1 S uyenni beɛɛdem x marra min iǧan d aɛeffan, x ɛřam kuř taḥraymect d nnifaq d řeḥsed u x uceqqef. ◘2:1 Mt. 18:3; Rum. 6:4; 1 Kur. 14:20; Afa. 4:23; Kul. 3:8; Ɛbr. 12:1. 2 Iřim am iseyman itteṭṭḍen, weḥḥcem Awař am uɣi izdigen d arruḥani, ḥima ad zzayes tegmam i Tudart, 3 mařa aqa kenniw tᵉqqasem u tᵉttwařam aqa SIDI iṣbeḥ. ◘2:3 Izhd. 34:9. 4 Netta d Wenni ɣar dd-tᵉttakkwaḍem, Aẓru Iddaren, wenni mmenḍaren iwdan, maca ɣar AREBBI aqa-t ittwafarz iɣřa. ◘2:4 Afa. 2:20. 5 Ammu kenniw ɛawed, am yiẓra iddaren, jjem ad zzaywem tᵉttwabnant tizawiyyin n Arruḥ, ad tiřim d ikehhanen iqeddsen, ḥima ad tewcem tiɣarṣin n Arruḥ i arḍa n AREBBI s Yasuɛ Lmasiḥ. ◘2:5 Rum. 12:1; Ɛbr. 3:6; 12:28; Asa. 1:6; 5:10. 6 S uyenni ittwanna di Tira Iqeddsen:

“Aqa da, ad ssarseɣ di Ṣihyun

ijj n weẓru iɣřa am uzeǧif n teɣmart,

uca wenni i zzayes ɣa yamnen,

war dayes ittidef useḍḥi ɛemmarṣ.” ◘2:6 Ica. 28:16.

7 I kenniw, inni ittamnen, aqa temmewc ccenɛet-a, maca i yinni war yuminen, aqa-tt d Taṣḍart n uneqraḍ d Aẓru n unedref. ◘2:7 Izhd. 118:22; Ica. 8:14; Mt. 21:42; Řex. 4:11; Rum. 9:33. 8 Uca nitni ttneqraḍen dayes, minzi war ttimnen deg Wawař, am mammec d asen yura. ◘2:8 Ica. 8:14.

9 Maca kenniw teǧam d ijj n jjiř ittwafarzen, tᵉttsexxarem am ikehhanen i Tgeldit, kenniw d ijj n řgens iqeddsen, ijj n umuni ittwafdin, maḥend ad tbarrḥem asemɣar n Wenni d aneɣ dd-iřaɣan zi taǧest ɣar ufeyyeḍ n Tfawt nnes. ◘2:9 Uf. 19:5; Aɛwd. 7:6; 14:2; 26:18; Afa. 1:14; Asa. 1:6; 5:10. 10 Kenniw war tᵉttwiḥsibem am řgens, maca řexxu aqa kenniw d řgens n AREBBI. Ɛawed tuɣa arreḥmet war kenniw třeḥḥef, maca řexxu tᵉttwafarreɣ-dd xawem arreḥmet nnes. ◘2:10 Ḥuc. 2:1; 2:25; Rum. 9:26.

11 A imɛizzen inu, aqa kenniw d ibarraniyyen d imeɛzab, x uyenni ziyyareɣ xawem, war ḍeffarem ca nnecwat n arrimet nni ittmenɣan ak-d řeɛmar nwem. ◘2:11 Rum. 13:14; Gal. 5:16. 12 Uyurem nican zzat i marra tarwa n bnadem inni xawem ittɛawaden řexburat tiɛeffanin, ařami ɣa ẓaren řexdayem nwem tiṣebḥanin, ad ssemɣaren di AREBBI deg wass n uqeǧeb. ◘2:12 Mt. 5:16; Lk. 1:68; 19:44; Rum. 12:17; 2 Kur. 8:21; Fil. 2:15; Tit. 2:8; 1 Bṭ. 3:16.

13 Ṭṭaɛem i marra bnadem di ṭṭweɛ n AREBBI: i ijeǧiden zi ssibbet n ṣṣulṭa i ɣarsen teǧa, ◘2:13 Rum. 13:1; Tit. 3:1. 14 u i řquḍat, minzi nitni ttwassekken zzayes, ḥima ad ɛaqben iɛeffanen, u ḥima ad ssemɣaren inni itteggen taṣebḥant. 15 Minzi man aya ittexs i-t AREBBI, ḥima, xmi ɣa teggem min iṣebḥen, ad tesseɣdem aqemmum n iwdan ifɣař i war issinen AREBBI, ◘2:15 Tit. 2:8. 16 am tarwa n bnadem nni iddaren nican di tiřelli, war iǧi am yinni iggin tiřelli nsen am yijj n uřeḥḥaf x tuɛeffna nsen, maca am imsexxaren n AREBBI. ◘2:16 Yḥ. 8:32; Rum. 6:18; Gal. 5:1. 17 Weqqarem marra iwdan, sɛizzem tawmat, ggʷedem AREBBI, cennɛem ijeǧiden. ◘2:17 Mt. 22:21; Rum. 12:10; Afa. 4:3; Ɛbr. 13:1; 1 Bṭ. 1:22; 5:5.

18 Jjem inni d imsexxaren jar awem ad ṭṭaɛen i aytbab nsen s tiggʷudi, war iǧi i yinni iṣebḥen iḍarfen waha, maca ɛawed i yinni iqesḥen d yewɛaren. ◘2:18 Afa. 6:5; Kul. 3:22; 1 Tim. 6:1; Tit. 2:9. 19 Minzi imsexxaren am ina ad dd-asen i AREBBI ɣar řxaḍar nnes, minzi nitni ksin tamara nni war tt isdihiǧen, di ṭṭweɛ n tnefsect tecna. ◘2:19 Mt. 5:10. 20 Man ccan i din i yinni iksin tamara zi ssibbet n iɛeddiyen nsen? Maca mařa kenniw teggim tcuni, am daywem tteggen tuɛeffna, aqa man aya issemɣar ccan nwem ɣar AREBBI. ◘2:20 1 Bṭ. 3:14; 4:14. 21 Minzi kenniw tᵉttwařaɣam-dd i man aya umi immut Lmasiḥ di ṭṭweɛ nneɣ uca ijja aneɣ-dd lmital-a, ḥima ad nuyur di jjurret n iḍaren nnes: ◘2:21 Yḥ. 13:15; Fil. 2:5; 1 Yḥ. 2:6. 22 Netta war iggi ca ddnub u war ittwif deg uqemmum nnes ca n řɣecc, ◘2:22 Ica. 53:9; 2 Kur. 5:21; 1 Yḥ. 3:5. 23 Wenni, mařa zawaren t, war dd-ittarri awař, u mařa iweddeb, war dd-ittarri ca ddenf, maca ittarra ddeɛwet nnes ɣar Řqaḍi n tsegda, ◘2:23 Mt. 27:39; Yḥ. 8:48,49. 24 Wenni iksin ddnub nneɣ s Yixef nnes uca issgeɛɛed i-ten di arrimet nnes x ṣṣalib. Maɣar mařa nemmut i ddnub, ad neddar di tsegda nnes, minzi kenniw aqa tᵉttwassgenfam s iyezzimen nnes. ◘2:24 Ica. 53:4; Mt. 8:17; Rum. 6:11. 25 Minzi kenniw tuɣa tweddarem am yiḥuřiyyen, řexxu maca tdewřem-dd ɣar Umeksaw d Umeḥḍay n řeɛmur nwem. ◘2:25 Ica. 53:6; Ḥiz. 34:6; Lk. 15:4.