8
Tamɣart tᵉttwaṭṭef tᵉttegg zzina
1 ... 2 Di ṣṣbeḥ yusa-dd ɛawed ɣar Zzawect Tameqqrant, usin-dd ɣares iwdan marra. Xenni am iqqim, ibda isseřmad i-ten. 3 Imseřmaden n idlisen d Ifarisiyyen iwyen as-dd ict n temɣart, tᵉttwaṭṭef tᵉttegg zzina. Ssbedden tt di řwesṭ, 4 nnan as: “A Amseɣɣar, tamɣart-a tᵉttwaṭṭef s bṭayṭay, tᵉttegg zzina. 5 Iweṣṣa Musa di Ccariɛa ad narjem timɣarin am tanita. Min ɣa tinid Cek?” ◘8:5 Lawi 20:10; Aɛwd. 22:22. 6 Nnan as aya ḥima ad t jarrben, ḥima ad ɣarsen tiři minzi xas i ɣa cetcan. Maca Yasuɛ yuḍar swadday, yura s uḍaḍ nnes di temmurt.
7 Řami qqimen ammu t ttesseqsan, ibedd, inna asen: “Wi zzaywem iǧan břa ddnub, ad xas inḍar aẓru amezwaru.” ◘8:7 Aɛwd. 17:7. 8 Xenni yuḍar ɛawed swadday uca yura di temmurt. ◘8:8 Irm. 17:13 9 Řami sřin man aya, ffɣen ijjen awarni wenneɣni, imeqqranen d amezwaru. Tamɣart nni ibedden di řwesṭ jjin tt weḥḥdes. 10 Řexdenni Yasuɛ ikkar, inna i temɣart: “Mani ǧan nitni? Ma war cem iḥakem uřa d ijjen?” 11 Nettat tenna: “Uřa d ijj, a SIDI!” Yasuɛ inna as: “Uřa d Necc war cem ttḥakameɣ ca. Ruḥ, war ttɛawad ad tegged ddnub zi ssa tsawent!” ◘8:11 Yḥ. 5:14.
Yasuɛ d Tafawt n ddunect
12 Issiweř Yasuɛ ɛawed akidsen, inna: “NECC d Tafawt n ddunect. Wenni d ayi ɣa iḍfaren, war iggur ɛemmarṣ di taǧest, maca ad yaf Tfawt n Tudart.” ◘8:12 Ica. 42:6, 16; Yḥ. 1:9; 9:5; 12:35, 36.
13 Nnan as Ifarisiyyen: “Cek tcehhded x Yixef nnec, cchadet nnec war teǧi ca d tidett.” 14 Yasuɛ yarra-dd, inna asen: “Ɛad mařa Necc cehhdeɣ x Yixef inu, cchadet inu aqa d tidett, minzi Necc ssneɣ manis dd-usiɣ u mani ɣa raḥeɣ, maca kenniw war tessinem ca manis dd-usiɣ uřa mani ɣa raḥeɣ. ◘8:14 Yḥ. 5:31. 15 Kenniw tᵉttḥakamem ɛlaḥsab ddat, Necc war ttḥakameɣ uřa x ijjen. 16 U Necc, mařa ḥakmeɣ, ad yiři řeḥkam inu d tidett, minzi Necc war ǧiɣ bu weḥḥdi, maca Necc d Baba wenni d ayi dd-issekken. 17 Tura ɛawed di Ccariɛa nwem, belli cchadet n tnayen n iwdan d tidett. ◘8:17 Řxř. 35:30; Aɛwd. 17:6; 19:15; Mt. 18:16; 2 Kur. 13:1; Ɛbr. 10:28. 18 NECC d wenni icehhden x Yixef inu, uca uřa d Baba wenni d ayi-dd issekken, iched xafi.” ◘8:18 Mt. 3:17; 17:5; Mk. 1:11; 9:7; Lk. 3:22; 9:35; Yḥ. 1:33; 5:37; 6:27. 19 Nitni nnan as: “Mani iǧa Babac?” Yasuɛ yarra-dd, inna asen: “Kenniw war d ayi tessinem ca u war tessinem Baba. Meɛlik kenniw d ayi tessnem, ad tiři tessnem uřa d Baba.” ◘8:19 Yḥ. 14:9; 16:3.
