1 Awarni xemsa n wussan ihwa Ananiyas, arrays n ikehhanen, ak-d imɣaren n řgens u ak-d ijj n weryaz s řhard iṣebḥen, qqaren as Tartulus, uca xebbaren lɛamil x Bulus. ◘24:1 Řex. 23:2. 2 Umi xas dd-řaɣan, iqarreb-dd Tartulus ɣar zzat maḥend ad t iḍřem, inna:

“Aqa zzayek ɣarneɣ řehna tameqqrant u ssiyasa nnec aqa tiwi-dd aṭṭas n weɛdeř di ṭṭweɛ n řgens-a i dd-yiwyen ssahřa, 3 u di kuř amcan marra neccin neqbeř tcuni nnec, a sidi Filiks yuɛřan. 4 Maca ḥima war cek hekkweřeɣ aṭṭas, ttareɣ zzayek ad tesřid mɣir cwayt ɣar tutra nneɣ i zzayek nettar s uwaḍeɛ. 5 Minzi nufa belli bnadem-a aqa-t d ijj n řeḥřac, ittsebbeb aɣuwweɣ jar marra Udayen di mkuř tammurt, minzi netta d azeǧif n tebridt n Inaṣiriyyen. 6 Řami netta tuɣa yarezzu maḥend ad issexmej Zzawect Tameqqrant nneɣ, xenni neṭṭef i-t uca tuɣa nexs ad xas neḥkem s Ccariɛa nneɣ. ◘24:6 Řex. 21:28. 7 Maca akumandar Lisiyas yusa-dd di řwesṭ s uhettek aṭṭas, iksi t jar ifassen nneɣ, issekk i-t ɣarek, 8 uca yumur maḥend inni ixsen ad t ḍeřmen, ad ɣarek dd-asen. Mařa t tesseqsid, ad tfehmed zzayes s yixef nnec marra timesřayin-a min xef t neḍřem.”

9 Ccetcan xas Wudayen nni ɛawed, nnan: “Man aya ammu i iǧa!” 10 Xas uca iceyyar lɛamil i Bulus maḥend ad issiweř. Bulus yarra-dd, inna:

“Necc ssneɣ belli cek d řqaḍi x řgens-a i yijj n řmijař n waṭṭas n iseggʷusa, s uyenni ad wteɣ x yixef inu s teryast ktar. 11 Am mammec ɣa yiři tessned cek, aqa ɛdun mɣir tenɛac n wussan waha zeg wami geɛɛdeɣ ḥima ad ɛebdeɣ di Urcalim. 12 Nitni war d ayi ufin di Zzawect Tameqqrant ssawařeɣ ak-d ca n ijjen niɣ ssmuneɣ ijj n ubarru n řgens, war iǧi di temzidawin nsen, war iǧi di tendint. ◘24:12 Řex. 25:8; 28:17. 13 Nitni war zemmaren ad ssbeyynen min zi d ayi ḍeřmen řexxu. 14 Maca man aya ad ac neɛmeɣ, belli ɛebbdeɣ AREBBI n řejdud inu x řeḥsab tɣuri nni x ssawařen, minzi umneɣ marra min yurin di Ccariɛa u deg Inabiyyen, 15 am ɣari simant n usitem di AREBBI am mammec uřa d nitni ɣarsen, aqa ad din tiři tnukra zi taddart n imettinen, tanukra n imseggaden uřa d tanukra n yinni war iseggden. 16 Ammu uřa d necc tteggeɣ tizemmar ḥima ad ɣari tiři řebda tnefsect teṣfa zzat i AREBBI u zzat i iwdan. ◘24:16 Řex. 23:1.

17 Awarni i waṭṭas n iseggʷusa usiɣ-dd ɣar řgens inu maḥend ad awyeɣ ṣṣdaqi d tɣarṣin. ◘24:17 Řex. 11:29; Rum. 15:25. 18 Aqa iwdan-a ufin ayi di Zzawect Tameqqrant awarni řami ttwassizdegeɣ, am war din ɣari řɣaci niɣ d axarweḍ. ◘24:18 Řex. 21:27. 19 Maca Udayen nni dd-yusin zi Asiya, inni issekkaren iwdan, aqa ittxeṣṣa ad ḥḍaren da akidi zzatek maḥend ad ayi ḍeřmen zi min ma ɣarsen xafi. 20 Niɣ ad inin ina i da ibedden man řɛib i dayi ufin umi beddeɣ zzat i Jmaɛet nsen Tameqqrant, 21 mɣir awař-a i tuɣa řaɣiɣ umi beddeɣ jar asen: ‘Ass-a ttwaḥekmeɣ zzatwem di ssibbet n tnukra n imettinen!’ ” ◘24:21 Řex. 23:6; 28:20.

22 Maca umi issen Filiks Abrid-a mliḥ, issbedd i-ten, inna: “Xmi dd ɣa yas ukumandar, ad kemmřeɣ aseǧi ɣar min din jar awem.” 23 Xas uca yumur i řqebṭan x mya ḥima ad iḥḍa Bulus s cwayt n lḥurriya ktar u war imenneɛ uřa d ijj zeg inni t issnen ad xas sexxaren. ◘24:23 Řex. 27:3; 28:16.

24 Awarni ca n wussan ijja Filiks d Drusilla, tamɣart nnes d Tudact, ad dd-awyen Bulus uca sřan zzayes x l’iman n Lmasiḥ. 25 Ařami yiweḍ řhard x tsegda d ḍḍebṭ n nnefs u x lḥisab i dd ɣa yasen, iggʷed Filiks, inna as: “Ruḥ řexxu! Xmi ɣari i ɣa yiři řweqt, ad ac dd-řaɣiɣ.” 26 Netta tuɣa issitim ɛawed maḥend Bulus ad as iwc tmenyat ḥima ad as iḍřeq. S uyenni tuɣa xas dd-iřaɣa aṭṭas n twařawin ḥima ad kis issiweř.

27 Maca umi kemmřen tnayen n iseggʷusa, yusa-dd lɛamil wenni t i ɣa ixeřfen, qqaren as Purkiyus Fastus. Umi tuɣa Filiks ixs ad yarḍa Udayen, ijja Bulus di ssnaseř di řeḥbes.