1 Deg wass wiss třata temsar ict n tmeɣra di Qana, ict n tendint di Ljalil. Tuɣa din yemmas n Yasuɛ. 2 Uřa d Yasuɛ d imeḥḍaren nnes ttwaɛarḍen-dd ɣar tmeɣra. 3 Řami iqḍa binu, tenna as yemmas i Yasuɛ: “War ɣarsen bu binu!” 4 Yasuɛ inna as: “Min din jar ayi akidem, a tamɣart? Tasaɛɛet inu war dd-tiwiḍ ɛad!” 5 Yemmas tenna i imsexxaren: “Min d awem i ɣa yini, ggem t.”

6 Tuɣa din setta n iqeddwaḥ n weẓru daysen aman, mmarsen dinni am mammec nnumen tteggen Wudayen řuḍu, kuř ijjen zzaysen ɣares řqedd n tnayen ař třata n ‘iribaɛen’. ◼2:6 iribaɛen - niɣ ‘imitriten’ di tutlayt n Tyunanit. Ijj n zzaysen dayes ɛřaḥař tmanyin ař mya u-ɛicrin litru. 7 Yasuɛ inna asen: “Ccurem iqeddwaḥ s waman!” Uca ccuren ten s waman ař aqemmum. 8 Xas uca inna asen: “Řexxu ssfarrɣem cwayt zzaysen, wcem t i bab n wurar.” Uca ssiwḍen t. 9 Umi bab n wurar iqeǧeb aman i idewřen d binu - maca netta war issin manis dd-ikka, maca imsexxaren nni d as dd-yuymen aman, ssnen - iřaɣa-dd bab n tmeɣra x wesři. 10 Inna as: “Kuř bnadem ittqeddam binu aṣebḥan d amezwaru. Mařa inewjiwen swin aṭṭas, ad asen iwc binu war iḥřin, maca cek txemmřed binu iṣebḥen ař i řexxu.”

11 D ta d řeɛřamet tamezwarut i igga Yasuɛ, di Qana di Ljalil. Isseḍhar-dd aɛuǧi nnes uca umnen zzayes imeḥḍaren nnes. 12 Awarni man aya ihwa-dd ɣar Kafarnaḥum, Netta d yemmas, d aytmas, d imeḥḍaren nnes, uca qqimen din ca n wussan.

13 Řami dd-yiweḍ Řɛid n Tɣarṣt n Useɛdu, Řɛid n Wudayen, igeɛɛed Yasuɛ ɣar Urcalim. ◘2:13 [Mt. 21:12-13; Mk. 11:15-17; Lk. 19:45-46] 14 Yufa di Zzawect Tameqqrant inni din izznuzan iyenduzen d wuǧi d idbiren, uřa d iṣarrafen n tenɛacin i din iqqimen. ◘2:14 Mt. 21:12; Mk. 11:15; Lk. 19:45. 15 Igga ijj n urekkuḍ zeg iseɣwan i Yixef nnes, uca yuẓẓeř xasen marra zi Zzawect Tameqqrant, uřa d uǧi d iyenduzen d iṣarrafen, uca izeǧeɛ iṣuldiyyen nsen di temmurt, inneqřeb ṭṭwabeř nsen. 16 Inna i yinni izznuzan idbiren: “Kksem man aya ssa! War ttarrim ca Taddart n Baba d taddart n ssuq!” 17 Xenni ɛeqřen imeḥḍaren nnes belli tura: “Cḍaret i Taddart nnec icca ayi.” ◘2:17 Izhd. 69:10.

18 Maca Udayen arrin-dd, nnan as: “Man řeɛřamet i d aneɣ ɣa temřed, belli aqa ɣarek řḥeqq ḥima ad tegged man aya?” ◘2:18 Mt. 12:38; 16:1; Mk. 8:11; Lk. 11:29; Yḥ. 6:30. 19 Yasuɛ yarra-dd, inna asen: “Hedmem Zzawect Tameqqrant tanita uca di třata n wussan ad tt ssbeddeɣ.” ◘2:19 Mt. 26:61; 27:40; Mk. 14:58; 15:29. 20 Nnan as Wudayen: “Zzawect Tameqqrant tanita tebna di setta u-rebɛin n iseggʷusa, ma Cek texsed ad tt-i-dd-tessbedded di třata n wussan?” 21 Maca Netta tuɣa issawař x Zzawect Tameqqrant n Arrimet nnes.

22 Awarni řami dd-ikkar Yasuɛ zi taddart n imettinen, ɛeqřen imeḥḍaren nnes min d asen inna, uca umnen di Tira Iqeddsen u deg wawař i inna Yasuɛ. ◘2:22 Lk. 24:8.

23 Umi Yasuɛ tuɣa di Urcalim, di Řɛid n Tɣarṣt n Useɛdu, umnen waṭṭas dayes řami ẓrin řeɛřamat i igga. 24 Maca Yasuɛ war isscen ca Ixef nnes ɣarsen, minzi Netta issen marra iwdan, 25 war iḥdij ca ad as iched ḥed x bnadem, minzi Netta s Yixef nnes issen min iǧan di bnadem. ◘2:25 1 Ṣm. 16:7; 1 Im. 28:9; Izhd. 7:10; 103:14; Irm. 11:20; 17:10; 20:12; Yḥ. 6:64.