1 Řami dd-qarrben ɣar Urcalim, iwḍen ɣar Bayt-Faji, ɣar uɣezdis n wedrar n Zzitun, issekk Yasuɛ tnayen n imeḥḍaren nnes, inna asen: ◘21:1 [Mk. 11:1-11; Lk. 19:28-38] — Yḥ. 12:12-19 2 “Ruḥem ɣar dcar nni qibač nwem. Deɣya ad tafem ict n teɣyuč teqqen d ijj n wesnus akides. Fesyem asen, tawyem ten-dd ɣari. 3 Mařa inna awem ḥed ca, arrem xas ammu: ‘Aqa Siditneɣ iḥdaj i-ten. Netta ad ten dd-yarr deɣya.’ ” 4 Man aya qaɛ imsar, ḥima ad ittwakemmeř marra min ittwannan zeg unabi am inna:

5 “Inim i yeǧis n Ṣihyun:

‘Xzar, Ajeǧid nnem

ad ɣarem dd-yas s uwaḍeɛ,

yenya x weɣyuř d wesnus,

aqa d mmis n teɣyuč.” ◘21:5 1 Ij. 1:38-40; Ica. 62:11; Zak. 9:9; Yḥ. 12:15.

6 Ruḥen imeḥḍaren uca ggin am mammec ten yumur Yasuɛ. 7 Iwyen-dd aɣyuř d wesnus, sarsen arruḍ nsen x wesnus uca inya xas Yasuɛ. ◘21:7 2 Ij. 9:13; Yḥ. 12:14. 8 Aṭṭas zi řɣaci ssun arruḍ nsen deg webrid u inneɣni qessen řefruɛ zi tcejjura, nḍaren ten deg webrid. 9 Uca abarru n řɣaci nni d as izwaren d yinni i-t-i-dd iḍfaren, tuɣa sɣuyyun, nnan:

“Uṣanna i Mmis n Dawud!

Lbaraka i Wenni dd-yusin s Yisem n SIDI.

Uṣanna, di řuɛřa x řuɛřa n ijenwan.” ◘21:9 Izhd. 118:25, 26; Mk. 11:9, 10; Yḥ. 12:13

10 Řami yudef ɣar Urcalim, thaj tendint qaɛ, iwdan nnan: “Min iɛna Wa?” 11 Řɣaci inna: “D Wa d Anabi Yasuɛ zi Nnaṣira di Ljalil.”

12 Yudef Yasuɛ ɣar Zzawect Tameqqrant n AREBBI, issuffeɣ marra inni izznuzan d yinni issaɣen di Zzawect Tameqqrant uca iqřeb ṭṭwabeř n iṣarrafen n tenɛacin d řekrasi n yinni izznuzan idbiren. ◘21:12 [Mk. 11:15-19; Lk. 19:45-48; Yḥ. 2:13-22] — Aɛwd. 14:26 13 Inna asen: “Aqa tura: ‘Taddart inu ad tᵉttwasemma ‘Taddart n tẓaǧit’, maca kenniw tarrim tt d ifri n iceffaren.’ ” ◘21:13 1 Ij. 8:29; Ica. 56:7; Irm. 7:11; Lk. 19:46. 14 Iwyen-dd ɣares di Zzawect Tameqqrant idarɣařen d ineɛḍaben uca issgenfa ten. 15 Umi ẓrin imeqqranen n ikehhanen d imseřmaden n idlisen lmuɛjizat i yegga u aqa iḥenjiren ttřaɣan di Zzawect Tameqqrant, qqaren: “Uṣanna i Mmis n Dawud!”, xeyyqen aṭṭas, 16 nnan as: “Ma tesřid min qqaren yina?” Inna asen Yasuɛ: “Wah, ma war teɣrim ɛemmarṣ: ‘Zeg iqemmumen n iḥenjiren d iseyman tesswejded Cek ttesbiḥ’?” ◘21:16 Izhd. 8:3. 17 Řexdenni ismeḥ daysen, iffeɣ barra i tendint ɣar Bayt-Ɛanya, insa din.

