1 “Sřem-dd ɣari, a tigzirin, sḥessem, a ccuɛub n řaggʷaj! SIDI iřaɣa ayi-dd zeg wami d ayi tuɣa deg uɛeddis n yemma, zeg wami d ayi tuɣa ɛad di řemřawet iřaɣa ayi-dd s Yisem inu. 2 Netta igga aqemmum inu d ssif iqeḍɛen, Netta issduriy ayi di tiři n ufus nnes. Netta igga ayi d fřitca s tixeft iqeḍɛen, igga ayi deg weqrab nnes n fřitcat. 3 Inna ayi: ‘Cek d Amsexxar inu Israil nni di ɣa ttwassɛuǧeɣ!’ ”

4 “Maca Necc nniɣ: ‘Necc arbreɣ x walu, ḍeyyɛeɣ jjehd inu di řxawi d řbaṭeř. S tidett, tasɣart inu ɣar SIDI u řmunet inu ɣar AREBBI inu.’ ”

5 “Uca řexxu iqqar SIDI, wenni d ayi iggin d Amsexxar zeg wami d ayi tuɣa deg uɛeddis n yemma maḥend ad ɣares dd-ssɛeqbeɣ Yaɛqub u maḥend ad ɣares ssmuneɣ Israil - wah, Necc ttwassɛuǧeɣ di tiṭṭawin n SIDI uca AREBBI inu d Jjehd inu! - 6 wah, Netta iqqar: ‘Drus, aqa cek ad tiřid d Amsexxar inu maḥend ad tessnekkared ɛawed tiqebbař n Yaɛqub u maḥend ad dd-tarred inni ittwaḥdan zi Israil. Necc ggiɣ Cek d Tafawt i řegnus, maḥend ad tiřid d asenjem inu ař uneggar n temmurt!’ 7 Ammu i iqqar SIDI, Amefdi n Israil, Amqeddes nnes, i weryaz ittwasseḥqaren, i wenni d nnɛi n řgens, i Umsexxar n ayt n ṣṣulṭa: ‘Ijeǧiden ad Cek ẓaren u ad kkaren, řḥukkam ad aḍaren zzatek di ṭṭweɛ n SIDI, wenni d amtiqqi, Amqeddas n Israil, wenni Cek ifarzen!’ ”

8 “Ammu i iqqar SIDI: ‘Di řḥař n arḍa, sřiɣ ac, u deg wass n usenjem, wciɣ ac afus. Necc ad Cek ḥḍiɣ u ad Cek areccḥeɣ d Řɛahd n řgens, maḥend ad tessbedded tammurt, maḥend ad tᵉṭṭfed tiseqqar yareddǧen ɛawed d tasɣart, ◘49:8 2 Kur. 6:2 9 maḥend ad tinid i imeḥbas: Ffɣem-dd!, i yinni iǧan di taǧest: Ḍharem-dd! Ad arewsen ɣar ibriden, x marra tiwririn iquccaren ad iřin ddmani nsen n tarewsa. 10 War xasen ittekk řaẓ uřa d afadi, řeḥmu d tfuct war ten teccit ca, maɣar wenni xasen ittḥinnan ad ten igewwed, ad ten indeh ɣar tařawin n waman. ◘49:10 Asa. 7:16 11 Marra idurar inu ad ten ggeɣ d ibriden u ibriden inu iwaṭan ad ttwassuɛřan. 12 Xzar, ad dd-asen zi řaggʷaj. Xzar, ina ad dd-asen zi ccamal u zi řebḥar u inneɣni zi temmurt n Aswan.’ ” ◼49:12 Aswan - tandint di ljanub n Miṣra, maca ca n řmaxtuṭṭat nneɣni qqarent: ‘Sinim’. Ad taɣ nitni d Icinwiyyen n ass n yiḍa.

