1 Ɣar ṣṣbeḥ zic, aqa marra imeqqranen n ikehhanen d imɣaren n řgens mcawaren x Yasuɛ, mammec i t ɣa nɣen. ◘27:1 [Mk. 15:1; Lk. 23:1-2; Yḥ. 18:28-32] — Izhd. 2:2 2 Uca nitni carfen t, iwyen t uca sellmen t i lɛamil Arumani, qqaren as Pilaṭus. ◘27:2 Řex. 3:13. 3 Umi iẓra Yahuda, aɣeddar, belli Yasuɛ ittwaḥkem, indem, uca yarra-dd třatin n řweznat n nnuqart ɣar imeqqranen n ikehhanen d imɣaren n řgens. 4 Inna: “Necc xḍiɣ, aqa ɣdareɣ idammen imezdagen.” Maca nitni nnan: “Min d aneɣ iruḥen? Xzar-dd cek.” 5 Awarni řami inḍar řweznat n nnuqart di Zzawect Tameqqrant, iffeɣ uca iruḥ, yuyeř ixef nnes. ◘27:5 2 Ṣm. 17:23; Řex. 1:18. 6 Imeqqranen n ikehhanen ksin řweznat n nnuqart, nnan: “War icuwwar ad ten nessars deg wexxam n ṣṣdaqi, minzi řweznat nni d ttaman n usizzeř n idammen.” 7 Kksen awař jar asen maḥend ad zzayes sɣen iyyar n bu-třaxt, maḥend ad yiři i imeḍřan n ibarraniyyen. ◼27:7 bu-třaxt - ixs ad yini ‘wenni ittṣennaɛen řeqcuɛ n třaxt’.  ◘27:7 Řex. 1:19. 8 S uyenni ittwasemma iyyar nni ‘Iyyar n idammen’ ař ass n řexxu.

9 Řexdenni ittwakemmeř min ittwannan zeg unabi i innan: “Ksiɣ třatin n řweznat n nnuqart, řqedd n Wenni iɣřan, mixef inni zi tarwa n Israil kksen awař, ◘27:9 Zak. 11:12. 10 uca necc wciɣ tent i iyyar n bu-třaxt, am mammec i d ayi yumur SIDI.” ◘27:10 Irm. 32:6-9; Zak. 11:12, 13

11 Yasuɛ tuɣa ibedd qibač i lɛamil. Lɛamil isseqsa as, inna: “Ma Cek d Ajeǧid n Wudayen?” Yasuɛ inna as: “Cek aqa tennid t!” ◘27:11 [Mk. 15:2-15; Lk. 23:3-5; 13-25; Yḥ. 18:33-40; 19:1-16] 12 Uca řami t tehmen imeqqranen n ikehhanen d imɣaren n řgens, yarra-dd s walu. 13 Xenni inna as Pilaṭus: “Ma war tesřid mecḥař xak cehhden?” ◘27:13 Mt. 26:62. 14 Netta war xas dd-yarri uřa s ijj n wawař, ařami iqqim lɛamil ittebhet aṭṭas. ◘27:14 Ica. 53:7; Řex. 8:32.

15 Tuɣa lɛamil innum yarexxu di kuř řɛid i yijj n umeḥbus i řɣaci, wenni ixsen nitni. 16 Tuɣa ɣarsen deg wussan nni ijj n umeḥbus ittwassen, qqaren as Bar-Abbas. ◘27:16 Mk. 15:7; Lk. 23:19; Yḥ. 18:40. 17 Řami munen, inna asen Pilaṭus: “Wi texsem ad awem dd-arxuɣ, Bar-Abbas niɣ Yasuɛ wenni umi qqaren Lmasiḥ?” 18 Minzi Pilaṭus issen aqa nitni sellmen t zi řeḥsed. 19 Am tuɣa lɛamil iqqim x řkursi n řḥukm, tessekk-dd ɣares temɣart nnes, tenna: “Barra ixef nnec zeg Umseggad nni, minzi aqa ass-a ttwaɛeddbeɣ aṭṭas di tarjit inu di ssibbet nnes.” 20 Maca imeqqranen n ikehhanen d imɣaren n řgens ssqenɛen řɣaci, ḥima ad ttaren Bar-Abbas u ḥima ad areddǧen Yasuɛ. ◘27:20 Mk. 15:11; Lk. 23:18; Yḥ. 18:40; Řex. 3:14. 21 Lɛamil yarra-dd, inna asen: “Man wen zi tnayen-a i texsem ad arxuɣ i kenniw?” Nnan: “Bar-Abbas!” 22 Pilaṭus inna asen: “Min ɣa ggeɣ xenni ak-d Yasuɛ umi qqaren Lmasiḥ?” Nnan as marra: “Ṣellb i-t!” 23 Inna asen lɛamil: “Man tuɛeffna i igga?” Sɣuyyen s jjehd ktar, nnan: “Ṣellb i-t.” 24 Řami iẓra Pilaṭus belli war yiweḍ ɣar walu, mahu ad ikkar uɣuwweɣ, iksi aman, issird ifassen nnes qibač i řɣaci, inna: “Necc war tturseɣ ca deg idammen n Umseggad-a, xzarem kenniw!” 25 Řgens marra yarra-dd, inna: “Ejj idammen nnes ad xaneɣ iřin u x tarwa nneɣ.” ◘27:25 Řex. 5:28. 26 Xenni yarxu asen-dd i Bar-Abbas, maca awarni řami ihettek Yasuɛ s urekkuḍ, isellem i-t ḥima ad ittwaṣelleb.

