1 Ari i lmalak di tmesmunt n Afasus!

“Ammu i iqqar wenni ɣar iǧa sebɛa n itran deg ufus nnes, wenni igguren di řwesṭ n sebɛa n řeqnadeř n wureɣ: 2 ‘Necc ssneɣ řexdayem nnec d warbar nnec d ṣṣbar nnec, belli war tzemmared ad tḥemřed inni iɛeffnen uca tqeǧbed inni itteggen ixef nsen d rrusul, maca war ǧin ca, uca tufid ten d ayt n bu-ixarriqen. ◼2:2 rrusul - niɣ ‘imazanen’. 3 Cek tṣebbared u teksid armeḥ x ssibbet n Yisem inu u war tuḥiřed ca. 4 Maca ɣari xak ca, belli tejjid tayri nnec tamezwarut. 5 Ɛqeř manis-dd tewḍid uca tub, xenni egg řexdayem timezwura! Mařa war iǧi amenni, ad ɣarek dd-aseɣ deɣya, ad kesseɣ řqendiř nnec, mařa war tᵉttubed ca. 6 Maca man aya tiwḍed, aqa tcarrhed řexdayem n ayt n Inikulayiten, tinni carrheɣ uřa d Necc. ◼2:6 Inikulayiten - nitni d iwdan nni iffɣen zeg webrid n l'iman di Lmasiḥ (Xẓar Asa. 2:6; 2:15)  ◘2:6 Asa. 2:6.

7 Wenni ɣar ǧan imezzuɣen, ejj i-t ad iseř min iqqar Arruḥ i tmesmunin.

Wenni i ɣa iɣellben ad t ssecceɣ zi Tcejjart n Tudart i yeǧan di jjennet n AREBBI.’ ” ◼2:7 tacejjart - niɣ ‘addag’ (‘iddagen’).  ◘2:7 Amz. 2:9; Asa. 22:2.

8 Ari i lmalak n tmesmunt n Smirna!

“Ammu i iqqar wenni d Amezwaru d Uneggaru, Wenni immuten uca iddar: ◘2:8 Ica. 41:4; 44:6; Asa. 1:17. 9 ‘Aqa ssneɣ řmeḥnet nnec d wezřaḍ nnec, qaɛ amenni cek tᵉttejjared, u aqa-yi ssneɣ uřa d aceqqef n yinni iqqaren aqa aten d Udayen s tidett, maca nitni war ǧin ca d Udayen, maca d tamzida n cciṭan. 10 War tteggʷed ca zi min ɣa tᵉttwaɛeddbed. Aqa ibřis ad inḍar ca zzaywem di řeḥbes, ḥima ad tᵉttwajarrbem. Ad ɣarwem tiři řmeḥnet n ɛecra n wussan. Iřim d imtiqqan ař řmewt, řexdenni ad awem wceɣ ttaj n Tudart.

11 Wenni ɣar ǧan imezzuɣen, ejj i-t ad iseř min iqqar Arruḥ i tmesmunin.

Wenni i ɣa iɣellben war d as dd-tᵉttiwi ca txessart zi řmewt wiss tnayen.’ ” ◘2:11 Mt. 13:9.

12 Ari i lmalak di tmesmunt n Pirɣamus!

“Ammu i iqqar wenni ɣar iǧa ssif iqḍeɛ x tnayen n wudmawen: ◘2:12 Asa. 1:16; 2:16. 13 ‘Necc ssneɣ mani tzeddɣed, diha mani ittbedda řɛarc n cciṭan. Aqa teqqimed tᵉṭṭfed deg Yisem inu uca war tenkared ca l’iman dayi, Uca deg wussan umi tuɣa cek tᵉttmenɣed jmiɛ ak-d ucehhad amtiqqi inu di ṭṭweɛ n marra icehhaden inu imtiqqan, aqa ittwaneɣ netta jar awem. 14 Maca ɣari xak ca, minzi ɣarek dinni ca inni itteṭṭfen deg useřmed n Balɛam, wenni tuɣa issřemden i Balak mammec ɣa inḍar taɛenkrift i ayt n Israil, ḥima ad ccen zi min ɣarṣen i l’aṣnam uca ad sefssaden ixef nsen. ◘2:14 Řxř. 22:23; 24:14; 25:1; 31:16. 15 Ɣarek din ɛawed ca inni itteṭṭfen di tɣuri n Inikulayiten. ◼2:15 Inikulayiten - nitni d iwdan nni iffɣen zeg webrid n l'iman di Lmasiḥ (Xẓar Asa. 2:6; 2:15) 16 S uyenni tub! Mařa war iǧi amenni, ad ɣarwem dd-aseɣ deɣya, ad kisen mmenɣeɣ s ssif n uqemmum inu. ◘2:16 Ica. 49:2; Afa. 6:17; Ɛbr. 4:12; Asa. 1:16.

