1 Inna asen ɛawed ijj n umedya belli aqa ittxeṣṣa asen ad ẓẓaǧen di kuř řweqt břa amelli. ◘18:1 Rum. 12:12; Afa. 6:18; Kul. 4:2; 1 Ts. 5:17.

2 “Tuɣa deg ict n tendint ijj n řqaḍi war itteggʷed ca AREBBI, war ittweqqar bnadem. 3 Ict n tajjač di tendint nni tusa-dd ɣares, tenna as: ‘Ewc ayi tasɣart inu x weɣrim inu!’ 4 Aṭṭas i ikka tuɣa yugi. Xenni inna deg ixef nnes: ‘Necc zeɛma war tteggʷedeɣ ca AREBBI u war ttweqqireɣ bnadem, 5 qaɛ ammu, minzi tajjač-a thekkweř ayi břa qeṭṭu, ad as wceɣ tasɣart nnes, ḥima war dd-tᵉttɛiqqib řebda uca ad ayi tarẓ azeǧif.’ ”

6 Siditneɣ inna: “Sřem min iqqar řqaḍi aɣeccac! 7 Ma war ittic AREBBI tasɣart ktar aṭṭas i yinni zzayes ittwafarzen, inni ɣares dd-isɣuyyun ass d ǧiřet? Ma war ittegg Netta ktar aṭṭas s ttasiɛ n řxaḍar xasen? ◘18:7 Asa. 6:10. 8 Ad awem iniɣ, aqa ad asen iwc tasɣart deɣya. Maca xmi dd ɣa iɛqeb Mmis n bnadem, ma ad yaf l’iman di temmurt?”

9 Inna amedya-ya i iwdan nni ɣar teǧa ttiqqet deg yixef nsen aqa aten d imseggaden u sseḥqaran inneɣni marra. 10 “Gaɛɛden tnayen n iwdan ɣar Zzawect Tameqqrant, ḥima ad ẓẓaǧen, ijjen d Afarisi u wenneɣni d ijj n bu-ḍḍariba. 11 Ibedd Ufarisi, ittẓaǧa ak-d yixef nnes: ‘A AREBBI, ttqadiɣ Cek umi war ǧiɣ ca am iwdan nneɣni: iɣeccacen d yinni iḥeṣṣaren d yinni izennan, uřa am bu-ḍḍariba wanita. ◘18:11 Ica. 1:15; 58:2; Asa. 3:17, 18. 12 Necc ttẓummiɣ tnayen n imuren di ssimana, tticeɣ řeɛcur zi marra min ɣari iǧan d agřa.’ 13 Maca bu-ḍḍariba wenni ibedden ɣar řaggʷaj, war izɛim uřa ad issiři tiṭṭawin nnes ɣar ujenna, maca iwta ixef nnes ɣar idmaren, inna: ‘A AREBBI, arḥem ayi, aqa necc d amednub!’ 14 Necc ad awem iniɣ, aqa wanita ad yiři ittwasegged s waṭṭas x Ufarisi nni umi dd-ihwa ɣar taddart nnes. Minzi marra wenni i ɣa issuɛřan ixef nnes ad ittwasswaḍeɛ, u wenni i ɣa isswaḍɛen ixef nnes ad ittwassuɛřa.” ◘18:14 Ayub 22:29; Awřn. 29:23; Mt. 23:12; Lk. 14:11; Yaɛ. 4:6, 10; 1 Bṭ. 5:5.

15 Iwyen as-dd iḥenjiren imeẓyanen ḥima ad ten isřuf. Umi ten ẓrin imeḥḍaren, webbxen ten. ◘18:15 [Mt. 19:13-15; Mk. 10:13-16] — Mt. 19:13; Mk. 10:13. 16 Maca Yasuɛ iřaɣa xasen, inna asen: “Jjem iḥenjiren ad ɣari dd-asen, war ten ttᵉṭṭfem, minzi Tageldit n ijenwan i yinni am yina. ◘18:16 Mt. 18:3; 19:14; 1 Kur. 14:20; 1 Bṭ. 2:2. 17 S tidett, Necc ad awem iniɣ: Wenni war iqbiřen Tageldit n AREBBI am uḥenjir war tt ittidef ɛemmarṣ!”