20 Inna awařen-a di mani tuɣa řexzen n ṣṣedqet, am tuɣa isseřmad di Zzawect Tameqqrant. War t iṭṭif uřa d ijj, minzi tasaɛɛet nnes tuɣa ɛad war dd-tiwiḍ. ◘8:20 Yḥ. 7:30.
21 Yasuɛ inna asen ɛawed: “Necc ad raḥeɣ, kenniw ad xafi tarzum, ad temmtem di ddnub nwem. Mani ɣa raḥeɣ Necc, war tzemmarem kenniw ad dd-tasem.” ◘8:21 Yḥ. 7:34; 13:33. 22 Udayen nnan: “Ma ad ineɣ Ixef nnes řexxu, minzi Netta inna: ‘Mani ɣa raḥeɣ Necc, war tzemmarem kenniw ad dd-tasem’?” 23 Netta inna asen: “Kenniw zi swadday, Necc zi sennej, kenniw zi ddunect-a, maca Necc war ǧiɣ ca zi ddunect-a. ◘8:23 Yḥ. 3:31. 24 Necc nniɣ awem, ad temmtem di ddnub nwem, maɣar mařa war tuminem ca aqa d Necc, ad temmtem di ddnub nwem.” ◘8:24 Yḥ. 8:21. 25 Udayen nnan: “Min teɛnid Cek?” Yasuɛ inna asen: “Waxxa Necc bdiɣ ad kidwem ssiwřeɣ - 26 uca Necc ɣari aṭṭas n tmesřayin i xef zemmareɣ ad xawem ssiwřeɣ uca ad xawem ḥekmeɣ - ittxeṣṣa ɛad ad tessnem, aqa Wenni d ayi dd-issekken aqa-t d tidett, uca min zzayes sřiɣ, ad t iniɣ i ddunect.” ◘8:26 Yḥ. 7:28; 15:15; Rum. 3:4. 27 Nitni war fhimen ca, belli tuɣa issawař akidsen x Babas. 28 Yasuɛ inna asen ɛawed: “Xmi ɣa tessgeɛɛdem Mmis n bnadem, ad tfehmem belli aqa d Necc, u belli war tteggeɣ uřa d ict n řḥajjet zeg Ixef inu, maca ssawařeɣ am mammec d ayi isseřmed Baba. ◘8:28 Řxř. 21:9; 2 Ij. 18:4; Yḥ. 3:11, 14; 7:16; 12:32, 49; 14:10. 29 Wenni d ayi dd-issekken aqa-t akidi. Baba war d ayi ijji ca weḥḥdi, minzi tteggeɣ řebda min t yarḍan.” ◘8:29 Yḥ. 14:10; 16:32. 30 Umi tuɣa issawař x tmesřayin-a, umnen dayes aṭṭas. ◘8:30 Yḥ. 7:31.
Ayt n Ibrahim
31 Xenni inna Yasuɛ i Wudayen nni dayes yumnen: “Mařa teqqimem tᵉṭṭfem deg wawař inu, ad tiřim s tidett d imeḥḍaren inu, 32 uca ad tessnem tidett uca tidett ad kenniw tḥarr.” ◘8:32 Rum. 6:18; Gal. 5:1; 1 Bṭ. 2:16. 33 Nnan as: “Neccin d zzariɛet n Ibrahim, ɛemmarṣ war neɛbid ḥed s tesmuɣi. Mammec tzemmared ad tinid: ‘Kenniw ad tᵉttwaḥarrem’?” ◘8:33 Mt. 3:9. 34 Yasuɛ yarra-dd xasen: “S tidett, s tidett, Necc ad awem iniɣ, marra wenni itteggen ddnub netta d amsexxar n ddnub. ◘8:34 Rum. 6:20; 2 Bṭ. 2:1. 35 Amsexxar war ittɣimi ca di taddart řebda, maca Mmis ad din iqqim i řebda. 36 Xmi kenniw i ɣa iḥarr Mmis, ad tiřim s tidett d iḥurriyyen. ◘8:36 Rum. 8:2.