18 Ɣar ṣṣbeḥ zic řami dd-idweř ɣar tendint, tuɣa dayes řaẓ. ◘21:18 [Mk. 11:12-14; 20-24] 19 Iẓra ijj n wartu x webrid, iruḥ ɣares, war dayes yufi mɣir tifray waha. Xenni inna i wartu: “War zzayek tteffeɣ řɣiǧet ɛemmarṣ.” Řexdenni yuẓeɣ wartu deɣya. ◘21:19 Ḥuc. 9:10 20 Umi ẓrin imeḥḍaren man aya, tbehten, nnan: “Mammec igga wartu yuẓeɣ deɣya?” 21 Yasuɛ yarra-dd, inna asen: “S tidett Necc ad awem iniɣ: Mařa daywem l’iman u war tcekkim ca, aqa war tᵉtteggem min imsaren i wartu waha, maca ɛawed mařa tennam i wedrar-a: ‘Meksi, wḍa di řebḥar!’, ad yiři. ◘21:21 Mt. 17:20; Lk. 17:6. 22 D qaɛ min ɣa tᵉttarem di tẓaǧit s l’iman, ad t tᵉṭṭfem.” ◘21:22 Mt. 7:7; Mk. 11:24; Lk. 11:9; Yḥ. 14:13; 16:24; Yaɛ. 1:5; 1 Yḥ. 3:22.

23 Řami yudef ɣar Zzawect Tameqqrant, usin-dd ɣares imeqqranen n ikehhanen d imɣaren n řgens am tuɣa isseřmad, nnan: “S man ṣṣulṭa i teggid timesřayin-a? Wi d ac iwcin ṣṣulṭa-ya?” ◘21:23 [Mk. 11:27-33; Lk. 20:1-8] — Uf. 2:14; Řex. 4:7; 7:2. 24 Yasuɛ yarra-dd, inna asen “Uřa d Necc ad kenniw sseqsiɣ ijj n useqsi u mařa tarrim-dd xafi uřa d Necc ad awem iniɣ s man ṣṣulṭa i tteggeɣ timesřayin-a. 25 Aseɣḍaṣ n Yuḥanna, manis netta? Zeg ujenna niɣ zeg iwdan?” Mcawaren nitni jar asen, nnan: “Mařa nenna: ‘Zeg ujenna!’, ad aneɣ ini: ‘Mayemmi war zzayes tuminem?’, 26 u mařa nenna: ‘Zeg iwdan!’, xenni dayneɣ tiggʷudi zi řɣaci, minzi marra ḥessben Yuḥanna d anabi.” ◘21:26 Mt. 14:5; Mk. 6:20. 27 Arrin-dd, nnan: “War nessin.” Inna asen Netta: “Xenni uřa d Necc war d awem qqareɣ s man ṣṣulṭa i tteggeɣ man aya.”

28 “Min d awem ittɣiř kenniw? Ijj n weryaz tuɣa ɣares tnayen n iḥenjiren. Iřaɣa x umezwaru, inna: ‘A mmi, uyur, ass-a ad txedmed deg umarjeɛ n uḍiř!’ 29 Netta yarra-dd, inna: ‘Necc war xseɣ ca!’, maca awarni man aya indem uca iruḥ din. 30 Uca yusa-dd netta ɣar wenni wiss tnayen, inna as amenni beɛda. Wanita yarra-dd xas: ‘Wah, a sidi!’, maca war iruḥ ca! 31 Man wen zzaysen i iggin řxaḍar i babas?” Nitni arrin-dd xas: “Wenni d amezwaru.” Yasuɛ inna asen: “S tidett, Necc ad awem iniɣ, aqa ayt n ḍḍariba d temɣarin n farq-ccɣeř ad awem izwaren ɣar Tgeldit n AREBBI. 32 Minzi Yuḥanna yusa-dd ɣarwem deg webrid n tsegda, kenniw war zzayes tuminem, maca ayt n ḍḍariba d temɣarin n farq-ccɣeř aqa nitni umnen zzayes. Řami teẓrim man aya, war tᵉtubem ca ɣar uneggaru, maḥend ad zzayes tamnem.” ◘21:32 Mt. 3:1.

