ica. 53:9; 2 Kur. 5:21; Fil. 2:7; Ɛbr. 2:18; 1 Bṭ. 2:22; 1 Yḥ. 3:5.