37 Necc ssneɣ, aqa kenniw d tarwa n Ibrahim, maca kenniw tarezzum ad ayi tenɣem, minzi awař inu war tzemmarem ad t tfehmem. 38 Necc ssawařeɣ s min ẓriɣ zi Baba. Uřa d kenniw tᵉtteggem zi min teẓrim zi babatwem.” ◘8:38 Yḥ. 3:11; 7:16; 12:49; 14:10, 24. 39 Arrin-dd, nnan as: “Babatneɣ d Ibrahim.” Inna asen Yasuɛ: “Maɛlik kenniw teǧim d tarwa n Ibrahim, ad yiři aqa tᵉtteggem řexdayem n Ibrahim. ◘8:39 Rum. 2:28; 9:7. 40 Maca řexxu tarezzum ad ayi tenɣem, Necc d ijj n Bnadem i tuɣa akidwem issawařen s tidett i sřiɣ zi AREBBI. Man aya war t iggi ca Ibrahim. ◘8:40 Yḥ. 17:17. 41 Kenniw tᵉtteggem řexdayem n babatwem.” Nitni nnan as: “Neccin war dd-nexřiq ca zi farq-ccɣeř, aqa ɣarneɣ Ijjen wenni d Babatneɣ, aqa-t d AREBBI.”
Ayt n ibřis
42 Inna asen Yasuɛ: “Maɛlik AREBBI d Babatwem, iři aqa texsem ayi, minzi Necc ffɣeɣ-dd zi AREBBI. Necc war dd-usiɣ ca zeg Ixef inu, maca Netta issekk ayi-dd. ◘8:42 Yḥ. 5:43; 7:29. 43 Mayemmi war tefhimem i wawařen inu? Minzi kenniw war tzemmarem ad tesřem i wawařen inu! 44 Aqa kenniw teffɣem zi babatwem, ibřis, uca texsem ad teggem imeẓran n babatwem. Netta tuɣa ineqq iwdan zeg umezwaru u war ibedd di tidett, minzi war dayes bu tidett. Meřmi ma issawař s uxarriq, issawař s min dayes, minzi netta d bu-ixarriqen uřa d babas n uxarriq. ◘8:44 Amz. 3:1; 2 Kur. 11:3; 1 Yḥ. 3:8. 45 Maca umi Necc qqareɣ awem tidett, kenniw war dayi tᵉttimnem ca. 46 Wi zzaywem ad ayi isseqneɛ x ddnub? Umi qqareɣ tidett, mayemmi war dayi tᵉttimnem ca? 47 Wenni iǧan zi AREBBI, ittesřa i wawařen n AREBBI. Minzi kenniw war teǧim ca zi AREBBI, s uyenni kenniw war tᵉttesřim ca.” ◘8:47 Yḥ. 6:37; 10:26, 27; 1 Yḥ. 4:6.