17 Wenni ɣar ǧan imezzuɣen, ejj i-t ad iseř min iqqar Arruḥ i tmesmunin.

Wenni i ɣa iɣellben ad as ssecceɣ ‘manna’ innufaren uca ad as wceɣ ijj n uqayas d acemřař, uca x uqayas nni ittwari xas ijj n isem n jdid, war t issin ḥed mɣir wenni t iṭṭfen.’ ” ◘2:17 Uf. 16:4-36.

18 Ari i lmalak di tmesmunt n Tiyatira!

“Ammu i iqqar Mmis n AREBBI wenni ɣar iǧa tiṭṭawin am yiḥudaq n tmessi d iḍaren nnes am nnḥas zi Lubnan: ◘2:18 Asa. 1:14, 15. 19 ‘Necc ssneɣ řexdayem nnec uřa d tayri nnec d l’iman nnec d tsexxart nnec d ṣṣbar nnec, aqa řexdayem nnec tineggura imɣaren x tmezwura. 20 Maca ɣari xak aṭṭas, minzi tejjid tameṭṭut nnec Izabil, tenni iqqaren belli nettat d tanabit, tesseřmad uca tessɣekkʷa imsexxaren inu, ḥima ad ssfesden ixef nsen uca ad ccen min ittwaɣarṣen i l’aṣnam. ◘2:20 1 Ij. 16:31; 2 Ij. 9:7. 21 Aqa wciɣ as ca n řweqt ḥima ad tᵉtub, maca nettat war tᵉttexs ca ad tᵉtub zi farq-ccɣeř nnes. 22 Xzar, ad tt ɣeḍřeɣ di tassut, ad tiři teḥřec ař řmewt, uca inni akides izennan, ad ten nedheɣ di řmeḥnet tameqqrant mařa war tuben ca zi min ggin. 23 Tarwa nnes ad ten wteɣ s řmewt uca marra timesmunin ad fehment aqa Necc d wenni iqeǧben tiẓẓař d wuřawen uca ad wceɣ i kuř ijjen zzaywem anect n řexdayem nwem. ◘2:23 1 Ṣm. 16:7; 1 Im. 28:9; 29:17; Izhd.7:10; 62:13; Irm. 11:20; 17:10; 32:19; Mt. 16:27; Řex. 1:24; Rum. 2:6; 14:12; 2 Kur. 5:10; Gal. 6:5; Asa. 20:12. 24 Maca i kenniw u i inneɣni di Tiyatira - ixs ad yini i marra inni war ɣar teǧi ca taɣuri-ya, war ssinen umi qqaren nitni ‘řaǧaɣ n cciṭan’ - ad awem iniɣ: Necc war xawem ttdarraceɣ ca taɣrart nneɣnit. 25 Maca min ɣarwem, ṭṭfem dayes ař dd ɣa yaseɣ. ◘2:25 Asa. 3:11.

26 Wenni i ɣa iɣellben u wenni i ɣa iṭṭfen di řexdayem inu, ad as wceɣ ṣṣulṭa x řegnus 27 maḥend ad ten yarwes s uzeǧaḍ n wuzzař, ad ten tarẓim am iɣarrafen n bu-třaxt, am mammec i tᵉṭṭfeɣ uřa d Necc zi Baba, ◘2:27 Izhd. 2:8-9. 28 uca Necc ad as wceɣ itri n řefjar.

29 Wenni ɣar ǧan imezzuɣen, ejj i-t ad iseř min iqqar Arruḥ i tmesmunin.’ ”