1 “Ttexseɣ ad ɣennjeɣ izři i llif inu, izři n llif inu x umarjeɛ nnes n uḍiř:

‘Llif inu ɣares ijj n umarjeɛ n uḍiř

x ijj n wedrar i dd-ittwassgeɛɛden

am ijj n yicc n ijj n mmis dehnen t s zzect. ◼5:1 s zzect - s Tɛibranit ‘n zzect’.

2 Netta inqec i-t u iṣeffa i-t zeg iẓra,

iẓẓu t s tzayarin icennɛen.

Netta issbedd ijj n lburj di řwesṭ nnes.

Inqec dayes tasirt n uḍiř.

Xenni tuɣa issitim,

aḥwic n tzayart ad dd-yawi aḍiř,

maca netta yiwi-dd aḍiř asemmam.’ ”

3 “Xenni řexxu, a imezdaɣ n Urcalim d kenniw iryazen n Yahuda, ḥekmem jar ayi d umarjeɛ inu n uḍiř! 4 Min zemmareɣ Necc ɛad ad ggeɣ i umarjeɛ inu n uḍiř nni war d as ggiɣ ɛad? Mayemmi ssitimeɣ aqa ad dd-yawi aḍiř mliḥ, umi dd yiwi mɣir aḍiř asemmam? ◘5:4 Irm. 2:5; Mixa 6:3, 8 5 Xenni řexxu, Necc xseɣ ad awem ssecneɣ min ɣa ggeɣ ak-d umarjeɛ inu n uḍiř: Necc ad kkseɣ afray nnes i t iḥḍan, ḥima ad t řeqḍen qaɛ, ad ggeɣ ict n tazzit di řḥiḍ ař xas i ɣa ɛefsen. ◘5:5 Izhd. 80:13 6 Ad t ggeɣ d řexřa, war t zebbaren niɣ ad t carzen, maca tazeggʷart d isennanen ad dinni ɣemyen u Necc ad umureɣ iseynuten maḥend war d as tticen anẓar. 7 Maɣar amarjeɛ n uḍiř n SIDI n řɛeskarat d taddart n Israil u iryazen n Yahuda d taɣeddut min xef yarḍa. Iraja řḥeqq, maca xzar, tuɛeffna, iraja tasegda, maca xzar, tɣuyyit.” ◘5:7 Izhd. 80:9

8 “Uct x yinni ittseddan taddart ɣar taddart u arennyen iyyar ɣar yeyyar, ař tafed war da iǧi wemcan ɛad u kenniw waha i izeddɣen di řwesṭ n temmurt! ◘5:8 Mixa 2:2 9 Inna ayi SIDI n řɛeskarat deg imezzuɣen inu: ‘S tidett, aṭṭas n tudrin ad dewřent d řxirbet issaggʷaden, tudrin timeqqranin d tinni icnan war daysent izeddeɣ ɛad uřa d ijj.’ 10 Minzi ɛecra n ifeddanen n umarjeɛ n uḍiř ad awyen mɣir ijj n ubatu, u ijj n uḥumir n zzarriɛet ad yawi mɣir ijj n ifa n řḥebb n irden.” ◼5:10 abatu - ijj n ‘ubatu’ ɛraḥař 20 niɣ 40 litru.

11 “Uct x yinni ikkaren zic, arezzun x ccrab u ttɣiman wsewsen ař tbambast, ař ten isseḥma binu! ◘5:11 Awřn. 23:29,30 12 Řgambri d lharpa d ubendir d temja d binu aqa aten ɣar zzradi nsen, maca min ittegg SIDI war ɣares xezzaren, tameggit n ifassen nnes, war tt ttwiřin. 13 S uya ad ittwandeh řgens inu di lmenfa, minzi war ɣares teǧi tussna. Tarwa n taṣiřet n řgens ad heyyfen, ad yaẓeɣ ubarru nsen s ufadi. ◘5:13 Ɛam. 6:7 14 S uya i ɣa tarzem řaxart aṭṭas tmijja nnes, ad yarzem aqemmum nnes nhřa řeqyas, maḥend ad dayes ihwa řɛezz nnes d ubarru nnes d ddriz nnes d marra inni dayes ineggzen ammu s řefraḥet. 15 Xenni ad ixnes bnadem uca kuř aryaz ad ittwassehwa, uca tiṭṭawin n ayt n bu-nnfaxet ad dewřent xezzarent ɣar swadday. 16 Maca SIDI n řɛeskarat ad ittwassɛuǧa s řḥeqq u Arebbi d amqeddas ad uttwaqeddes s tsegda. 17 Ad hedden dinni izmaren am ttheddan x tkessawt nsen, uca ibarraniyyen ad ccen řexrabi n ayt n bu-wagřa.” ◘5:17 Ica. 14:30

