1 Awarni řami inna Yasuɛ aya, iffeɣ ak-d imeḥḍaren nnes, ẓwan x yeɣzar n Qidrun. Tuɣa din ijj n weḥwic, yudef ɣares ak-d imeḥḍaren nnes. ◘18:1 [Mt. 26:47-56; Mk. 14:43-50; Lk. 22:47-53] — 2 Ṣm. 15:23; Mt. 26:36; Mk. 14:32; Lk. 22:39. 2 Maca uřa d Yahuda, aɣeddar, issen amcan nni ɛawed, minzi Yasuɛ tuɣa issmuna dayes aṭṭas ak-d imeḥḍaren nnes. 3 Yiwi-dd Yahuda akides ict n terbiɛt n řɛeskar uřa d iɛessasen zeg wudem n imeqqranen n ikehhanen d Ifarisiyyen, uca yusa-dd diha s iṣefḍawen d řeqnadeř d řesnaḥ. ◘18:3 Mt. 26:47; Mk. 14:43; Lk. 22:47.

4 Yasuɛ, wenni issen marra min d as ɣa imsaren, iffeɣ-dd ɣarsen, inna asen: “Min xef tarezzum?” 5 Arrin-dd xas: “Yasuɛ Nnaṣiri!” Yasuɛ inna asen: “D NECC!” Tuɣa Yahuda, aɣeddar, ibedd ɛawed akidsen. 6 Řami d asen inna Yasuɛ: “D Necc!”, dewřen nitni ɣar ḍeffar uca wḍan ɣar temmurt.

7 Isseqsa ten Yasuɛ ɛawed: “Min xef tarezzum?” Nnan: “Yasuɛ Nnaṣiri!” 8 Yasuɛ yarra-dd: “Aqa nniɣ awem, aqa d Necc. Mařa tarezzum xafi, jjem ina ad raḥen!”, 9 ḥima ad ittwakemmeř wawař i tuɣa inna: “Inni d ayi tewcid, war zzaysen weddareɣ uřa d ijj.” ◘18:9 Yḥ. 6:39; 10:28; 17:12.

10 Cimɛun Buṭrus wenni tuɣa ɣares ssif, ijbed i-t-i-dd, iwta zzayes amsexxar n arrays n ikehhanen, iqess as amezzuɣ nnes afusi. Tuɣa amsexxar nni qqaren as Malxis. ◘18:10 Mt. 26:51; Mk. 14:47; Lk. 22:50. 11 Xas uca inna Yasuɛ i Buṭrus: “Arr ssif ɣar weɣřaf nnes, řkas nni d ayi iwca Baba, ma war t sesseɣ?” ◘18:11 Mt. 20:22; 26:39.

12 Tarbiɛt n řɛeskar d imeqqranen x wařef n iɛeskariyyen uřa d iɛessasen n Wudayen ṭṭfen Yasuɛ, carfen t. ◘18:12 [Mt. 26:57, 58; Mk. 14:53, 54; Lk. 22:54] 13 Nedhen t amezwaru ɣar Ḥannan, minzi netta d aḍeggʷař n Qayafa, wenni tuɣa d arrays n ikehhanen deg useggʷas nni. ◘18:13 Mt. 26:57; Mk. 14:53; Lk. 3:2; 22:54. 14 Qayafa d netta tuɣa iweṣṣa i Wudayen, aqa ḥsen ad immet ijj n Bnadem di ṭṭweɛ n řgens. ◘18:14 Yḥ. 11:50.

15 Cimɛun Buṭrus iḍfar Yasuɛ ak-d ijjen zeg imeḥḍaren inneɣni. Ameḥḍar nni tuɣa ittwassnen ɣar arrays n ikehhanen uca yudef ak-d Yasuɛ ɣar řemraḥ n taddart n arrays n ikehhanen. ◘18:15 [Mt. 26:69-70; Mk. 14:66-68; Lk. 22:55-57] — Mt. 26:58; Mk. 14:54; Lk. 22:54. 16 Cimɛun ibedd-dd barra ɣar tewwart. Iffeɣ-dd umeḥḍar i tuɣa ittwassnen ɣar arrays n ikehhanen, issiweř ak-d tɛessast tenni iḥeṭṭan tawwart uca issidef-dd Cimɛun ɣar daxeř. 17 Tabřiɣt tenni iḥeṭṭan tawwart, tenna i Cimɛun: “Ma war teǧid uřa d cek zeg imeḥḍaren n bnadem-a?” Inna: “Lla!” 18 Tuɣa imsexxaren d iɛessasen bedden din, ssarɣen timessi s řefḥem, minzi tuɣa tesmeḍ, uca tuɣa ttweqqaḥen. Uřa d Cimɛun ibedd akidsen, ittweqqaḥ. ◘18:18 Mt. 26:69; Mk. 14:67; Lk. 22:55.