33 “Sřem ɛawed i yijj n umedya nneɣni. Tuɣa din ijj n weryaz, bab n taddart, igga ijj n umarjeɛ n uḍiř, iẓẓu dayes tizayarin. Netta iquwwar as-dd s yijj n wefray, iɣza dayes tasirt n uḍiř uca ibna dayes ict n ṣṣumɛet. Xenni yarhen amarjeɛ nni n uḍiř i ca n ixemmasen uca isafar. ◘21:33 [Mk. 12:1-12; Lk. 20:9-19] — Izhd. 80:9; Ica. 5:1-7; Irm. 2:21; 12:10; 34 Umi dd-tiweḍ řweqt n ṣṣabet n řɣiǧet, issekk imsexxaren nnes ɣar ixemmasen nni ḥima ad dd-awyen řɣiǧet nnes. 35 Ixemmasen ṭṭfen imsexxaren nnes, wtin ijjen, nɣin nneɣni uca arejmen ɛawed ijjen nneɣni. ◘21:35 2 Im. 24:21. 36 Ɛawed issekk imsexxaren nneɣni, ktar zeg umezwaru, uca ggin daysen ɛawed amenni. 37 Ɣar uneggar issekk asen-dd mmis, inna: ‘Nican ad weqqaren mmi’. 38 Maca řami ẓrin ixemmasen mmis, nnan jar asen: ‘Aqa d awrit, zidem, ad t neneɣ, ad as nekkes řwart i neccin.’ ◘21:38 Amz. 37:17; Izhd. 2:1, 8; Mt. 26:3; 27:1; Yḥ. 11:53; Ɛbr. 1:2. 39 Ṭṭfen t, nḍaren t barra i umarjeɛ n uḍiř uca nɣin t. 40 Mařa yusa-dd bab n umarjeɛ nni, min ɣa yegg deg ixemmasen nni?” 41 Nnan as: “Ad yareddeǧ iɛeffanen nni qaɛ, uca ad iwc amarjeɛ n uḍiř i ixemmasen nneɣni inni d as i ɣa iwcen řɣiǧet di řweqt nnes.” 42 Yasuɛ inna asen: “Ma war teɣrim ɛemmarṣ deg idlisen:

‘Aẓru i iɛiffen ibennayen,

aqa idweř d aẓru Azeǧif n teɣmart.

Wa yusa-dd zi SIDI

u man aya d řeɛjeb di tiṭṭawin nneɣ.’ ◘21:42 Izhd. 118:22-23; Ica. 8:14; 28:16; Mk. 12:10; Lk. 20:17; Řex. 4:11; Rum. 9:33; 1 Bṭ. 2:6.

43 S uyenni ad awem iniɣ, belli Tageldit n AREBBI ad awem tᵉttwakkes uca ad temmewc i yijj n řgens i ɣa iwcen řɣiǧet nnes. ◘21:43 Uf. 32:10; Ica. 55:5; Mt. 8:12. 44 Wi ɣa iwḍan x weẓru-ya, ad ittwařbez, u wi xef i ɣa iwḍa, ad t iřbez.” ◘21:44 Ica. 8:15; Dan. 2:34; Zak. 12:3; Lk. 20:18.

45 Řami sřin imeqqranen n ikehhanen d Ifarisiyyen imedya nnes, fehmen belli issawař xasen. ◘21:45 Lk. 20:19. 46 Arezzun ad t ṭṭfen, maca ggʷeden zi řɣaci, minzi řɣaci tuɣa iḥesseb i-t d ijj n unabi. ◘21:46 Lk. 7:16; Yḥ. 7:40.