1 Setta n wussan qbeř Řɛid n Tɣarṣt n Useɛdu, yusa-dd Yasuɛ ɣar Bayt-Ɛanya, mani tuɣa iǧa Aliɛazar, wenni dd-issnekkar Yasuɛ zi taddart n imettinen. ◘12:1 [Mt. 26:6-13; Mk. 14:3-9] — Mt. 26:6; Mk. 14:3; Lk. 7:37; Yḥ. 11:2. 2 Ggin as din ijj n umensi. Marta tuɣa tsexxar, u Aliɛazar tuɣa d ijjen zeg inni akides iqqimen ɣar ṭṭabřa. 3 Teksi-dd Maryam ijj n uɣarraf n zzect i wedhan zi řeɛṭur n ṣṣenbel teṣfa tiɣřa, tedhen iḍaren n Yasuɛ, xenni temseḥ iḍaren nnes s ucuwwaf nnes. Taddart teccur s řefwaḥet n zzect n wedhan. 4 Ijjen zeg imeḥḍaren nnes wenni umi qqaren Yahuda Isxariyuṭi wenni t i ɣa iɣdaren, inna: 5 “Mayemmi war temmenz ca řefwaḥet-a n ṣṣenbel s teřt mya n dinar, ḥima ad temmewc i imezřaḍ?” ◘12:5 Mk. 14:5. 6 Netta inna aya, war iǧi minzi cqan t imezřaḍ, maca minzi netta d aceffar, tuɣa ɣares ssenduq, uca yarbu min dayes immarsen. ◘12:6 Yḥ. 13:29. 7 Yasuɛ inna: “Jjem tt, aqa txemmeř i-tt i wass n wenḍeř inu. ◘12:7 Mk. 14:8. 8 Minzi imezřaḍ aqa aten řebda akidwem, maca Necc war kidwem ǧiɣ i řebda.” ◘12:8 Aɛwd. 15:11; Mt. 26:11; Mk. 14:7.

9 Aṭṭas n řɣaci zeg Wudayen sřin belli Yasuɛ aqa-t dinni. Usin-dd nitni, war iǧi ḥaca zi ssibbet n Yasuɛ, maca ɛawed ḥima ad ẓaren Aliɛazar, wenni dd-issnekkar zi taddart n imettinen. ◘12:9 Yḥ. 11:44. 10 Mcawaren imeqqranen n ikehhanen, ḥima ad nɣen uřa d Aliɛazar, 11 minzi aṭṭas n Wudayen ffɣen-dd zi ssibbet nnes uca umnen di Yasuɛ.

12 Tiwecca nnes, umi sřin aṭṭas n řɣaci inni dd yusin ɣar Řɛid belli Yasuɛ yusa-dd ɣar Urcalim, ◘12:12 [Mt. 21:1-11; Mk. 11:1-11; Lk. 19:28-40] — Mt. 21:8; Mk. 11:8; Lk. 19:36. 13 ksin ifetwan n tini uca ffɣen, ḥima ad t řqan, řaɣan:

“Uṣanna!

Sseɛd n Wenni dd-yusin

s Yisem n SIDI,

Ajeǧid n Israil!” ◘12:13 Izhd. 118:25, 26; Mt. 21:9; Mk. 11:9, 10

14 Yufa Yasuɛ ijj n wesnus uca inya xas, am mammec tura:

15 “War tteggʷed ca, a yeǧis n Ṣihyun,

xzar, Ajeǧid nnem ad dd-yas,

iqqim x wesnus, aḥenjir n teɣyuč.” ◘12:15 Ica. 62:11; Zak. 9:9; Mt. 21:5.

16 Imeḥḍaren nnes war fhimen ca timesřayin-a di řweqt nni. Maca awarni řami ittwassuɛřa Yasuɛ, řexdenni ɛeqřen belli man aya tura xas uca belli nitni ggin zzayes man aya. 17 Řɣaci i tuɣa iǧan akides, tuɣa iched aqa Netta iřaɣa-dd x Aliɛazar zeg wenḍeř uca issnekkar i-t-i-dd zi taddart n imettinen. 18 S man aya iffeɣ řɣaci ameqqran maḥend ad t mmeřqan, minzi nitni sřin belli igga řeɛřamet-a. 19 Ifarisiyyen nnan jar asen: “Tᵉttwařam mliḥ belli kenniw tᵉttakkwaḍem ɣar walu, xzarem, aqa qaɛ ddunect teḍfar i-t-i-dd.” ◘12:19 Yḥ. 11:47.