19 Isseqsa arrays n ikehhanen Yasuɛ x imeḥḍaren nnes u x tɣuri nnes. ◘18:19 [Mt. 26:59-66; Mk. 14:55-64; Lk. 22:66-71] 20 Yarra-dd xas Yasuɛ: “Necc tuɣa ssawařeɣ i řgens s bṭayṭay, ssɣareɣ řebda di temzida u di Zzawect Tameqqrant mani ttmunan Wudayen řebda. Di tnuffra war ssiwřeɣ uřa d ict n řḥajjet. ◘18:20 Yḥ. 7:26. 21 Mayemmi d ayi tesseqsid? Seqsa inni isřan min d asen nniɣ. Xzar, nitni ssnen min nniɣ!” 22 Řami inna ammu, xenni ijjen zeg iɛessasen i tuɣa din ibedden, iwta Yasuɛ x umeggiz nnes, inna as: “Ma ammu i dd ɣa tarred x arrays n ikehhanen?” ◘18:22 Irm. 20:2; Řex. 23:2. 23 Yarra-dd xas Yasuɛ, inna: “Mařa ssiwřeɣ min war iḥřin, ched x min war iḥřin, maca mařa ssiwřeɣ mliḥ, mayemmi d ayi teccated xenni?” 24 Xas uca Ḥannan issekk i-t ittwacarf ɣar Qayafa, arrays n ikehhanen. ◘18:24 Mt. 26:57; Mk. 14:53; Lk. 22:54.

25 Tuɣa Cimɛun Buṭrus ibedd dinni ittweqqaḥ. Nnan as: “Ma war teǧid uřa d cek zeg imeḥḍaren nnes?” Netta inkar, inna: “War ǧiɣ ca d necc!” ◘18:25 [Mt. 26:71-75; Mk. 14:69-72; Lk. 22:58-62] — Mt. 26:71; Mk. 14:69; Lk. 22:58. 26 Ijjen zeg imsexxaren n arrays n ikehhanen i tuɣa itteɛnan i wenni umi iqess Cimɛun amezzuɣ, inna: “Ma war cek ẓriɣ akides deg weḥwic?” 27 Řexdenni inkar Cimɛun ɛawed uca deɣya issquqeɛ uyaẓiḍ. ◘18:27 Yḥ. 13:38.

28 Xenni iwyen-dd Yasuɛ zi Qayafa ɣar taddart n ccreɛ, umi qqaren ‘Prituriyum’. Tuɣa d zic di ṣṣbeḥ. Nitni war udifen ca ɣar taddart n ccreɛ, ḥima war ttwessixen qbeř ma i ɣa ccen Tɣarṣt n Useɛdu. ◘18:28 [Mt. 27:1-2, 11-31; Mk. 15:1-20; Lk. 23:1-25] — Mt. 27:1; Mk. 15:1; Lk. 22:66; 23:1. 29 S uyenni iffeɣ-dd ɣarsen Pilaṭus, inna asen: “Man acetci i ɣarwem x Weryaz-a?” 30 Arrin-dd, nnan as: “Mařa Wanita war tuɣi d mmis n řmuɛṣiyyet, ad tiři war d ac t-i-dd-nettiwi.” 31 Inna asen Pilaṭus: “Xenni awyem t-i-dd kenniw, tḥekmem xas ɛlaḥsab Ccariɛa nwem.” Xenni nnan as Wudayen: “War ɣarneɣ bu ttesriḥ maḥend ad neneɣ uřa d ijj!”, 32 ḥima ad ittwakemmeř wawař n Yasuɛ i tuɣa iqqar, am tuɣa isscanen i man řmewt i ɣa immet. ◘18:32 Mt. 20:19; Yḥ. 12:32.

33 Xenni yudef-dd Pilaṭus ɛawed ɣar taddart n Ccraɛ, umi qqaren Prituriyum, iřaɣa-dd x Yasuɛ, inna as: “Ma Cek d Ajeǧid n Wudayen?” ◘18:33 Mt. 27:11; Mk. 15:2; Lk. 23:3. 34 Yarra-dd xas Yasuɛ: “Ma teqqared aya zi ɣarek niɣ tuɣa inneɣni qqaren ac t xafi?” 35 Inna as Pilaṭus: “Ma necc d Uday? Aqa řgens nnec d imeqqranen n ikehhanen iwyen-dd Cek ɣari. Min tuɣa teggid?” 36 Yarra-dd xas Yasuɛ: “Tageldit inu war teǧi ca zi ddunect-a. Mařa teǧa Tgeldit inu zi ddunect-a, ad yiři aqa imsexxaren inu ad mmenɣen, ḥima war ttwasellameɣ i Wudayen, maca řexxu Tageldit inu war teǧi ca ssanita.” ◘18:36 Yḥ. 6:15; 1 Tim. 6:13. 37 Inna as Pilaṭus: “Xenni aqa Cek d Ajeǧid nican!” Yarra-dd Yasuɛ: “Cek teqqared, aqa Necc d Ajeǧid. I man aya i dd-xeřqeɣ u i uya i dd-usiɣ ɣar ddunect, ḥima ad cehdeɣ i tidett. Marra wenni iǧan zi tidett, ad iseř i tmijja inu.”

38 Inna as Pilaṭus: “Umi qqaren d tidett?” Řami inna ammu, iffeɣ-dd ɛawed ɣar Wudayen, inna asen: “War dayes ufiɣ uřa d ijj n uxeṭṭu. ◘18:38 Mt. 27:24; Lk. 23:4. 39 Maca aqa tennumem ad awem sarrḥeɣ ijj n bnadem di Řɛid n Tɣarṣt n Useɛdu. Ma texsem xenni ad awem sarrḥeɣ Bnadem-a, Ajeǧid n Wudayen?” ◘18:39 Mt. 27:15; Mk. 15:6; Lk. 23:17. 40 Sɣuyyen ɛawed marra, nnan: “War iǧi ca Wanita, ḥaca Bar-Abbas!” Tuɣa Bar-Abbas d aqṭaṭɛiy. ◘18:40 Mt. 27:16; Mk. 15:7; Lk. 23:19; Řex. 3:1.