1 Rrusul d tawmat inni iǧan di Yahudiyya sřin belli uřa d řegnus qebřen Wawař n AREBBI. 2 Řami igeɛɛed Cimɛun ɣar Urcalim, mcubbcen akides inni iǧan zeg wextan. 3 Nnan, belli netta yudef-dd ɣar iwdan i war ittwaxetnen, icca akidsen. ◘11:3 Uf. 23:32; 34:15; Aɛwd. 7:2; Yḥ. 18:28.

4 Maca Cimɛun iqḍeɛ daysen řhard, uca ibda ad asen iɛawed awař iḍfar umas: 5 “Řami tuɣa ayi di tendint n Yaffa ttẓaǧiɣ, ẓriɣ deg ijj n řewḥiy aqa ict n řqecɛet am tcuqqet tameqqrant n řeqṭen azdad ittwaṭṭfen zi arebɛa n tɣemmura nnes tehwa-dd zeg ujenna, tiweḍ-dd ɣari. ◘11:5 Řex. 10:9. 6 Xzareɣ mliḥ u ẓriɣ aqa dayes imuddaren n temmurt s arebɛa n iḍaren d imuddaren inni ittbuɛen x temmurt uřa d ijḍaḍ n ujenna. 7 Sřiɣ awarni ayi ict n tmijja, tenna ayi: ‘A Cimɛun, kkar, ɣarṣ, tecced!’ 8 Maca necc nniɣ: ‘Lla, a Sidi, ɛemmarṣ war yudif ɛad ɣar uqemmum inu min war izdigen niɣ min iǧan d řeḥram.’ ◘11:8 Lawi 11:4; Aɛwd. 14:7. 9 Tenna xafi tmijja zeg ujenna ɛawed: ‘Min issizdeg AREBBI, war dd t tᵉttarrid ca cek d řeḥram!’ 10 Man aya imsar třata n imuren uca xenni ittwassjbed marra ɛawed ɣar ujenna. 11 U xzar, řexdenni aqa din třata n yeryazen inni ɣari dd-ittwassekken zi Kurniliyus zi Qayṣariya, bedden ɣar tewwart n řemraḥ mani d ayi tuɣa. 12 Inna ayi Arruḥ aqa ittxeṣṣa ad kisen raḥeɣ břa ma ad cekkeɣ. Tuɣa akidi uřa d setta n wawmaten u nudef ɣar taddart n weryaz nni. ◘11:12 Řex. 10:19; 15:7. 13 Netta issargeb aneɣ mammec iẓra ijj n lmalak i ibedden di taddart nnes, wenni d as innan: ‘Sekk ijj n weryaz ɣar Yaffa, tɛarḍed x Cimɛun wenni umi ttkennan Buṭrus. 14 Netta ad ac issiweř awařen i zi ɣa tᵉṭṭfed Tudart, cek d marra taddart nnec.’ 15 Umi qqimeɣ ssiwřeɣ, ihwa-dd Arruḥ Iqeddsen xasen am mammec xaneɣ dd-ihwa ɛawed ɣar umezwaru. 16 Ttwassɛeqřeɣ x wawař n Siditneɣ, mammec inna: ‘Yuḥanna tuɣa isseɣḍaṣ s waman maca kenniw ad ttwassɣeḍṣem s Arruḥ Iqeddsen.’ ◘11:16 Ica. 44:3; Yuw. 3:1; Mt. 3:11; Mk. 1:8; Lk. 3:16; Yḥ. 1:26; Řex. 1:5; 2:4; 19:4. 17 Mařa AREBBI iwca tamewci-ya i řegnus nni yumnen di Siditneɣ Yasuɛ Lmasiḥ am mammec d aneɣ tt iwca, xenni min ɛniɣ necc maḥend ad ssbeddeɣ AREBBI?” ◘11:17 Řex. 15:9.

18 Umi sřin awařen-a, heddnen, ssemɣaren AREBBI, nnan: “Ad taɣ iwca AREBBI uřa i řegnus maḥend ad dd-dewřen ad tuben i Tudart.”

19 Inni ittwazuzzaren zi ssibbet n řmeḥnet i imsaren s ssibbet n Stifanus, ẓwan ɣar Finiqiya u ɣar jjwayeh n Qubrus u ɣar Antiyuxiya, am war ssiwiřen ak-d ḥed s wawař mɣir ak-d Wudayen waha. ◘11:19 Řex. 8:1, 4. 20 Tuɣa din jar asen ca n yeryazen zi Qubrus u zi Qayrawan inni, ařami dd-usin ɣar Antiyuxiya, tuɣa issawařen ak-d Iyunaniyyen, barrḥen asen s Řexbar Aṣebḥan n Siditneɣ Yasuɛ. 21 Tuɣa afus n SIDI akidsen uca aṭṭas umnen, dewřen-dd ɣar SIDI. ◘11:21 Řex. 2:47; 5:14.

22 Ikka-dd řexbar xasen x imezzuɣen n ayt n tmesmunt di Urcalim. Nitni ssekken Bar-Naba ɣar Antiyuxiya. 23 Ařami dd-yiweḍ din, iẓra arḍa n AREBBI, uca ifarḥ, iɛřem asen ḥima ad qqimen ttcebbaren di Siditneɣ s marra uř nsen. ◘11:23 Řex. 13:43; 14:22. 24 Minzi tuɣa-t d aryaz isegged, iccur s Arruḥ Iqeddsen d l’iman, uca ijj n ubarru d ameqqran n iwdan immarni-dd ɣar Siditneɣ. ◘11:24 Řex. 4:36; 6:5. 25 Xenni iruḥ ɣar Tarsus ḥima ad yarzu x Cawul, ◘11:25 Řex. 9:27. 26 uca ařami t yufa, yiwi i-t akides ɣar Antiyuxiya. Uca imsar aqa nitni munen di tmesmunt aseggʷas ikmeř uca ssřemden ijj n řɣaci d ameqqran. Zi  řweqt nni ttwasemman imeḥḍaren d ‘imasiḥiyyen’ i umur amezwaru. ◼11:26 tamesmunt - niɣ: ‘jmaɛet n řmuminin’.

27 Deg wussan nni hwan-dd ca n inabiyyen zi Urcalim ɣar din. 28 Uca ikkar ijj n zzaysen qqaren as Aɣabus, iɛřem asen s Arruḥ belli ijj n řaẓ imɣar ad yekk x marra tammurt. Uca yusa-dd řaẓ-a deg wussan n qayṣar Kludiyus. ◘11:28 Řex. 21:10. 29 Xenni ggin imeḥḍaren aqa kuř ijj zzaysen ad igg ca n twiza ɣar uɣezdis ɛlaḥsab tizemmar nnes i wawmaten i izeddɣen di Yahudiyya. 30 Uca amenni i ggin nitni, uca ssekken t din ɣar imɣaren n řgens i din iǧan s ufus n Bar-Naba d Cawul. ◘11:30 Řex. 12:25.