28
Bulus di tegzirt n Malta
1 Awarni man aya nefhem, belli tagzirt-a qqaren as Malta. 2 Ibarraniyyen inni din izedɣen ggin akidneɣ mliḥ aṭṭas, am ssiɣen ict n tmessi d tameqqrant uca řaɣan aneɣ marra ɣarsen, ḥima ad neẓɣeř minzi anẓar tuɣa iccat aṭṭas u tuɣa tesmeḍ. 3 Umi tuɣa issmun Bulus aɛurric n ikecwaḍ, issars i-ten x tmessi, xenni s řeḥmu nni iffeɣ-dd ijj n ufiɣar uca iqqes as deg ufus. 4 Umi ẓrin ibarraniyyen aqa yuyeř ufiɣar ɣar ufus nnes, nnan: “Ad taɣ bnadem-a d aqettař, war t tejji ‘lalla řḥeqq’ ad iddar, waxxa injem-dd zi řebḥar.” 5 Maca Bulus izzerz s ufus nnes, immenḍar afiɣar di tmessi, břa ma d as temsar uřa d ict n druct. ◘28:5 Mk. 16:18; Lk. 10:19. 6 Maca nitni tuɣa ttrajan ad yuff řexdenni uca ad iwḍa ad immet. Maca umi ẓrin, awarni řami rajan aṭṭas, belli war d as temsar uřa d ict n řḥajjet taɛeffant, ibeddeř řhard nsen, nnan, aqa-t d ijj n arebbi. ◘28:6 Řex. 14:11.
7 Tuɣa d jjihet nni iyyaren i yeǧan d agřa n ijj n weryaz umi qqaren Publiyus. Netta tuɣa d azeǧif n tegzirt, issnewju aneɣ s řxar třata n wussan di taddart nnes. 8 Babas n Publiyus tuɣa dayes timessi d řeḥriq. Dayes ijj n řeḥřac n teqqrint. Yudef Bulus ɣares, iẓẓuǧ, issars xas afus uca issgenfa i-t. 9 Umi imsar man aya, usin-dd ɣares inneɣni n tegzirt inni tuɣa ɣar iǧa imehřac uca ttwassgenfan. 10 Karmen xaneɣ ina s waṭṭas n ccan. Umi nruḥ nbeḥḥar ssenni, wcin aneɣ min tuɣa neḥwaj.
Awaḍ n Bulus ɣar Ruma
11 Awarni teřt n iyuren nruḥ, nbeḥḥar deg ijj n uɣarrabu zi Iskandariyya i isseɛdun řmecta di tegzirt, tuɣa xas arcam n ‘Tecniwin’. 12 Umi dd-niweḍ ɣar Siragusa, neqqim din třata n wussan. 13 Ssenni ndur uca niweḍ-dd ɣar Rixiyum. Awarni ijj n wass ikkar-dd usemmiḍ n tcarmin uca niweḍ-dd deg ijj n řmijař n tnayen n wussan ɣar Putiyuli, ict n tendint di Iṭalya. 14 Dinni i nufa tawmat nni zzayneɣ ittaren ad kidsen neqqim, uca neqqim akidsen sebɛa n wussan. Xenni nruḥ ɣar Ruma. 15 Umi sřin tawmat di Ruma x umeddur nneɣ, usin-dd ḥima ad kidneɣ mmeřqan deg wazzay umi qqaren ‘Apiyus Furus’ u ɣar ‘Třata n Tḥuna’. Umi ten iẓra Bulus, icekkar AREBBI uca ittwacejjeɛ.
16 Umi dd-niweḍ ɣar Ruma, iwca řqebṭan x mya ttesriḥ i Bulus maḥend ad izdeɣ mani ixs netta, ak-d ijj n uɛessas wenni t i ɣa iḥḍan. ◘28:16 Řex. 24:23; 27:3.