13 “Sřiwřiwem, a kenniw ijenwan, farḥet, a cem, tammurt! Arrem idurar ad dduqqzen s usřiwřew, maɣar SIDI issfewwej x řgens nnes, Netta ad iḥinn x řmusakin nnes!”

14 “Maca Ṣihyun tenna: ‘SIDI ismeḥ dayi, Sidi inu ittu ayi.’ 15 Ma tzemmar temɣart ad tᵉttu aseymi nnes, umi war tᵉttḥinni x mmis n uɛeddis nnes? Waxxa tᵉttu t, Necc war cem ttᵉttuɣ. 16 Xzar, Necc neqceɣ cem di tnayen n třeqqa n ifassen inu, řeḥyuḍ nnem řebda ɣari zzat i tiṭṭawin. 17 Iḥenjiren nnem ad ɛeřfen, maca imteḥḥayen nnem u inni cem ixarrben ad xam uyuren. 18 Sgeɛɛed tamuɣři nnem uca xzar da d diha. Xzar, marra munen usin-dd ɣarem. S tidett am ddareɣ Necc, iqqar SIDI, ad tarḍed ixef nnem s marra ina am s řehzuṭ, uca ad zzaysen tzewwqed ixef nnem am t tegga tesřit.’ ◘49:18 Ica. 60:4 19 Maɣar řxirbat nnem d imucan nnem ittwareddǧen, wah tammurt nnem ittwateḥḥan ad tiři teḥṣar i imezdaɣ, uca inni ixsen ad cem ṣarḍen, ad iřin ɣar řaggʷaj. 20 Uřa d iḥenjiren nni zzayem ittwacaren, ad inin deg imezzuɣen nnem: ‘Amcan dayes řḥeṣran xafi, egg ayi amcan i necc, maḥend zemmareɣ ad dayes zedɣeɣ!’ 21 Ad tinid deg wuř nnem: ‘Man wen i d ayi dd-yurwen marra iḥenjiren-a? Ucaren ayi iḥenjiren u war dd-ttirweɣ, ssuffɣen ayi-dd d ameḥbus uca nḍaren ayi-dd. Man wen i ten isseymen? Xzar, necc waha d tenni tuɣa iceṭṭen, manis dd-usin nitni?’ ”

22 “Ammu i iqqar Sidi inu, SIDI: ‘Xzar, ad ssgeɛɛdeɣ afus inu ɣar řegnus u ad ssbeddeɣ taɛeǧant inu i řegnus. Xenni ad awyen iḥenjiren nnem deg weḥsin nsen ɣar danita uca ad arbun yessim x tɣarḍin nsen. 23 Ijeǧiden ad cem ṣunen, tijeǧidin ad cem ssuṭṭdent. Ad aḍaren zzatek s uɣembub nsen ɣar temmurt, ad am řesḥen taɛejjact zeg iḍaren nnem. Xenni ad tessned aqa Necc d SIDI, uca inni xas i ɣa isitimen, war ttseḍḥin ca.’ ”

24 “Ma izemmar ijj ad ikkes x wenni ijehden zzardet? Ma izemmar ad yarweř wenni iǧan d ameḥbus n umsegged? ◘49:24 Mt. 12:29 25 Maca ammu i iqqar SIDI: ‘Ad dd-ttwakksen imeḥbas zeg ufus n umzemmar uřa d takeccaḍṭ n uqehhar ad textutteř zi jar ifassen nnes. Maɣar wenni ixsen ad cem icarreɛ, Necc ad t carrɛeɣ, uca iḥenjiren nnem ad ten ssnejmeɣ. 26 I yinni cem iḥeṣṣaren ad asen wceɣ ad ccen aysum n yixef nsen u nitni ad scaren s idammen nsen am s binu ẓemmen t jdid, u marra iwdan ad ssnen aqa Necc, SIDI, d Amsenjam nnem d Amefdi nnem, Amzemmar n Yaɛqub.’ ” ◘49:26 Asa. 16:6