1 Uca sřiɣ ict n tmijja zi Zzawect Tameqqrant tᵉttřaɣa x sebɛa n lmalakat nni, tenna:

“Uyurent, ttfarrɣent sebɛa n ṭṭawyat n weɣḍab n AREBBI x temmurt!” ◘16:1 Ica. 66:6

2 Wenni d amezwaru yuyur, ifarreɣ ṭṭawya nnes x temmurt. Uca idweř ijj n ubuɛrus d aɛeffan iqbeḥ ɣar iwdan i ɣar teǧa řmarka n řweḥc, inni isejden i řexyař nnes. ◼16:2 řexyař - niɣ ‘timtal’.  ◘16:2 Uf. 9:9, 10, 11; 1 Ṣm. 5:9; Asa. 13:14, 16, 17.

3 Xenni ifarreɣ lmalak wiss tnayen ṭṭawya nnes di řebḥar uca idweř řebḥar am idammen n ijj n umettin, uca kuř řeɛmar iddaren di řebḥar immut. ◘16:3 Uf. 7:17, 18, 20

4 Xenni ifarreɣ lmalak wiss třata ṭṭawya nnes x iɣezran d tařawin, uca aman nsen dewřen d idammen.

5 Uca sřiɣ i lmalak n waman iqqar:

“Cek d amseggad,

Cek d wenni iǧan d wenni tuɣa,

d wenni d amezdag qaɛ,

umi tkemmřed řeḥkamat-a ammu. ◘16:5 Asa. 1:4, 8; 4:8; 11:17.

6 Minzi nitni ssizzřen idammen

n inabiyyen d imqeddasen,

tewcid asen ɛawed ad swen idammen,

maɣar ammu i d asen dd-iffeɣ.” ◘16:6 Mt. 23:34.

7 Uca sřiɣ aqa aɛalṭar iqqar:

“Wah, a SIDI AREBBI, Amzemmar x kuřci,

řeḥkamat nnec d tidett d tasegda.” ◘16:7 Asa. 15:3.

8 Xenni ifarreɣ lmalak wiss arebɛa ṭṭawya nnes x tfuct uca temmewc as i tfuct, ḥima ad tecnef iwdan s tmessi. 9 Uca cemḍen iwdan s řɛabuq imɣaren n tmessi uca ceqqfen deg Yisem n AREBBI wenni ɣar teǧa ṣṣulṭa x jjrayeḥ-a uca war tuben ca maḥend ad as wcin aɛuǧi. ◘16:9 Asa. 16:11, 21.

10 Xenni ifarreɣ lmalak wiss xemsa ṭawya nnes x řɛarc n řweḥc uca tewḍa-dd taǧest x tgeldit n řweḥc. Uca zeɛfen deg iřes nsen s ssibbet n řeḥriq 11 uca ceqqfen deg Yisem n AREBBI n ijenwan s ssibbet n řeḥriq d ibuɛrusen nsen, maca war tuben ca zi řexdayem nsen.

12 Xenni ifarreɣ lmalak wiss setta ṭṭawya nnes deg iɣzar ameqqran, iɣzar n Lfuraṭ uca uẓɣen waman nnes, ařami issewjed abrid i ijeǧiden inni dd ɣa yasen zi manis dd-tneqqar tfuct. ◘16:12 Ica. 11:15

13 Xenni ẓriɣ, aqa třata n řaryaḥ imengas am iqarqriwen ffɣen-dd zeg uxenfuc n řhaycet u zeg uqemmum n řweḥc u zeg uqemmum n unabi issxarriqen, 14 maɣar nitni d řaryaḥ n ccwaṭen inni itteggen řeɛřamat i d igguren ɣar ijeǧiden n ddunect, maḥend ad ten ssmunen i umenɣi deg wass ameqqran n AREBBI, Amzemmar x kuřci. ◘16:14 2 Ts. 2:9; Asa. 13:13; 17:14; 19:19, 20; 20:8.

15 “Xzar, Necc ad dd-aseɣ

am yijj n uceffar!

Sseɛd n wenni i ɣa iqqimen ifaq,

wenni i ɣa iḥḍan arruḍ nnes

ḥima war iggur d aɛaryan,

war ittwaẓar useḍḥi nnes.” ◘16:15 Mt. 24:43; Lk. 12:39; 1 Ts. 5:2; 2 Bṭ. 3:10; Asa. 3:3, 18.

16 Uca issmun i-ten ɣar wemcan umi ttřaɣan s Tɛibranit ‘Megiddu’.

17 Xenni ifarreɣ lmalak wiss sebɛa ṭṭawya nnes x řeɛwin uca tusa-dd ict n tmijja tejhed zi Zzawect Tameqqrant, zi zzat n řɛarc, teqqar:

“Aqa ittwakemmeř!” ◘16:17 Ica. 66:6; Asa. 21:6.

18 Uca usin-dd wassamen d wajjajen, uca imsar ijj n wenhezzi n temmurt d ameqqran, war temsar ammu zeg wami iǧa bnadem di temmurt, ammu i imɣar. ◘16:18 Asa. 4:5; 8:5. 19 Tandint tameqqrant tewḍa tebḍa x třata n tseqqar uca marra tineddam n řegnus hedment uca AREBBI iɛqeř x tendint tameqqrant Babil, ḥima ad as iwc řkas n binu n tefqeḥt n weɣḍab nnes. ◘16:19 Izhd. 75:9; Irm. 25:15; Asa. 14:8, 10; 18:5. 20 Uca kuř tagzirt tarweř, war ttwifin ca idurar ɛad, 21 wḍan-dd ibquqen imeqqranen n tebruri zeg ujenna x iwdan, tuɣa ddqeř nsen anect n ict n ‘talint’, uca iwdan ceqqfen di AREBBI zi ssibbet n jjriḥect n tebruri, minzi jjriḥect nnes tuɣa temɣar aṭṭas. ◘16:21 Asa. 11:19; 16:9, 11.