1 A iḥenjiren, ṭaɛem i lwalidin nwem di Siditneɣ, minzi man aya nican i yeǧa. ◘6:1 Kul. 3:20. 2 Ta d tawṣeyyet tamezwarut s yijj n lwaɛd: ‘Weqqar babac d yemmac, ◘6:2 Uf. 20:12; Aɛwd. 5:16; 27:16; Mt. 15:4; Mk. 7:10. 3 ḥima ad tiřid mliḥ u ad teddared aṭṭas di temmurt.”

4 A ibabaten, war sɛarem ca iḥenjiren nwem, maca arebbam ten s usettef u di tɣuri n Siditneɣ. ◘6:4 Aɛwd. 6:7, 20; Izhd. 78:4; Awřn. 19:8; 29:17.

5 A imsexxaren, ṭaɛem aytbab nwem di ddunect-a s tiggʷudi d tarjijit, u s řeṣfayet n wuř axmi i Lmasiḥ. ◘6:5 Kul. 3:22; 1 Tim. 6:1; Tit. 2:9; 1 Bṭ. 2:18. 6 War iǧi qibač i tiṭṭawin, axmi tᵉttexsem ad tarḍam iwdan, maca am yimsexxaren n Lmasiḥ inni itteggen min yareṭṭan AREBBI. 7 Xedmem asen s marra uř nwem di tayri, am i Siditneɣ, war iǧi i iwdan. 8 Aqa tessnem mařa din ḥed, ismeɣ niɣ d aḥurri, wenni i ɣa iggin ca d taṣebḥant, Siditneɣ ad ɣares yarr. 9 Ɛawed kenniw, a aytbab, ggem amenni ak-d imsexxaren nwem. Samḥem asen iɛeddiyen nsen, maɣar tessnem, aqa Siditwem deg ijenwan i yeǧa, u Netta war ittegg ca s wudmawen. ◘6:9 Aɛwd. 10:17; 2 Im. 19:7; Ayub 34:19; Řex. 10:34; Rum. 2:11; Gal. 2:6; Kul. 3:25; 4:1; 1 Bṭ. 1:17.

10 S uyenni, a wawmaten inu, meḥḍem di Siditneɣ u di jjehd n tzemmar nnes. 11 Arḍem s marra řesnaḥ n AREBBI, ḥima ad tessbeddem ibriden n tḥraymect n ibřis. ◘6:11 Kul. 3:12; 1 Ts. 5:8. 12 Aqa war nettmenɣi ca ak-d weysum d idammen, maca ak-d řeḥkamat, ak-d řḥukkam d ṣṣulaṭat n ddunect-a tabarcant u ak-d řaryaḥ iɛeffanen inni iǧan sadu ijenwan. ◘6:12 Afa. 2:2. 13 S uyenni arḍem s marra řesnaḥ n AREBBI maḥend ad temmɛařam ak-d umɛeffan. Xmi ɣa tiřim twejdem kuřci, ad teqqimem tbeddem. ◘6:13 2 Kur. 10:4. 14 S uyenni beddem, tbeysem s tidett u sduryem idmaren nwem s tsegda, ◘6:14 Ica. 59:17; Lk. 12:35; 2 Kur. 6:7; 1 Bṭ. 1:13. 15 ad iřin iḍaren nwem ttwaqqnen s řxaḍar n L’Injil n řehna. 16 Ak-d man aya marra, ksim taseddart n l’iman deg ufus nwem, maḥend ad tessxesyem marra fřitcat itteḥduduqen s tmessi n umɛeffan. 17 Ggem lkask n usenjem x uzeǧif nwem uca ṭṭfem ssif n Arruḥ i iǧan d Awař n AREBBI. ◘6:17 Ica. 59:17; 1 Ts. 5:8; Ɛbr. 4:12; Asa. 2:16. 18 Ẓẓaǧam di marra tiẓaǧa d tutra nwem řebda di Arruḥ, u ḥḍam břa qeṭṭu di tẓaǧit, am tᵉttẓaǧam u tkessim s řmeɛruf řebda di ṭṭweɛ n marra imqeddasen, ◘6:18 Lk. 18:1; Rum. 12:12; Kul. 4:2; 1 Ts. 5:17. 19 uřa di ṭṭweɛ inu, ḥima ad ayi immewc Awař xmi ɣa arzmeɣ aqemmum inu, maḥend ad barrḥeɣ ssirr n Řexbar Aṣebḥan s teryast, ◘6:19 Řex. 4:29; 2 Ts. 3:1. 20 i zi necc d amsekki s ssnaseř, ḥima ad xas ssiwřeɣ s teryast am mammec icuwwar ad ssiwřeɣ. ◘6:20 2 Kur. 5:20.

21 Ḥima ad tessnem mammec ɣa yiři umeddur inu u min tteggeɣ, xzar, Ticikus, ijj n umatneɣ iɛizzen d amsexxar amtiqqi n Siditneɣ, ad kenniw ixebbar. ◘6:21 Řex. 20:4; Kul. 4:7; Tit. 3:12. 22 Aqa ssekkeɣ t-i-dd i man aya simant nnes, ḥima ad tessnem ameddur inu, uca ḥima ad daywem yegg uř. ◘6:22 2 Tim. 4:12.

23 Řehna ad yiři ak-d tawmat nneɣ uřa d tayri ak-d l’iman, zi AREBBI, Babatneɣ, u zi Siditneɣ Yasuɛ Lmasiḥ. 24 Ad yiři arḍa ak-d marra inni ittexsen Siditneɣ Yasuɛ Lmasiḥ břa řɣecc. Amin.