1 Bulus, rrasul n Yasuɛ Lmasiḥ ɛlaḥsab řxaḍar n AREBBI, d tawmat Timutiyu, i tmesmunt n AREBBI i iǧan di Kurintus u i marra imqeddasen inni iǧan di marra Axaya: ◼1:1 rrasul - niɣ ‘amazan’.  ◘1:1 Fil. 1:1. 2 Ad kidwem yiři arḍa d řehna n AREBBI, Babatneɣ, u n Siditneɣ Yasuɛ Lmasiḥ. ◘1:2 Rum. 1:7; 1 Kur. 1:3; Afa. 1:2; 1 Bṭ. 1:2.

3 Lbaraka aqa-tt i AREBBI, Babas n Siditneɣ Yasuɛ Lmasiḥ, Babas n arreḥmet d AREBBI n marra afewwej. ◘1:3 Afa. 1:3; 1 Bṭ. 1:3. 4 Netta issfewwaj aneɣ di marra řmeḥnet nneɣ, ḥima uřa d neccin nqedd ad nessfewwej x yinni iǧan di mammec ma teǧa řmeḥnet am neccin, s ufewwej i zi nettwassfewwej zi AREBBI. ◘1:4 2 Kur. 7:6. 5 Minzi amen ifeyyeḍ dayneɣ aweddeb n Lmasiḥ, ammu ifeyyeḍ ɛawed ufewwej nneɣ s Lmasiḥ. ◘1:5 Izhd. 34:20; 94:19. 6 Maca ɛawed mařa ḥṣaren aneɣ, aqa nettwaḥsar i ufewwej nwem u i Tudart nwem. U mařa nettwafewwej, aqa d man aya ḥima ad tᵉttwassfewwjem uřa d kenniw, maḥend ad ɣarwem yiři ṣṣabr ařami tzemmarem ɛawed ad teksim aweddeb am neksi uřa d neccin aweddeb. ◘1:6 2 Kur. 4:17. 7 Asitem nneɣ i kenniw imten, minzi nessen mařa tcarrcem deg uweddeb, ad tcarcem uřa deg ufewwej.

8 A kenniw, aytmatneɣ, neccin nexs ad tessnem x řmeḥnet i xaneɣ dd-ikkin di Asiya, aqa tekka-dd xaneɣ řmeḥnet sennej x tzemmar nneɣ, ařami ɛřaḥař neqḍeɛ řayas zi tudart nneɣ. ◘1:8 Řex. 19:23. 9 Aqa neḥkem x yixef nneɣ s řmewt, ḥima war nettiqqi ca deg ixef nneɣ, maca di AREBBI wenni dd-issnekkaran imettinen. ◘1:9 Irm. 17:5, 7. 10 Netta aqa ifekk aneɣ zi řmewt ineqqen uca nettraja ad aneɣ ifekk twařa nneɣni ◘1:10 1 Kur. 15:31. 11 s uɛawen n tẓaǧitin nwem xaneɣ, maḥend ad tiři tawhibt nnes i neccin d lbaraka i waṭṭas, ḥima aṭṭas ad as qadan zi ssibbet nneɣ. ◘1:11 Rum. 15:30; 2 Kur. 4:15; Fil. 1:19.

12 Minzi wa d asemɣar nneɣ, cchadet n tnefsect nneɣ, belli aqa aneɣ neggur di ddunect s ṣfa d tazdugi, war iǧi s tiɣit n bnadem, maca di arḍa n AREBBI, d amezwaru i kenniw. 13 Minzi war d awem nuri uřa d ict n tmesřact mɣir min tessnem u ad as tfehmem, iwa ssitimeɣ ad tfehmem ař aneggaru, 14 am mammec ɛawed tfehmem zzayneɣ drus belli aqa aneɣ d asemɣar nwem, am mammec uřa d kenniw d asemɣar nneɣ deg wass n Siditneɣ Yasuɛ Lmasiḥ.

15 Di řaman-a tuɣa xseɣ ad ɣarwem dd-aseɣ qbeř, ḥima ad ɣarwem yiři arḍa tnayen n tseqqar. ◘1:15 1 Kur. 16:5. 16 Tuɣa xseɣ ad ɣarwem dd-usiɣ deg webrid ɣar Makiduniya. Awarni man aya tuɣa xseɣ ad ɣarwem dd-ɛeqbeɣ ɛawed zi Makiduniya, ḥima kenniw ad ayi tessqebbḍem ɣar Yahudiyya. 17 Řami tuɣa ɛewwřeɣ ad ggeɣ man aya, ma qeǧqeɣ? Niɣ min xarṣeɣ ad t ggeɣ, ma xarṣeɣ t ɛlaḥsab aysum inu, ařami dayes ittwaf ‘Wah, wah!’ uřa d ‘Lla, lla’? 18 Maca AREBBI d amtiqqi i yeǧa, ařami awař nneɣ i kenniw war iǧi ‘Wah!’ uřa d ‘Lla!’ ◘1:18 Mt. 5:37; Yaɛ. 5:12. 19 Minzi Mmis n AREBBI, Yasuɛ Lmasiḥ, wenni i zi ittwabarreḥ jar awem zzayneɣ, zzayi u zi Silwanus u zi Timutiyu, aqa Netta war iǧi d ‘Wah!’ uřa d ‘Lla!’, maca ‘Wah’ dayes i yeǧa. 20 Minzi marra lwuɛud n AREBBI, aqa aten d ‘Wah!’ dayes, di Lmasiḥ. S uyenni neqqar zzayes ɛawed ‘Amin!’ i uɛuǧi n AREBBI. 21 Maca AREBBI d wenni d aneɣ iḍmen akidwem di Lmasiḥ, aqa-t d Amedhun, nni i d aneɣ idhen. 22 Igga xaneɣ acemmiɛ nnes uca iwca aneɣ Arruḥ d řɛarbun deg wuřawen nneɣ. ◘1:22 Rum. 8:16; 2 Kur. 5:5; Afa. 1:13; 4:30.

23 Maca necc cehhdeɣ zzat i AREBBI x yixef inu, aqa tuɣa ayi d aḥnin xawem, řami war dd-usiɣ ɣar Kurintus. ◘1:23 Rum. 1:9; 9:1; 2 Kur. 11:31; Gal. 1:20; Fil. 1:8; 1 Ts. 2:5; 1 Tim. 5:21; 2 Tim. 4:1. 24 War iǧi minzi nettṣelleṭ x l’iman nwem, maca neccin d imsexxaren i řefraḥet nwem, minzi zi l’iman tbeddem tmetnem. ◘1:24 1 Bṭ. 5:3.