27 Řexdenni iwyen iɛeskariyyen n lɛamil Yasuɛ ɣar Taddart n Ccraɛ, umi qqaren ‘Prituriyum’, uca ssmunen xas marra řkumpaniyyet n řɛeskar. ◘27:27 [Mk. 15:16-20; Yḥ. 19:2-3] 28 Kksen as-dd arruḍ, uca arḍen as ijj n ujeǧab d azeggʷaɣ. 29 Nitni muden as ijj n ttaj s isennanen, ssarsen t x uzeǧif nnes uca ggin as ijj n uɣanim deg ufus nnes afusi, xenni wḍan ɣar iḍaren nnes zzates, qqimen ttbuṣaren xas, nnan: “Azul xak, a Cek, a Ajeǧid n Wudayen!” 30 Ssusfen as x uɣembub nnes, ksin aɣanim uca wtin t zzayes ɣar uzeǧif. 31 Awarni řami t deǧen, ksin xas aseřham, arḍen as arruḍ nnes uca nedhen t, maḥend ad t ṣellben.

32 Am ffɣen ɣar barra n tendint, ufin ijj n weryaz zi Qayrawan, qqaren as Cimɛun, uca ziyyaren xas ḥima ad yarbu ṣṣalib nnes. ◘27:32 [Mk. 15:21-41; Lk. 23:26-39; 44-49; Yḥ. 19:17-19; 28-30] 33 Ařami iwḍen ɣar wemcan umi qqaren ‘Juljuta’, min ixs ad yini ‘Taceqquft’, ◘27:33 Izhd. 69:22; Mk. 15:22; Lk. 23:33; Yḥ. 19:17. 34 wcin as řxeǧ ixeǧḍen s tarzugi uca umi t iqqas, yugi ad isu. 35 Awarni řami t ṣellben, bḍan arruḍ nnes jar asen umi xas ggin akeccuḍ, ◘27:35 Izhd. 22:19; Mk. 15:24; Yḥ. 19:23. 36 am qqimen dinni, ttɛessan xas. 37 Ggin as sennej i uzeǧif nnes ict n tira mayemmi xas ḥekmen s řmewt: ‘Wa d Yasuɛ, Ajeǧid n Wudayen.’ ◘27:37 Mk. 15:26; Lk. 23:38; Yḥ. 19:19. 38 Xenni ṣellben akides tnayen n ixewwanen, ijjen ɣar ufusi nnes u ijjen ɣar uzeřmaḍ nnes. ◘27:38 Ica. 53:12. 39 Inni tuɣa ittekkan, ttceqqafen dayes, tthezzan azeǧif nsen, ◘27:39 Izhd. 22:8; 69:21; Mk. 15:29; Lk. 23:35. 40 nnan: “A Cek, wenni ihedmen Zzawect Tameqqrant u di třata n wussan ad tt tebnid ɛawed, senjem Ixef nnec. Mařa Cek d Mmis n AREBBI, hwa-dd xenni zi ṣṣalib.” ◘27:40 Mt. 26:61; Yḥ. 2:19. 41 Uřa d imeqqranen n ikehhanen ak-d imseřmaden n idlisen d imɣaren n řgens d Ifarisiyyen stehzan zzayes amenni, nnan: 42 “Issenjem inneɣni maca war izemmar ad issenjem xef nnes. Mařa Netta d Ajeǧid n Israil, ejj i-t ad dd-ihwa zi ṣṣalib, ad zzayes namen. 43 Ittceř x AREBBI. Ejj i-t Netta ad t issenjem mařa yarḍa xas, minzi inna: ‘Necc d Mmis n AREBBI’.” 44 Uřa d ixewwanen, inni tuɣa ittwaṣellben akides, tuɣa ssfeṭṭaḥen zzayes amenni.