20 Tuɣa din ca n iwdan zi řegnus jar asen inni dd-igeɛɛden ɣar Urcalim ḥima ad ɛebden di Řɛid. ◘12:20 Řex. 8:27. 21 Ina ruḥen ɣar Filippus, wenni zi tendint n Bayt-Ṣayda di Ljalil. Sseqsan t, nnan: “A Sidi, nexs ad nẓar Yasuɛ.” ◘12:21 Yḥ. 1:45. 22 Yusa-dd Filippus, inna tt i Andrawus, uca Andrawus d Filippus nnan tt i Yasuɛ. 23 Yasuɛ yarra-dd, inna asen: “Aqa tiweḍ-dd tsaɛɛet i di i ɣa ittwassɛuǧ Mmis n bnadem. ◘12:23 Yḥ. 13:32; 17:1. 24 S tidett, s tidett, Necc ad awem iniɣ: Mařa war dd-iwḍi řḥebb n yirden di temmurt, ad immet, xenni ad iqqim weḥḥdes, maca mařa immut, xenni ad dd-yawi řɣiǧet aṭṭas. ◘12:24 1 Kur. 15:36. 25 Wenni ittexsen tudart nnes, ad tt ixsar, maca wenni i ɣa icarhen tudart nnes di ddunect-a, ad tt ixemmeř i Tudart ittduman. ◘12:25 Mt. 10:39; 16:25; Mk. 8:35; Lk. 9:24; 17:33. 26 Mařa ca n yijjen isexxar ayi, ejj i-t ad ayi iḍfar. Mani ɣa iřiɣ Necc, dinni i ɣa yiři ɛawed umsexxar inu. Mařa ca n ijjen ixdem ayi, ad t icenneɛ Baba. ◘12:26 Yḥ. 14:3; 17:24. 27 Řexxu uř inu innehweř, min ɣa iniɣ? A Baba, senjem ayi zi tsaɛɛet-a? Maca x uyenni i dd-usiɣ ɣar tsaɛɛet-a. ◘12:27 Mt. 26:37,38,39; Mk. 14:34; Lk. 22:44. 28 A Baba, sɛuǧi Isem nnec.” Xenni tusa-dd ict n tmijja zeg ujenna, tenna: “Sɛuǧeɣ t uca ad t sɛuǧeɣ ɛawed!” 29 Řɣaci i tuɣa ibedden din isřa i-tt, nitni nnan: “Aqa imsar wajjaj.” Inneɣni nnan: “Aqa issiweř-dd ijj n lmalak akides.”

30 Yarra-dd Yasuɛ, inna asen: “Tmijja-ya war teǧi ca di ṭṭweɛ inu maca di ṭṭweɛ nwem. ◘12:30 Yḥ. 11:42. 31 Řexxu ad yiři řḥukm x ddunect-a, řexxu ad immenḍar umeqqran n ddunect-a ɣar barra. ◘12:31 Yḥ. 14:30; 16:11; Kul. 2:15. 32 U Necc, x minni i ɣa ttwassgeɛɛdeɣ zi temmurt, ad ɣari dd-jebdeɣ marra.” ◘12:32 Řxř. 21:9; 2 Ij. 18:4; Yḥ. 3:14; 8:28. 33 Inna man aya ḥima ad isscen ɣar man řmewt i ɣa immet.