Ameřqi n Bulus ak-d Wudayen di Ruma
17 Awarni třata n wussan iřaɣa Bulus i imcennɛen n Wudayen. Ařami munen, inna asen:
“A iryazen tawmat, waxxa necc war ggiɣ uřa d ict n řḥajjet ḍidd i řgens niɣ ḍidd i Ccariɛa n řejdud inu, aqa ttwasellmeɣ d ameḥbus zi Urcalim deg ifassen n Irumaniyyen. ◘28:17 Řex. 24:12; 25:8. 18 Awarni řami d ayi beqqcen, tuɣa xsen ad ayi arxun minzi war dayi ufin uřa d ict n řḥajjet tessdaheǧ řmewt. 19 Maca umi ɛekksen Wudayen x man aya, s uɣiř xafi ad ssgeɛɛdeɣ ddeɛwet inu ɣar qayṣar, maca břa ma ad ɣari yiři ijj n ucetci x řgens inu. 20 X ssibbet-a ttareɣ ḥima ad kenniw ẓareɣ uca ad kiwem ssiwřeɣ. Minzi di ssibbet n usitem n Israil, aqa ayi carfeɣ s ssnesřet-a.” ◘28:20 Irm. 14:8; 17:13; Řex. 23:6; 24:21. 21 Maca nitni nnan as: “War xak neṭṭif ca tibratin zi Yahudiyya uca uřa d ijj n tawmat war dd-yusi da wi innan niɣ issiwřen xak s ca n řɛib. 22 Maca neccin nexs ad zzayek nseř min tᵉttwařid, minzi zi jjihet n tebridt-a, aqa nessen belli ttɛekksen tt mani ma.”
23 Nitni mɛahaden akides x ijj n wass, uca munen. Aṭṭas i-dd-yusin ɣar wemcan mani izeddeɣ. Netta tuɣa ittfessar asen Tageldit n AREBBI, am icehhed u yarezzu ad ten isseqneɛ zi jjihet n Yasuɛ, zi Ccariɛa n Musa u zeg inabiyyen, zi řefjar ařami d tameddit. ◘28:23 Amz. 3:15; 22:18; 26:4; 49:10; Aɛwd. 18:15; 2 Ṣm. 7:12; Izhd. 132:11; Ica. 4:2; 7:14; 9:5; 40:10; Irm. 23:5; 33:14; Ḥiz. 34:23; 37:24; Dan. 9:24; Mixa 7:20. 24 Ca ttwassqenɛen s wawařen nnes, maca inneɣni war ttwassqenɛen ca. ◘28:24 Řex. 17:4. 25 Nitni ffɣen xas am war dd-usin ak-d wayawya. Xenni inna asen Bulus ɛad awař-a: “S řḥeqq issiweř Arruḥ Iqeddsen x uqemmum n Icaɛya i řejdud nwem, inna:
26 ‘Ruḥ ɣar řgens-a, ini asen:
‘S useǧi ad tesřem,
war tfehhemem,
s tmuɣři ad texzarem,
27 minzi uř n řgens-a aqa idweř iqseḥ,
Imezzuɣen nsen ssḍeqřen ten i useǧi,
u tiṭṭawin nsen qqnen tent,
maḥend war ttwiřin s tiṭṭawin nsen,
war ttesřin s imezzuɣen nsen,
war fehhemen s wuř nsen,
ařami war ɣari dekkwiřen
uca ad asen ɣfareɣ.’ ◘28:27 Ica. 6:9-10.
28 Man aya ittxeṣṣa ad tessnem: Areqqas n usenjem-a n AREBBI aqa ittwassekk-dd i řegnus uca uřa d nitni ad ɣares sřen.” 29 Awarni řami inna man aya, ffɣen Wudayen, am tuɣa ttemcubbucen jar asen aṭṭas.
30 Bulus icra ict n taddart, ixeǧeṣ i-tt s yixef nnes, izeddeɣ dayes tnayen n iseggʷusa. Tuɣa ittareḥḥab s marra inni tuɣa ɣares dd-ittasen, 31 ittbarreḥ s Tgeldit n AREBBI, isseřmad x Siditneɣ Yasuɛ Lmasiḥ s bṭayṭay u břa ma tᵉttwassbedd uřa d ict n tɛenkrift.
◘28:5 28:5 Mk. 16:18; Lk. 10:19.
◘28:6 28:6 Řex. 14:11.
◘28:16 28:16 Řex. 24:23; 27:3.
◘28:17 28:17 Řex. 24:12; 25:8.
◘28:20 28:20 Irm. 14:8; 17:13; Řex. 23:6; 24:21.
◘28:23 28:23 Amz. 3:15; 22:18; 26:4; 49:10; Aɛwd. 18:15; 2 Ṣm. 7:12; Izhd. 132:11; Ica. 4:2; 7:14; 9:5; 40:10; Irm. 23:5; 33:14; Ḥiz. 34:23; 37:24; Dan. 9:24; Mixa 7:20.
◘28:26 28:26 Ica. 6:9-10; Ḥiz. 12:2; Mt. 13:14; Mk. 4:12; Lk. 8:10; Yḥ. 12:40; Rum. 11:8.
◘28:27 28:27 Ica. 6:9-10.