18 Isseqsa t ijj n umeqqran, inna as: “A Amseɣɣar Aṣebḥan, min ɣa ggeɣ, ḥima ad warteɣ Tudart ittduman?” ◘18:18 [Mt. 19:16-30; Mk. 10:17-31] — Mt. 19:16; Mk. 10:17. 19 Inna as Yasuɛ: “Mayemmi d ayi třaɣid s ‘Aṣebḥan’? Uřa d ijj war iǧi d aṣebḥan mɣir ijjen, aqa-t d AREBBI. 20 Cek tessned tiweṣṣa: War zenni, war neqq, war tticar, war cehhed s ẓur, weqqar babac d yemmac!” ◘18:20 Uf. 20:12-16; Aɛwd. 5:17-20; Rum. 13:9; Afa. 6:2; Kul. 3:20. 21 Inna as: “Aqa marra tina ḥḍiɣ tent zi temẓi inu.” 22 Umi isřa Yasuɛ aya, inna as: “Ict teqqim ac. Uyur, zenz marra min ɣarek, farq i-t x imezřaḍ uca ad ɣarek yiři řkenz deg ijenwan, xenni ḍfar ayi-dd.” ◘18:22 Mt. 6:19; 19:21; 1 Tim. 6:19.

23 Umi isřa man aya, icḍen minzi tuɣa-t d bab n wagřa ameqqran. 24 Umi iẓra Yasuɛ belli netta icḍen, inna: “Mammec yewɛar x aytbab n wagřa maḥend ad dd-adfen ɣar Tgeldit n AREBBI. ◘18:24 Awřn. 11:28; Mt. 19:23; Mk. 10:23. 25 Minzi adaf n weřɣem zi tiṭṭ n tsineft ihwen x wadaf n bab n wagřa ɣar Tgeldit n AREBBI.” 26 Inni tuɣa ittesřan aya, nnan: “Wi izemmaren xenni ad ittwassenjem?” 27 Yasuɛ inna: “Min war izemmaren ad yiři ɣar iwdan, ɣar AREBBI izemmar ad yiři.” ◘18:27 Ayub 42:2; Irm. 32:17; Zak. 8:6; Lk. 1:37.

28 Inna asen Buṭrus: “Aqa neccin nejja kuřci uca neḍfar i Cek.” ◘18:28 Mt. 4:20; 19:27; Mk. 10:28; Lk. 5:11. 29 Yasuɛ inna as: “S tidett, Necc ad awem iniɣ, war din uřa d ijj i ittejjin taddart niɣ lwalidin niɣ tawmat, niɣ tamɣart niɣ tarrawt di ṭṭweɛ n Tgeldit n AREBBI, ◘18:29 Aɛwd. 33:9. 30 i war iksin aḍeffus x uḍeffus n tseqqar di řweqt-a, uca di zzman i dd ɣa yasen ad iksi Tudart ittduman.” ◘18:30 Ayub 42:12.

31 Yasuɛ iksi tenɛac n rrusul nnes ɣares, inna asen: “Ad ngeɛɛed ɣar Urcalim uca marra min yuran s ufus n inabiyyen x Mmis n bnadem ad ittwaqfeř. ◘18:31 [Mt. 20:17-19; Mk. 10:32-34] — Izhd. 22:7; Ica. 53:7; Mt. 16:21; 17:22; 20:17; Mk. 8:31; 9:31; 10:32; Lk. 9:22; 24:7. 32 Minzi Netta ad ittwasellem i řegnus, uca ad zzayes stehzan, ad xas ssusfen x uɣembub nnes, ◘18:32 Mt. 27:2; Lk. 23:1; Yḥ. 18:28; Řex. 3:13. 33 ad t hettken s urekkuḍ, ad t sseḥqaren, ad t nɣen uca deg wass wiss třata ad dd-ikkar.” 34 Nitni war fhimen walu zi man aya. Tuɣa awař-a iwɛar xasen, u nitni war fhimen min d asen ittwannan.

35 Ařami dd-qarrben ɣar Ariḥa tuɣa ijj n udarɣař iqqim deg webrid, ittᵉttar. ◘18:35 [Mt. 20:29-34; Mk. 10:46-52] — Mt. 20:29; Mk. 10:46. 36 Řami isřa i řḥess n řɣaci iɛdu, isseqsa: “Man aya?” 37 Nnan as: “Yeccu Nnaṣiri iɛeddu.” 38 Iřaɣa, inna: “A Yasuɛ, a Mmis n Dawud, arḥem ayi!” 39 Inni tuɣa igguren ɣar zzat n Yasuɛ, webbxen t maḥend ad isqar, maca netta ibda ittřaɣa s jjehd ktar: “A Mmis n Dawud, arḥem ayi!” 40 Ibedd Yasuɛ uca yumur ad t-i-dd-awyen ɣares. Umi dd ɣares iqarreb, isseqsa t, 41 inna as: “Min texsed ad ac t ggeɣ?” Inna: “A Sidi, xseɣ ad dewřeɣ ttwařiɣ!” 42 Inna as Yasuɛ: “Twařa, aqa l’iman nnec issgenfa cek.” 43 Řexdenni ittwařa uca iḍfar i-t, issemɣara di AREBBI. Marra iwdan i iẓrin man aya, ssɛuǧen AREBBI.