18 “Uct x yinni ɣarsen dd-ijebbden řmuɛṣiyyet s tesɣunin n řɣecc uřa d ddenb s iseɣwan iqebbuzen n ukarru n iɛejmiyyen, 19 inni iqqaren: ‘Ejj i-t ad yazzeř, ejj i-t ad t igg deɣya ḥima ad t nẓar, uca ccwar n Umqeddes n Israil ejj i-t ad ixecc, ad dd-yas, ḥima ad t nessen!’ ”

20 “Uct x yenni, min war iḥřin qqaren as iṣbeḥ u min iṣebḥen war iḥři, inni itteggen taǧest d tfawt u tafawt d taǧest, inni itteggen min yarzigen d miẓid u min iziḍen d amarzag.”

21 “Uct x yinni umi ittɣiř asen aqa aten d imiɣisen i yixef nsen, u uct x yinni iḥessben ixef nsen d ifehhamen!” ◘5:21 Awřn. 3:7; Rum. 12:16

22 “Uct x yinni iǧan d ayt n bu-teɣruḍt ɣar tsessit n binu u x yeryazen imeḥḍen ɣar weḥray n ccrab, 23 inni ittsarraḥen i uɛeffan s terzeft iɣeccen, maca kksen tasɣart i imseggaden.” ◘5:23 Awřn. 17:15; 24:24

24 “S uya i ɣa ixsar weẓwar nsen u tanewwact nsen ad tᵉḍuw am tɛejjajt, am mammec ittett iřes n tmessi iɣeǧ u am mammec ihekkwa wurum s uceɛɛař, maɣar nitni nḍaren Ccariɛa n SIDI n řɛeskarat u sseḥqaran zeg wawařen n Umqeddas n Israil. ◘5:24 Uf. 15:7; Ica. 9:18 25 X uya yarɣa weɣḍab n SIDI x řgens nnes uca iksi xas afus nnes. Aqa iwta i-t ařami arjijen idurar u řxecbat nsen meddent x imesraq am wefraḍ. S marra aya war yarexxu weɣḍab nnes, maca afus nnes iqqim isarreḥ. ◘5:25 Ica. 9:11, 16, 20; 10:4, 6 26 Maɣar ad issgeɛɛed taɛeǧant i řegnus nni iǧan di řaggʷaj, u zeg uneggaru n temmurt ad t iṣeffar ɣares. Xzar, ittas-dd deɣya s tezřa. 27 War ɣares yuḥiř uřa d ijj, uřa d ijjen inqarḍ, uřa d ijjen innudem niɣ iṭṭeṣ, uřa ɣar ijjen war ifsi abyas x tejɛinna nnes niɣ iqeṭṭes as ijj n ufiřu n sandaliyat nnes. 28 Fřitcat nnes qeḍɛent u marra řeqwas nnes ttwameḥḥḍen. Ticeḍyin n yeysan nnes banent qesḥent am uqayas, tijarrarin nnes am tḥaryaḍt. 29 Zzhir nnes am zzhir n teyradt u netta ittzehhar am yiyraden imeẓyanen. Ad yarruǧed, ad iṭṭef taymart nnes uca ad tt ijarr u war ittiři wi t ɣa ifekken. 30 Deg wass nni ad izehhar ḍidd řgens am zzhir n řebḥar. Ad xezzaren ɣar temmurt, aqa-tt mɣir d taǧest d řeḥṣaret, uca tafawt ad tebbarcen s iseynuten ibbarecnen.” ◘5:30 Ica. 8:22