1 Uca ẓriɣ, aqa Izmar ibedd-dd x wedrar n Ṣihyun, uca akides mya u-arebɛa u-rebɛin-ařef, inni x tenyart nsen yura Isem nnes d Yisem n Babas. ◘14:1 2 Im. 23:7; Ica. 31:4; Izhd. 2:6; Asa. 7:4

2 Sřiɣ ict n tmijja tusa-dd zeg ujenna, am řḥess n waṭṭas n waman u am řḥess n wajjaj ameqqran, uca řḥess i sřiɣ tuɣa am yijj n bu-lharpa ittiraren di lharpa nnes. ◘14:2 Yuw. 4:8; Asa. 1:15; 5:8; 10:3 3 Aqa nitni ɣennjen min iǧan am yijj n yezři n uṣebbeḥ d jdid qaɛ zzat i řɛarc u zzat i arebɛa n imuddaren d imɣaren, uca uřa d ijj war izemmar ad iřmed izři aya n uṣebbeḥ mɣir mya u-arebɛa u-rebɛin-ařef, inni ittwafdin zi temmurt. ◘14:3 Asa. 5:9. 4 Ina d inni war issefseden ixef nsen ak-d temɣarin, minzi nitni d iɛezriyyen imezdagen. Nitni ḍeffaren Izmar mani ma ikka. Aqa ina ittwafdin zeg iwdan am ṣṣabet tamezwarut i AREBBI u i Yezmar. ◘14:4 2 Kur. 11:2. 5 Aqa war ittwiffi ca řɣecc deg uqemmum nsen, aqa war daysen bu řɛib. ◘14:5 Ṣaf. 3:13; Afa. 5:27.

6 Uca ẓriɣ ijj n lmalak nneɣni tuɣa iṭṭaw di řwesṭ n ujenna, ɣares Řexbar Aṣebḥan i Řebda ḥima ad zzayes ibarreḥ i yinni izeddɣen di temmurt, i kuř řgens d cceɛb d teqbič d yiřes, 7 uca inna s jjehd:

“Ggʷedem AREBBI, wcem as-dd aɛuǧi,

aqa tasaɛɛet n lḥisab nnes tiweḍ-dd.

Sejdem i wenni iggin ajenna d temmurt

d řebḥar d tařawin n waman.” ◘14:7 Amz. 1:1; Izhd. 33:6; 124:8; 146:6; Řex. 14:15; 17:24.

8 Uca wenneɣni, wenni d wiss tnayen, iḍfar i-t, inna:

“Aqa tewḍa, aqa tewḍa tendint tameqqrant Babil,

i yejjin ad swen marra řegnus zi binu

n tefqeḥt n farq-ccɣeř nnes.” ◘14:8 Ica. 21:9; Irm. 51:8; Asa. 16:19; 17:5; 18:2, 10, 21.

9 Uca wenneɣni, ijj n lmalak wiss třata, iḍfar i-ten uca iřaɣa s jjehd:

“Wenni iɛebden řweḥc d řexyař nnes

d wenni iksin řmarka x tenyart nnes

niɣ deg ufus nnes,

10 d netta ad isu ɛawed

zi binu n tefqeḥt n SIDI,

wenni isswejden břa axeǧeḍ

di řkas n weɣḍab nnes,

uca ad ittwaɛeddeb

s tmessi d řecbareyyet

qibač i tiṭṭawin n lmalakat iqeddsen

u qibač i tiṭṭawin n Yezmar. ◘14:10 Asa. 16:19; 18;6; 19:20.

11 Uca ddexxan n uɛeddeb nsen

ad iqqim igeɛɛed i řebda qaɛ.

War din bu arraḥet ass d ǧiřet

i wenni isejjden i řweḥc d řexyař nnes

u i wenni iksin řmarka n yisem nnes. ◘14:11 Asa. 19:3.

12 Aqa da ittban-dd ṣṣbar n imqeddasen,

inni itteṭṭfen di tweṣṣa n AREBBI

u ḥeṭṭan l’iman n Yasuɛ.” ◘14:12 Asa. 13:10.

13 Uca sřiɣ ict n tmijja tᵉttřaɣa-dd zeg ujenna, teqqar:

“Ari: Sseɛd n imettinen

inni i ɣa mmten di Siditneɣ,

zi řexxu tsawent!”

“Wah, inna Arruḥ, maɣar ad areyyḥen

zi řexdayem nsen!”,

aqa řexdayem nsen ad ten ḍfarent.

14 Uca ẓriɣ, aqa ijj n useynu d acemřař, uca x useynu iqqim xas wenni yarwesen deg ijj n Mmis n bnadem, ɣares ttaj n wureɣ x uzeǧif nnes u amjar iqḍeɛ deg ufus nnes. ◘14:14 Ḥiz. 1:26; Dan. 7:13; Asa. 1:13.

15 Uca ijj n lmalak nneɣni iffeɣ-dd zi Zzawect Tameqqrant uca iřaɣa s jjehd x wenni iqqimen x useynu:

“Sekk-dd amjar nnec, mjar!

Aqa tasaɛɛet n tmeyra tiweḍ-dd!” ◘14:15 Yuw. 4:13; Mt. 13:39.

16 Uca Wenni iqqimen x useynu, issekk-dd amjar nnes ɣar temmurt uca tᵉttwamjar temmurt.

17 Uca ijj n lmalak nneɣni iffeɣ-dd zi Zzawect Tameqqrant i iǧan deg ujenna, uca uřa d netta ɣares ijj n wemjar iqḍeɛ. 18 Uca ijj n lmalak nneɣni wenni ɣar teǧa ṣṣulṭa x tmessi, iffeɣ-dd zeg uɛalṭar, uca iřaɣa-dd s jjehd x wenni ɣar iǧa wemjar iqḍeɛ, inna:

“Sekk-dd amjar nnec iqeḍɛen,

řqeḍ izekkunen n tzayarin n temmurt,

minzi aḍiř nnes aqa yiweḍ.”

19 Uca lmalak issekk-dd amjar nnes ɣar temmurt, iřqeḍ aḍiř n tzayart n temmurt, inḍar i-t di tsirt tameqqrant n weɣḍab n AREBBI. ◘14:19 Asa. 19:15. 20 Ḥaryen di tsirt n uḍiř ař barra n tendint uca ruccen-dd idammen zi tsirt ařami iwḍen ɣar sřimat n yeysan, řqedd n ařef u-mitayen n ‘istadiyyen’, ixs ad yini ɛřaḥař mitayen u-ɛicrin kilumitr. ◼14:20 istadiyyen
ijj n řmeřɛeb di řweqt n Iyunaniyyen tuɣa ɣares ict tuzzugart n 185 mitr, ixs ad yini ‘inn n ustadiy’.  ◘14:20 Ica. 63:3.