45 Zi tsaɛɛet wiss setta, aqa-tt d ḍḍhur, tewḍa-dd taǧest x marra tammurt ař tasaɛɛet wiss tesɛa, aqa-tt d třata n uɛecci. 46 Jjwayeh n tsaɛɛet wiss tesɛa isɣuy Yasuɛ s tmijja ijehden, inna: “A AREBBI inu, a AREBBI inu, mayemmi dayi tsemḥed?” ◼27:46 Il, Il, lmana cabaqtani - tuɣa Yasuɛ issawař s yiřes n Třamit am t ssawařen marra Wudayen di Urcalim d temmurt n Ljalil.  ◘27:46 Izhd. 22:2; Ɛbr. 5:7. 47 Řami d as sřan inni din ibedden, nnan ca zzaysen: “Ittřaɣa x Iliya.” 48 Deɣya yuzzeř-dd ɣares ijjen zzaysen, iksi spunxa, issuff i-tt s řxeǧ, igga i-tt x ijj n uɣanim uca iwca as ad isu. ◘27:48 Izhd. 69:22; Yḥ. 19:29. 49 Inneɣni nnan: “Ejj i-t, ad nẓar, ma ad dd-yas Iliya ḥima ad t issenjem.” 50 Isɣuyy Yasuɛ ɛawed s tmijja ijehden uca issarxu Arruḥ nnes. ◘27:50 Lk. 23:46.

51 Xzar, ařeḥḥaf n wadaf ɣar Zzawect Tameqqrant ittwacarreg x tnayen zi sennej ař swadday, tammurt tenhezz, tiṣuḍar feǧqent, ◼27:51 ařeḥḥaf - niɣ ‘arwaq’.  ◘27:51 2 Im. 3:14; Mk. 15:38; Lk. 23:45. 52 imeḍřan ttwarezmen uca aṭṭas n arrimat n imqeddasen inni tuɣa iṭṭṣen din, ttwassnekkarent-dd. 53 Nitni ffɣen zeg imeḍřan, uca awarni i tnukra nnes udfen ɣar tendint iqeddsen uca banen-dd i waṭṭas. 54 Řami řqebṭan x mya d yinni tuɣa akides iḥeṭṭan Yasuɛ, ẓrin anhezzi n temmurt d min imsaren, ggʷeden aṭṭas, nnan: “S tidett tuɣa Wa d Mmis n AREBBI.” ◘27:54 Mk. 15:39; Lk. 23:47. 55 Tuɣa din aṭṭas n temɣarin tinni tuɣa ixezzaren zi řaggʷaj, ḍfarent Yasuɛ zi Ljalil ḥima ad xas sexxarent. ◘27:55 Izhd. 38:12; Mk. 15:40; Lk. 8:2; 23:49. 56 Jarasent Maryam n Majdala d Maryam, yemmas n Yaɛqub d Yasi, d yemmas n ayt n Zabdi.

57 Řami dd-tiweḍ tmeddit, yusa-dd ijj n weryaz zi Ramta, qqaren as Yusuf. Netta tuɣa ɛawed d ameḥḍar n Yasuɛ. ◘27:57 [Mk. 15:42-47; Lk. 23:50-56; Yḥ. 19:38-42] 58 Iruḥ ɣar Pilaṭus, ittar as arrimet n Yasuɛ. Řexdenni iweṣṣa Pilaṭus, maḥend ad as wcen arrimet 59 Yusuf iksi arrimet inneḍ i-tt deg ict n txeyyaḍt n řeqṭen azdad iṣfan, 60 issars i-tt deg ijj n wenḍeř n jdid i tuɣa iɣza, uca awarni řami isseqnunni ict n teṣḍart ḥima ad iqfeř tawwart n wenḍeř, iruḥ. ◘27:60 Mk. 15:46; Lk. 23:53. 61 Tuɣa din Maryam n Majdala d Maryam nneɣnit qqiment qibač i wenḍeř.

62 Tiwecca nnes awarni ass n Usewjed, munen imeqqranen n ikehhanen d Ifarisiyyen ɣar Pilaṭus, ◼27:62 ass n Usewjed - netta d ass qbeř wass n ssebt (‹Matta 27:62›) n Řɛid n Tɣarṣt n Useɛdu (qqaren as 'Basxa') nni di sswejden Wudayen ijj n yezmar i macca, ssirden, yarḍen arruḍ ittxeṣṣen umi dd-ffɣen zi Miṣra (Uffuɣ 11-13). 63 nnan: “A siditneɣ, neɛqeř belli aɣeccac-a, am tuɣa ɛad iddar, inna: ‘Awarni třata n wussan ad kkareɣ!’ ◘27:63 Mt. 16:21; 17:23; 20:19; Mk. 8:31; 10:34; Lk. 9:22; 18:33; 24:6. 64 S uya umur, ḥima ad ḍemnen anḍeř ař ass wiss třata, ḥima ad taɣ imeḥḍaren nnes war dd-ttisen s ǧiřet ad t acaren, xenni ad inin i řgens, aqa ikkar-dd zi taddart n imettinen, uca ammu i ɣa yiři uweddar aneggaru ktar x umezwar.” 65 Inna asen Pilaṭus: “Aqa ɣarwem iɛessasen, ruḥem, ḍemnen t am mammec tᵉttwařam.” 66 Ruḥen ḥima ad ɛessen x wenḍeř uca ḍemnen aẓru, nitni jmiɛ ak-d iɛessasen.