1 Zi jjihet n wesmuni n ṣṣdaqi i imqeddasen, ggem kenniw ɛawed am mammec ḍebbreɣ i-tt-i-dd di tmesmunin n Galaṭiya. 2 Kuř ass amezwar n ssimana kuř ijjen zzaywem ad iḥuz ca n tesɣart di taddart nnes uca ad tt ixemmeř ɛlaḥsab mammec iwesseɛ, ḥima, xmi dd ɣa awḍeɣ, war ibeddi ɛad řexdenni wesmuni n ṣṣdaqi. ◘16:2 Řex. 11:29; 2 Kur. 8:4; 9:1. 3 Uca xmi dd ɣa awḍeɣ, ad ssekkeɣ inni i ɣa tfarzem kenniw ak-d tebrat, ḥima ad awyen tacrimet n ṣṣdaqi nwem ɣar Urcalim. 4 Uca mařa tuɣa icuwwar ad raḥeɣ necc ɛawed dinni, xenni ad kkaren ad raḥen akidi.

5 Ad ɣarwem dd-aseɣ xmi dd ɣa kkeɣ x Makiduniya. Minzi ad dd-kkeɣ x webrid n Makiduniya, ◘16:5 2 Kur. 1:15. 6 uca mařa izemmar ad qqimeɣ akidwem niɣ ad sseɛduɣ řmecta akidwem, ḥima xenni kenniw tzemmarem ad ayi tessqebbḍem mani ɣa raḥeɣ. 7 Minzi war xseɣ ad kenniw ẓareɣ řexxu am dd xawem i ɣa kkeɣ abrid waha, minzi ssitimeɣ ad qqimeɣ akidwem ca n řweqt, mařa ismeḥ Sidi inu. 8 Maca ad qqimeɣ ɛad di Afasus ař ass n Řɛid n Xemsin n Wussan. 9 Minzi aqa tennurzem ayi-dd tewwart tameqqrant, maca aqa din ijj n ubarru n řɛedyan.

10 Mařa yiweḍ-dd Timutiyu ɣarwem, ḥḍam maḥend izemmar ad din yiři jar awem břa tiggʷudi, minzi netta ittegg řxedmet n SIDI am necc. 11 S uya uřa d ijjen ad t isseḥqar, maca qebbḍem t di řehna, ḥima ad ɣari dd-yas, minzi necc ttrajiɣ t ak-d wawmaten.

12 Zi jjihet n tawmat Apullus, a awmaten inu, aqa zawgeɣ t aṭṭas, ḥima ad ɣarwem dd-yas ak-d wawmaten, maca netta tuɣa war iɛewweř ad dd-yas řexxu, maca ad dd-yas xmi d as i ɣa isarreḥ řweqt.

13 Ḥḍam, beddem nican di l’iman, ḥezmem s teryast, iřim tmeḥḍem.

14 Jjem marra min tᵉtteggem ad yiři s tayri.

15 Ttzawgeɣ kenniw, a aytma, zi jjihet n twacunt n Stifanus, maɣar tessnem aqa aten d ṣṣabet tamezwarut n Axaya, u nitni ṭewwɛen ixef nsen i tsexxart di ṭṭweɛ n imqeddasen, 16 aqa ggem ixef nwem sadu ufus n yinni am nitni uca sadu kuř ijjen i ixeddmen akidneɣ u i d aneɣ ittɛawanen.

17 Aqa farḥeɣ s twasit n Stifanus d Furtunatus d Axayikus, minzi nitni kemmřen min d ayi ittxeṣṣan daywem, 18 s minzi nitni ssareyyḥen arruḥ inu d wenni nwem. Weqqarem iryazen am yina.

19 Marra timesmunin n Asiya ttseǧament-i-dd xawem s řehna.

Akwila d Priskilla ak-d tmesmunt i iǧan di taddart nsen ttseǧamen-dd xawem s řehna aṭṭas di Siditneɣ.

20 Ttseǧamen-dd xawem marra awmaten nneɣ s řehna.

Ttseǧamem-dd x wayawya s řehna s usudem iqeddsen. ◘16:20 Rum. 16:16; 2 Kur. 13:12; 1 Ts. 5:26; 1 Bṭ. 5:14.

21 Ijj n sřam i ttariɣ s ufus inu, zi Bulus.

22 Mařa ḥed war ittexs Siditneɣ Yasuɛ Lmasiḥ, ad yiři d amenɛuř. Siditneɣ aqa yusa-dd! ◼16:22 Maran-ata - awařen-a xsen ad inin: ‘A Siditneɣ, as-dd’ niɣ ‘Siditneɣ aqa yusa-dd!’ 23 Arḍa n Siditneɣ Yasuɛ Lmasiḥ ad yiři akidwem. 24 Tayri inu aqa-tt akidwem marra di Lmasiḥ Yasuɛ. Amin.