1 Awarni as sřiɣ ijj n řḥess ameqqran n waṭṭas n řɣaci deg ujenna, nnan:

“Hallilu-Yah!

Asenjem d uɛuǧi d jjehd

aqa aten ɣar AREBBI nneɣ,

2 minzi řeḥkamat nnes

mɣir d tidett d řḥeqq,

umi iḥaseb x temɣart n farq-ccɣeř,

tenni yareddǧen ddunect

s farq-ccɣeř nnes,

uca Netta yuɣa tasɣart

x idammen n imsexxaren nnes

i yumsen ɣar ifassen nnes.” ◘19:2 Aɛwd. 32:43; Asa. 15:3; 16:7; 18:20.

3 Nnan i umur wiss tnayen:

“Hallilu-Yah!”

Uca ad yaři ddexxan nnes ɣar ujenna i řebda qaɛ.◘19:3 Ica. 34:10; Asa. 14:11; 18:18.

4 Uca arebɛa u-ɛicrin n imɣaren d arebɛa n imuddaren wḍan ɣar temmurt, sejden i AREBBI nneɣ wenni iqqimen x řɛarc, nnan:

“Amin, Hallilu-Yah!”

5 Uca tusa-dd ict n tmijja zi řɛarc, tenna:

“Semɣarem AREBBI nneɣ, a kenniw marra imsexxaren nnes,

u marra inni itteggʷeden Isem nnes,

am umeẓyan am umeqqran!”

6 Uca sřiɣ aqa nnan am s tmijja n ubarru n řɣaci, am s řḥess n waṭṭas n waman, am s zzhir n wajjajen imeqqranen:

“Hallilu-Yah, minzi SIDI AREBBI,

Amzemmar x kuřci, aqa iḥekkem. ◘19:6 Asa. 11:17; Asa. 14:2

7 Ejj ad nfarḥ, ad nesřiwřiw,

ad as negg aɛuǧi,

maɣar Urar n Yezmar yiweḍ-dd,

uca tamɣart nnes aqa tḥezzem, ◘19:7 Mt. 22:2; Lk. 14:16.

8 uca temmewc as ad tyarḍ arruḍ

zi řqeṭṭan ifsusen izdigen ittissiqen,

minzi řqeṭṭan nni

d řexdayem iseggden n imqeddasen.”

9 Nitni nnan ayi:

“Ari: Sseɛd n yinni ittwaɛarḍen

ɣar umensi n Wurar n Izmar.’

Xas uca inna ayi ca n yijjen:

“Ina d awařen n tidett n AREBBI.” ◘19:9 Asa. 21:5.

10 Uca wḍiɣ as ɣar iḍaren nnes ḥima ad t ɛebdeɣ, maca netta inna ayi:

“Lla, war ttegg ca man aya! Aqa necc d amsexxar amɛacar am cek d aytmac inni ɣar teǧa cchadet n Yasuɛ. Ɛebdet AREBBI, minzi cchadet n Yasuɛ nettat d Arruḥ n min ittwanabben.” ◘19:10 Řex. 10:26; 14:14; Asa. 22:9.

11 Awarni aya ẓriɣ ajenna innurzem, u xzar, aqa din ijj n uyis d acemřař d Wenni xas inyin, qqaren as ‘Dayes řaman!’, ‘Dayes tidett!’, uca Netta ad iḥaseb u ad immneɣ s tsegda. ◘19:11 Asa. 6:2. 12 Tuɣa tiṭṭawin nnes amecnaw iḥudaq n tmessi, uca ɣares x uzeǧif nnes aṭṭas n ttijan, uca yura xas Isem i war t issin ḥed mɣir Netta waha. ◘19:12 Asa. 1:14. 13 Tuɣa yarḍ ijj n useřham ittwaruccen s idammen, uca wa d Isem nnes: ‘Awař n AREBBI’. ◘19:13 Ica. 63:1; Yḥ. 1:1. 14 Řɛeskarat n ujenna ḍfaren t-i-dd x yeysan icemřařen, arḍen řqeṭṭan d acemřař izdig. ◘19:14 Mt. 28:3; Asa. 4:4; 7:9. 15 Ffɣen-dd řesyuf iqeḍɛen zeg iqemmumen nsen maḥend ad zzaysen nɣen řegnus, u Netta ad ten iḥḍa s uzeǧaḍ n wuzzař, u Netta simant nnes ad iɛfes di tsirt n weɣḍab n AREBBI, Amzemmar x kuřci. ◘19:15 Izhd. 2:9; Ica. 63:3; Asa. 2:16, 27; 14:19, 20; 19:21. 16 X warruḍ nnes u x tmeṣṣaḍin nnes yura xasen Isem-a: ‘Ajeǧid x marra ijeǧiden’, ‘Sidi x marra řḥukkam’. ◘19:16 1 Tim. 6:15; Asa. 17:14.

17 Uca ẓriɣ ijj n lmalak nneɣni ibedd di tfuct. Netta iřaɣa s jjehd, inna i marra ijḍaḍ iṭṭawen di řwesṭ n ujenna:

“Asettiw-d, munettiw-dd

ɣar umensi ameqqran n AREBBI, ◘19:17 Irm. 12:9; Ḥiz. 39:17.

18 ḥima ad teccem aysum n ijeǧiden

d weysum n imeqqranen x wařef

d weysum n yinni ijehden

d weysum n iysan d yinni xasen inyin,

d weysum n iḥurriyyen d isemɣan,

am n imeẓyanen am n imeqqranen.”

19 Uca ẓriɣ řweḥc ak-d řɛeskarat nnes d ijeǧiden n temmurt d iɛeskarriyyen nsen, inni imunen ḥima ad mmenɣen ak-d Wenni inyin x uyis, u ak-d iɛeskariyyen nnes. 20 Aqa ittwaṭṭef řweḥc ak-d unabi issxarriqen, wenni iggin zzates řeɛřamat nni zi tuɣa iɣecc inni iksin řmarka n řweḥc uca sejden i řexyař nnes. Nitni s tnayen idsen ttwammenḍaren di řebḥar n tmessi ittcefcufen ɛawed s řecbareyyet. ◘19:20 Aɛwd. 13:2; Dan. 7:11; Mt. 24:24; Asa. 13:12, 13, 15, 16; 16:14; 20:10. 21 Maca wi iqqimen ttwanɣen s wuzzař i dd-ikkin zeg uqemmum n wenni inyin x uyis. Uca marra ijḍaḍ ittkeccaḍen jjiwnen s weysum nsen.