1 Qqareɣ tidett di Lmasiḥ, war ssxarriqeɣ ca, uca tanefsect inu tcehhed dayi s Arruḥ Iqeddsen, ◘9:1 Rum. 1:9; 2 Kur. 1:23; 11:31; Gal. 1:20; Fil. 1:8; 1 Ts. 2:5; 5:27. 2 belli ɣari acḍan imɣar d řeḥriq war ittbeddi deg wuř inu. 3 Tuɣa ttẓaǧiɣ meɛlik ufiɣ ttwaḥarrmeɣ di mummu inu x Lmasiḥ s ict nneɛřet di ṭṭweɛ n wawmaten inu, řaǧ inu zi jjihet n weysum n arrimet. ◘9:3 Uf. 32:32; Rum. 10:1. 4 arrawen n Israil, inni ittwaqebřen d mmis. Ɣarsen i yeǧa uɛuǧi, řɛuhud, Ccariɛa, tasexxart i iǧan di Zzawect Iqeddsen i ɣares dd-iqqnen, lwuɛud d řejdud. ◘9:4 Uf. 4:22; Aɛwd. 7:6; Rum. 2:17; 3:2; Afa. 2:12. 5 Zzaysen i dd-iban Lmasiḥ x webrid n weysum n arrimet wenni d AREBBI x marra. I Netta i ɣa yiři marra asemɣar d marra lbaraka i řebda qaɛ. Amin! ◘9:5 Irm. 23:6; Yḥ. 1:1; Řex. 20:28; Rum. 1:4; Ɛbr. 1:8, 9, 10.

6 Maca war iǧi ařami awař n AREBBI war yiwiḍ, minzi marra inni zi Israil war ǧin ca d Israil. ◘9:6 Řxř. 23:19; Yḥ. 8:39; Rum. 2:28; 3:3; 2 Tim. 2:13. 7 Uca uřa d marra nitni war ǧin ca d tarwa n Ibrahim, minzi nitni zi zzariɛet n Ibrahim, minzi ittwanna: “Di Isḥaq ad ac řaɣan zzariɛet.” ◘9:7 Amz. 21:12; Gal. 3:29; 4:23; Ɛbr. 11:18. 8 Man aya war ixs ad yini aqa tarwa ɛlaḥṣab jjadira n arrimet aqa-ten d tarwa n AREBBI, maca tarwa n lwaɛd ad ttwaḥesben d zzariɛet. ◘9:8 Gal. 4:28. 9 Minzi awař n lwaɛd d wa:

“Ɣar řweqt-a ad dd-aseɣ

uca ad ɣares yiři ɣar Sara mmis!” ◘9:9 Amz. 18:10.

10 Man aya war iǧi waha di tmesřact n Sara, maca uřa di tmesřact n Rifqa, umi tmun ak-d uyenni n bnadem nni, jedditeɣ Isḥaq, ◘9:10 Amz. 25:21. 11 tuɣa tizzar tettwassen řixḍaret n AREBBI umi tuɣa ɛad war dd-xřiqen iḥenjiren nnes, war zemmaren ad ggen ɛad řxar niɣ řɣar, ḥima war tᵉttiři tmesřact deg webrid n řexdayem, maca deg webrid n wenni ittřaɣan. 12 Maɣar ittwanna i Rifqa:

“Aqa ameqqran ad isexxar i umeẓyan!”, ◘9:12 Amz. 25:23.

13 am mammec tura:

“Yaɛqub i xseɣ, maca carheɣ Isu.” ◘9:13 Mal. 1:2-3.

14 Min ɣa nini xenni? Ma iqedd ad yiři ɣar AREBBI min war iseggden? Ɛemmarṣ! ◘9:14 Aɛwd. 32:4; 2 Im. 19:7; Ayub 34:10. 15 Xzar, Netta inna ɛawed i Musa:

“Ad areḥmeɣ wi xseɣ ad areḥmeɣ,

uca ad ḥinneɣ x wi xseɣ ad ḥinneɣ.” ◘9:15 Uf. 33:19.