Yasuɛ tuɣa-t din qbeř Ibrahim
48 Udayen arrin-dd, nnan as: “Ma war iǧi nican umi nenna, aqa Cek zi Samarya u dayek ijj n cciṭan?” ◘8:48 Yḥ. 7:20; 10:20. 49 Yasuɛ yarra-dd, inna: “Necc war dayi uřa d ijj n cciṭan, maca Necc ttweqqareɣ Baba, uca kenniw tesseḥqaram ayi. ◘8:49 Yḥ. 7:18. 50 Necc war arezzuɣ ca aɛuǧi inu. Aqa din Ijjen i xas yarezzun d wenni i ɣa iḥekmen. 51 S tidett, s tidett, Necc ad awem iniɣ: Mařa ca n yijjen iṭṭef deg wawař inu, ɛemmarṣ war ittwiři řmewt i řebda.” ◘8:51 Yḥ. 5:24; 11:25. 52 Nnan as Wudayen: “Řexxu nessen belli dayek ijj n cciṭan. Aqa Ibrahim d inabiyyen mmuten. Cek teqqared: ‘Mařa ca n yijjen iṭṭef deg wawař inu, ɛemmarṣ ad iqqas řmewt i řebda!’ 53 Ma Cek temɣared x jedditneɣ Ibrahim wenni immuten, uřa x inabiyyen nni immuten? Min tḥesbed Ixef nnec?” ◘8:53 Ɛbr. 11:13. 54 Inna asen Yasuɛ: “Mařa Necc ssɛuǧiɣ Ixef inu, aɛuǧi inu war iǧi d walu. Baba, aqa issɛuǧa ayi, Wenni xef teqqarem: ‘Netta d AREBBI nneɣ!’ 55 Kenniw war t tessinem, maca Necc aqa ssneɣ t. Mařa nniɣ: ‘War t ssineɣ!’, ad iřiɣ Necc d bu-ixarriqen am kenniw. Maca Necc ssneɣ t u ttᵉṭṭfeɣ deg wawař nnes. 56 Jedditwem Ibrahim tuɣa ittraja s řefraḥet ḥima ad iẓar ass inu, uca iẓra i-t, ifarḥ.” ◘8:56 Amz. 17:17; Lk. 10:24; Ɛbr. 11:13. 57 Nnan as Wudayen: “Ɛad war ɣarek bu xemsin n iseggʷusa, mammec teggid teẓrid Ibrahim?” 58 Inna asen Yasuɛ: “S tidett, s tidett, Necc ad awem iniɣ, qbeř ma tuɣa Ibrahim, tuɣa NECC ǧiɣ.” 59 Xenni ksin iẓra ḥima ad t arejmen. Maca Yasuɛ issnuffar Ixef nnes uca iffeɣ zi Zzawect Tameqqrant am icuq di řwesṭ nsen, uca ammu i iruḥ. ◘8:59 Lk. 4:29; Yḥ. 10:31,39; 11:8.
◘8:5 8:5 Lawi 20:10; Aɛwd. 22:22.
◘8:7 8:7 Aɛwd. 17:7.
◘8:8 8:8 Irm. 17:13
◘8:12 8:12 Ica. 42:6, 16; Yḥ. 1:9; 9:5; 12:35, 36.
◘8:17 8:17 Řxř. 35:30; Aɛwd. 17:6; 19:15; Mt. 18:16; 2 Kur. 13:1; Ɛbr. 10:28.
◘8:18 8:18 Mt. 3:17; 17:5; Mk. 1:11; 9:7; Lk. 3:22; 9:35; Yḥ. 1:33; 5:37; 6:27.
◘8:26 8:26 Yḥ. 7:28; 15:15; Rum. 3:4.
◘8:28 8:28 Řxř. 21:9; 2 Ij. 18:4; Yḥ. 3:11, 14; 7:16; 12:32, 49; 14:10.
◘8:32 8:32 Rum. 6:18; Gal. 5:1; 1 Bṭ. 2:16.
◘8:34 8:34 Rum. 6:20; 2 Bṭ. 2:1.
◘8:38 8:38 Yḥ. 3:11; 7:16; 12:49; 14:10, 24.
◘8:44 8:44 Amz. 3:1; 2 Kur. 11:3; 1 Yḥ. 3:8.
◘8:47 8:47 Yḥ. 6:37; 10:26, 27; 1 Yḥ. 4:6.
◘8:53 8:53 Ɛbr. 11:13.
◘8:56 8:56 Amz. 17:17; Lk. 10:24; Ɛbr. 11:13.
◘8:59 8:59 Lk. 4:29; Yḥ. 10:31,39; 11:8.