1 Xenni ijja Pilaṭus ad hettken Yasuɛ s urekkuḍ. ◘19:1 Mt. 27:26; Mk. 15:15. 2 Awarni řami muden iɛeskariyyen ijj n ttaj s isennanen, ssarsen as tt x uzeǧif nnes uca yarḍen as ijj n useřham d arjuwani, 3 nnan: “Sřam xak, a Ajeǧid n Wudayen!”, uca wtin t x igemmizen nnes.

4 Iffeɣ-dd ɛawed Pilaṭus, inna asen: “Ad awem t-i-dd-ssuffɣeɣ, ḥima ad tessnem belli necc war dayes ufiɣ ssibbet i ucetci, uřa d ict.” 5 Xenni iffeɣ-dd Yasuɛ s ttaj n isennanen d ujeǧab ajurwani. Inna asen Pilaṭus: “Xzarem, Bnadem!”

6 Řami t ẓrin imeqqranen n ikehhanen d iɛessasen, sɣuyen, nnan: “Ṣellb i-t, ṣellb i-t” Inna asen Pilaṭus: “Awyem t-i-dd kenniw, ṣellbem t, minzi necc war dayes ufiɣ uřa d ijj n řɛib.” 7 Arrin-dd xas Wudayen: “Ɣarneɣ Ccariɛa, u ɛlaḥsab Ccariɛa nneɣ ittxeṣṣa ad immet, minzi Netta ittarra Ixef nnes d Mmis n AREBBI.” ◘19:7 Lawi 24:16; Yḥ. 5:18; 10:3.

8 Řami isřa Pilaṭus awař-a, yarni di tiggʷudi. 9 Yudef ɛawed ɣar taddart n ccreɛ, inna i Yasuɛ: “Manis Cek?” Maca Yasuɛ war xas dd-yarri ca. 10 Inna as Pilaṭus: “Ma war texsed ad kidi tessiwiřed? Ma war tessined ca aqa ɣari ṣṣulṭa ḥima ad ac ssarrḥeɣ u ɣari ṣṣulṭa ḥima ad Cek ṣellbeɣ?” 11 Yarra-dd xas Yasuɛ: “War ɣarek tᵉttiři bu ṣṣulṭa xafi, mařa war d ac dd-temmewc zi sennej. S uya, wenni d ayi isellmen i cek, aqa xas ddenb imɣar zeg wenni i iǧan xak.” 12 Zi řexdenni tuɣa Pilaṭus yarezzu ad as isarreḥ, maca Udayen sɣuyen, nnan: “Mařa tsarrḥed i Weryaz-a, war teǧid ca d ameddukkeř n qayṣar. Kuř ijjen wenni ittarran ixef nnes d ajeǧid, ittɛekkas qayṣar.” ◘19:12 Řex. 17:7.

13 Řami isřa Pilaṭus i wawař-a, issuffeɣ Yasuɛ, iqqim x řkursi n ccreɛ deg wemcan umi qqaren ‘Azzay n luṣa’, maca qqaren as s Tɛibranit ‘Gpipta’. ◼19:13 Tiɛibranit - ad taɣ ‘Tiɛibranit’ ijj n isem nni issmunen deg ixef nnes am iřes n Tɛibranit, am ires n Tramit. 14 Tuɣa d ass n Usewjed i Tɣarṣt n Useɛdu. Tuɣa ɛřaḥař d tsaɛɛet wiss setta ɣar tuffut, řami inna i Wudayen: “Xzarem, Ajeǧid nwem!” 15 Maca nitni sɣuyen: “Ksi t, ksi t, ṣellb i-t!” Inna asen Pilaṭus: “Ma ad ṣellbeɣ xenni Ajeǧid nwem?” Arrin-dd xas imeqqranen n ikehhanen: “War ɣarneɣ bu ujeǧid mɣir qayṣar!” ◘19:15 Amz. 49:10. 16 Xenni isellem asen t ḥima ad t ṣellben. Uca nitni ksin Yasuɛ, iwyen t ssenni. ◘19:16 Mt. 27:26; Mk. 15:22; Lk. 23:24, 25.

17 Yarbu ṣṣalib nnes ɣar wemcan umi qqaren ‘Taceqquft’, maca s Tɛibranit qqaren as ‘Juljuta’. ◼19:17 Tiɛibranit - ad taɣ ‘Tiɛibranit’ ijj n isem nni issmunen deg ixef nnes am iřes n Tɛibranit, am ires n Tramit.  ◘19:17 [Mt. 27:32-44; Mk. 15:21-32; Lk. 23:26-39] — Mt. 27:31, 33; Mk. 15:22; Lk. 23:26, 33. 18 Ṣellben t dinni, uca ṣellben akides tnayen nneɣni, ijjen ɣar ijj n uɣezdis u wenneɣni ɣar uɣezdis nneɣni, u Yasuɛ di řwesṭ. 19 Yura Pilaṭus ɛawed deg ict teřwiḥt, issars i-tt x ṣṣalib. Ammu i ittwari dayes: ‘Wanita d Yasuɛ Nnaṣiri, Ajeǧid n Wudayen’. ◘19:19 Mt. 27:37; Mk. 15:26; Lk. 23:38. 20 Tira-ya ɣrin tent aṭṭas n Wudayen, minzi amcan mani tuɣa ṣellben Yasuɛ yudes-dd i tendint. Tira-ya ttwarint s Tɛibranit d Tlatinit d Tyunanit. 21 Nnan imeqqranen n ikehhanen i Pilaṭus: “War ttari ca: ‘Ajeǧid n Wudayen’, maca aqa inna: ‘Necc d Ajeǧid n Wudayen!’ ” 22 Yarra-dd Pilaṭus: “Min uriɣ, aqa uriɣ t.”