16 Xenni tamesřact war teqqim ca ɣar wi ittexsen uřa ɣar wi ittazzřen, maca ɣar AREBBI wenni yareḥḥmen. 17 Minzi ɛlaḥsab Tira Iqeddsen inna Netta i firɛun:

“Aqa i man aya ssnekkareɣ-dd cek,

ḥima ad zzayek ssecneɣ jjehd inu,

uca ad ittwabarreḥ Isem inu

di marra ddunect.” ◘9:17 Uf. 9:16.

18 Xenni Netta ad yarḥem wi ixs, uca ad isseqseḥ wi ixs.

19 Iwa, ad taɣ ad tinid: Mayemmi ittcetca ɛad, minzi wi ɣa immɛařan ak-d min ixs Netta? 20 Maca min teɛnid cek, a bnadem, wenni ittqacaḥen AREBBI? Ma min ittwaggen izemmar ad ini i wenni t iggin: “Mayemmi d ayi teggid ammu?” ◘9:20 Ica. 29:16, 45:9; Irm. 18:6. 21 Ma war iǧi ɣar bu-třaxt ṣṣulṭa x třaxt ḥima ad igg zeg ict n řɛejnet ict n řqecɛet i lkarama u wenneɣni i ubehdeř? ◘9:21 Irm. 18:4-6; 2 Tim. 2:20. 22 Maɣar AREBBI, wenni tuɣa ixs ad isscen aɣḍab nnes d jjehd nnes, issiweḍ lɣaḍab nnes s waṭṭas n ttasiɛ n řxaḍar x řeqcuɛ n weɣḍab inni ittwasswejden marra i uhellek, 23 uca ifarɣ tayri nnes x řeqcuɛ n arreḥmet inni izwar issewjed i-ten i uɛuǧi i AREBBI! 24 Maɣar neccin d inni ittwařaɣan, war iǧi zeg Wudayen waha, maca ɛawed zi řegnus. 25 Am mammec ittwanna ɛawed di Ḥuciɛa:

“Ad semmiɣ i yinni war iǧin d řgens inu

‘Řgens inu!’,

uca i yinni war iǧin d amɛizz d ‘Amɛizz!’ ” ◘9:25 Ḥuc. 2:25

26 Ad yiři deg wemcan mani d asen ittwařaɣa:

‘War iǧi d řgens inu!’,

belli dinni ad asen řaɣan:

‘Arrawen n AREBBI iddaren!’ ◘9:26 Ḥuc. 2:1; 1 Bṭ. 2:10.

27 Maca Icaɛya ibarreḥ zi jjihet n ayt n Israil:

“Mařa tuɣa řqedd n ayt n Israil

anect n ijdi n řebḥar,

mɣir min i ɣa iqqimen ad injem.” ◘9:27 Ica. 10:22.

28 “Tamesřact tbedd nican u ad tᵉttwaqfeř,

SIDI ad tt igg x temmurt.” ◘9:28 Ica. 10:22, 23.

29 Am mammec izwar Icaɛya inna:

“Maɛlik SIDI n řɛeskarat war d aneɣ ijji

inni iqqimen ddaren,

iři nedweř am Sadum u narwes di Ɛamurra.” ◘9:29 Amz. 19:24; Ica. 1:9; 13:19; Irm. 50:40; Ḥiz. 16:46.

30 Min ɣa nini xenni? Ma xenni řegnus inni war yarezzun tasegda, aqa ksin tasegda? Iwa, maca tasegda tenni s l’iman. 31 Maca Israil nni iḍeffaren Ccariɛa n tsegda, war yiwiḍ ca ɣar Ccariɛa n tsegda. ◘9:31 Rum. 10:2; 11:7. 32 Mayemmi? Minzi tasegda nni war teǧi ca zi l’iman maca zi řexdayem n Ccariɛa, minzi nitni nderfen deg Weẓru n unedref, ◘9:32 Ica. 8:14; 1 Bṭ. 2:7 33 am mammec tura:

“Aqa ad ggeɣ di Ṣihyun Aẓru i unedref

d Weẓru i uneqrad.

Marra wi zzayes i ɣa yamnen,

war ittseḍḥa.” ◘9:33 Izhd. 2:12; 118:22; Awřn. 16:20; Ica. 8:14; 28:16; Irm. 17:7; Mt. 21:42; 1 Bṭ. 2:6.