34 Řɣaci yarra-dd xas: “Neccin nesřa zi Ccariɛa aqa Lmasiḥ ad iqqim i řebda. I mammec teqqared Cek belli ittxeṣṣa i Mmis n bnadem ad ittwassgeɛɛed? Min iɛna Mmis-a n bnadem?” ◘12:34 2 Ṣm. 7:16; 1 Im. 22:10; Izhd. 45:7; 89:37; 110:4; Ica. 9:5; Irm. 23:6; Ḥiz. 37:26; Dan. 2:44; 7:14, 27; Mixa 4:7; Ɛbr. 1:8. 35 Yasuɛ inna asen: “Tafawt ad tiři akidwem drus n řweqt ɛad. Uyurem, řami ɣarwem Tafawt, ḥima war kenniw tᵉttᵉṭṭef taǧest. Wenni igguren di taǧest, war issin mani iggur. ◘12:35 Irm. 13:16; Yḥ. 1:9; 8:12; 9:5; 12:46; Afa. 5:8; 1 Ts. 5:4 36 Amnem di Tfawt maḥend Tafawt ɛad aqa-tt ɣarwem, ḥima kenniw ad tiřim tarwa n Tfawt.” Ammu i tuɣa issawař Yasuɛ. Řexdenni yuyur uca innufar zzaysen.

37 Waxxa tuɣa Netta ittegg marra řeɛřamat-a zzatsen, nitni war zzayes uminen ca, 38 ḥima ad ittwakemmeř wawař n unabi Icaɛya i innan:

“A Sidi, wi yumnen s řexbar nneɣ

u i umi ittwassargeb ufus n SIDI?” ◘12:38 Ica. 53:1; Rum. 10:16.

39 S uyenni war zemmaren ad amnen, minzi Icaɛya inna ɛawed:

40 “Nitni ssdarɣřen tiṭṭawin n yixef nsen,

sseqseḥen uřawen nsen,

ḥima war ttᵉtwiřin s tiṭṭawin nsen,

war fehhmen s wuř nsen,

ad tuben uca Necc ad ten ssgenfiɣ.” ◘12:40 Ica. 6:9-10; Ḥiz. 12:2; Mt. 13:14; Mk. 4:12; Lk. 8:10; Řex. 28:26; Rum. 11:8

41 Inna Icaɛya ammu, umi iẓra aɛuǧi nnes uca tuɣa issawař xas. ◘12:41 Ica. 6:1. 42 Umnen zzayes ɛawed aṭṭas n imeqqranen n řgens, maca s ssibbet n Ifarisiyyen war zzayes cehden ca s bṭayṭay, ḥima war ten ssuffuɣen zi temzida. ◘12:42 Yḥ. 7:13; 9:22. 43 Minzi nitni tuɣa xsen aɛuǧi zeg iwdan x uɛuǧi zi AREBBI. ◘12:43 Yḥ. 5:44.

44 Maca Yasuɛ iřaɣa, inna: “Wenni dayi ittamnen, war dayi ittimen ca, maca deg Wenni d ayi dd-issekken. 45 Wenni d ayi iẓrin, iẓra wenni d ayi dd-issekken. ◘12:45 Yḥ. 10:30; 14:9. 46 Necc d Tafawt i dd-yusin ɣar ddunect, ḥima kuř ijjen wenni dayi ittamnen, war ittɣimi ca di taǧest. ◘12:46 Ica. 42:6; 49:6; Yḥ. 1:9; 8:12; 9:5; 12:46; Řex. 13:47. 47 Mařa ca n yijjen isřa i wawařen inu, maca war daysen ittᵉṭṭef, Necc war xas ḥekkmeɣ ca. Necc war dd-usiɣ ca, ḥima ad ḥekmeɣ x ddunect, maca ḥima ad wceɣ Tudart i ddunect. ◘12:47 Yḥ. 3:17; 9:39. 48 Wenni d ayi isseḥqaren uca war iqbiř awařen inu, ɣares wenni xas i ɣa iḥekmen: awař i nniɣ, ad xas iḥkem deg wass aneggaru. ◘12:48 Mk. 16:16; Yḥ. 3:18; 8:24. 49 Minzi Necc war ssiwřeɣ ca zi ɣari, maca Baba Wenni d ayi-dd-issekken iwca ayi ict n tewṣeyyet x min ɣa iniɣ d min xef ɣa ssiwřeɣ,◘12:49 Aɛwd. 18:18; Yḥ. 3:11; 5:20; 7:16; 8:28; 14:10, 24; 16:13. 50 u Necc ssneɣ tiweṣṣa nnes, aqa atent d Tudart ittduman. S uya, min ssawařeɣ, ssawařeɣ t am mammec d ayi inna Baba.”