23 Řami ṣellben iɛeskariyyen Yasuɛ, ksin arruḍ nnes, bḍan t x arebɛa n tseqqar, i kuř aɛeskari ict n tesɣart. Maca tcamir nnes tuɣa břa taxeyyaḍt, tᵉttwaxeyyeḍ qaɛ zi sennej. ◘19:23 Mt. 27:35; Mk. 15:24; Lk. 23:34. 24 Nnan i wayawya: “War t nettcarrig ca, ad xas negg akeccuḍ, ad nẓar wi t ɣa yawyen!” Ammu i ittwakemmeř awař n Tira Iqeddsen i iqqaren: “Bḍan arruḍ inu jar asen u x tcamir inu ggin akeccuḍ.” Man aya i iggin iɛeskariyyen. ◘19:24 Izhd. 22:19.

25 Ɣar ṣṣalib n Yasuɛ tbedd yemmas, d učmas n yemmas, d Maryam tamɣart n Kliyupas, d Maryam n Majdala. ◘19:25 Mt. 27:55; Mk. 15:40; Lk. 23:49. 26 Řami iẓra Yasuɛ yemmas d umeḥḍar wenni tuɣa ittexs, ibedd din, inna i yemmas: “A tamɣart, xzar, mmim!” 27 Řexdenni inna i umeḥḍar nni: “Aqa-c yemmac!” Zi tsaɛɛet nni iksi tt umeḥḍar ɣar taddart nnes.

28 Awarni man aya issen Yasuɛ aqa kuřci ittwakemmeř, řexdenni inna, ḥima ad yiři min yuran di Tira Iqeddsen: “Necc ffudeɣ!” ◘19:28 [Mt. 27:45-56; Mk. 15:33-41; Lk. 23:44-49] — Izhd. 22:15; 69:21. 29 Ittwamars din ijj n uɣarraf iccur s řxeǧ. Ssɣeḍṣen ict n spunxa n hisub s řxeǧ uca ggin tt x ijj n uɣanim n tɛelǧet, ssiwḍen as tt ɣar uqemmum nnes. 30 Řami iqqas Yasuɛ řxeǧ, inna: “Aqa ittwakemmeř!” Uca issaḍar azeǧif nnes, isellem Arruḥ nnes.

31 Umi tuɣa ass n Usewjed n Tɣarṣt n Useɛdu, nnan Wudayen: “War iɛeddeř ad qqiment arrimat nsen x ṣṣalib di ssebt, minzi ssebt yudes-dd!”, minzi ass nni n ssebt tuɣa d ass ameqqran. S uya ttaren Wudayen zi Pilaṭus, ḥima ad arẓen iḍaren n yinni ittwaṣellben, ad ten ssiggʷejen ssenni. 32 Xenni usin-dd iɛeskariyyen, arẓin iḍaren n umezwaru u n wenneɣni i tuɣa ittwaṣelleb akides. 33 Maca řami dd-usin ɣar Yasuɛ, war arẓin ca iḍaren nnes umi ẓrin aqa immut. 34 Maca ijjen zeg iɛeskariyyen issnuqqeb i-t s ict n lansa deg uɣezdis nnes uca ffɣen-dd idammen d waman deɣya. 35 Wenni iẓrin man aya, tuɣa iched u cchadet nnes d tidett uca netta issen, aqa inna tidett, ḥima ad tamnem uřa d kenniw. 36 Timesřayin-a msarent, ḥima ad ttwakemmřent Tira Iqeddsen i iqqaren: “War zzayes ittareẓẓi yiɣes.” ◘19:36 Uf. 12:46; Řxř. 9:12; Izhd. 34:22. 37 Uca ijj n wawař nneɣni zi Tira Iqeddsen iqqar: “Nitni ad ẓaren Wenni t issnuqqben.” ◘19:37 Zak. 12:10.

38 Awarni man aya imsar aqa Yusuf zi Ramta, wenni tuɣa d ijj n umeḥḍar n Yasuɛ maca s tnuffra zi tiggʷudi zeg Wudayen, ittar as i Pilaṭus ttesriḥ ḥima ad iksi arrimet n Yasuɛ, uca Pilaṭus isarreḥ as. Xenni yusa-dd, iksi arrimet n Yasuɛ. ◘19:38 [Mt. 27:57-61; Mk. 15:42-47; Lk. 23:50-56] — Mt. 27:57; Mk. 15:42; Lk. 23:50; Yḥ. 12:42. 39 Yusa-dd ɛawed Nikudimus wenni tuɣa dd-yusin qbeř ɣar Yasuɛ s ǧiřet, yiwi-dd akides axeǧeḍ n řefwaḥet n mirru d wecfir ɛřaḥař mya litru. ◼19:39 qbeř - xzar Yḥ. 3:1.  ◘19:39 Yḥ. 3:1; 7:50. 40 Ksin nitni arrimet n Yasuɛ, řeḥḥfen tt di řecfun n řeqṭen azdad ak-d řeɛṭur, am mammec nnumen tteggen tt Wudayen i wenḍeř. 41 Tuɣa din ijj n weḥwic deg wemcan mani ṣellben Yasuɛ, uca deg weḥwic ijj n wenḍeř n jdid, ɛemmarṣ war dayes ssarsen uřa d ijj. 42 Ssarsen Yasuɛ din, minzi tuɣa yiweḍ-dd ssebt u minzi anḍeř nni tuɣa yudes.