1 Nessargeb i kenniw, aytmatneɣ, arḍa n AREBBI i immewcen i tmesmunin di Makiduniya, 2 maɣar umi xasen dd-ikka uqeǧeb imɣar n řmeḥnet nsen, tfeyyeḍ řefraḥet nsen, u aṭṭas n wagřa n tecrimet nsen iɛdu zzeřḍ nsen imɣaren, 3 minzi cehhdeɣ, aqa ɛlaḥsab jjehd nsen u ɛad sennej i jjehd nsen - řami ttexsen s wuř nsen - 4 aqa zawgen aneɣ s jjehd maḥend ad carcen di arḍa n tsexxart n imqeddasen. ◘8:4 Řex. 11:29; Rum. 15:26; 1 Kur. 16:2; 2 Kur. 9:1. 5 Uca nitni war ggin min tuɣa nessitim waha, maca aqa wcin ixef nsen amezwar i Siditneɣ, xenni uřa i neccin ɛlaḥsab min ixs AREBBI, 6 ařami nzaweg Titus, am mammec tuɣa ibda qbeř, ḥima ad ikemmeř ɣarwem uřa d tecrimet-a n ṣṣdaqi. 7 Maca am mammec tfeyyḍem di marra - di l’iman, deg wawař, di tussna, di marra cḍaret, u di tewhibt n tayri nneɣ i ɣarwem iǧan - ittxeṣṣa ad tfeyyḍem ɛawed di tecrimet-a n ṣṣdaqi.

8 War ttumureɣ kenniw waha, maca arezzuɣ ad qeǧbeɣ tidett n tayri nwem s cḍaret n imeddukkař nwem di l’iman. 9 Minzi aqa tessnem arḍa n Siditneɣ Yasuɛ Lmasiḥ, belli idweř d amezřuḍ di ṭṭweɛ nwem, waxxa tuɣa-t s wagřa, ḥima kenniw ad tdewřem d twajjar s zzeřḍ nnes. 10 Ad kenniw weṣṣiɣ mliḥ - minzi man aya i nnfeɛ nwem - maḥend min tebdam ad tenwam deg useggʷas iɛdun, ad t teggem ɛawed. 11 Kemmřem řexxu s tmegga min tuɣa tenwam, kemmřem s tmegga min tuɣa kenniw tᵉmmeẓrem ad t teggem ɛlaḥsab min iǧan ɣarwem. 12 Maca mařa din meẓri, aqa ittwajeb ɛlaḥsab min ɣares, war iǧi ɛlaḥsab min war ɣares iǧi. ◘8:12 Awřn. 3:28; Mt. 12:43; Lk. 21:3; 1 Bṭ. 4:10. 13 Minzi war ittřiq ḥima ad din tiři řefsaset i inneɣni u ad xawem tiři řmeḥnet, 14 maca ḥḍam ad tiwḍem ɣar řmizan di řweqt-a, uca ejj afeyyeḍ nwem ad iɛemmar řeɣben nsen di řweqt-a, ařami afeyyeḍ nsen di man aya ad iɛemmer řeɣben nwem, ḥima xenni ad yiři řmizan, 15 am mammec tura:

“Wenni issmunen aṭṭas,

war d as iceṭṭ ca,

d wenni tuɣa iyarrwen drus,

war dayes iqqim řexṣeṣ.” ◘8:15 Uf. 16:18.

16 Maca aqadi i AREBBI wenni iggin cḍaret-a xawem deg wuř n Titus, 17 minzi iqbeř tutra nneɣ uca, am tuɣa dayes amnus xawem, iṭṭewweɛ maḥend ad ɣarwem dd-yas. 18 Uca nessekk-dd akides ɛawed umatneɣ wenni ɣar iǧa uweqqar di L’Injil di marra timesmunin, 19 wenni ittwafarzen zi ssibbet-a s jjehd zi tmesmunin maḥend ad yuyur akidneɣ ak-d tecrimet-a n ṣṣdaqi i ittwaggen s tsexxart nneɣ i uɛuǧi n AREBBI u i ucejjeɛ i neccin.

20 Maca nḥeṭṭa maḥend war d aneɣ iḍeǧem ḥed mařa nseyyar tacrimet-a n ṣṣdaqi ifeyyḍen, 21 ḥima min d aneɣ icqan ad iɛdu mliḥ, war iǧi waha qibač i AREBBI maca ɛawed zzat i iwdan. ◘8:21 Rum. 12:17. 22 Nessekk ɛawed akidsen umatneɣ, wenni d aneɣ isscanen řebda deg waṭṭas n tmesřayin, aqa netta ittceṭṭar, maca řexxu ittceṭṭar ktar minzi netta ittcař xawem aṭṭas. 23 Mařa xenni Titus d amɛacar inu d umɛawen inu jar awem, u mařa xenni aytmatneɣ nneɣni aqa aten d rrusul n tmesmunin n uɛuǧi n Lmasiḥ, 24 ejj xenni taqeǧebt n tayri nwem u n usemɣar nneɣ daywen zi jjihet n tmesřayin-a ad teffeɣ ɣar barra zzat i marra tmesmunin.