Adlis Iqeddsen Awařen Iweznen 24

1 War ttasem.

zeg iryazen iɛeffanen,

war arezzu ca tmunet akidsen. ◘

2 Maɣar uř nsen itteqqer ɣar ureddeǧ,

awařen n iyencicen nsen

i dd-ittwayen ɣar arẓiyyet. ◘

3 Taddart tᵉttwabna s tiɣit,

tᵉttwassemten s řefhamet,

4 s tussna ttwaɛemmaren

ixxamen n daxeř,

s marra agřa iɣřan d wagřa iřiqqen.

5 Aryaz amiɣis ijhed,

aryaz n tussna yarenni di jjehd nnes, ◘

6 maɣar ittxeṣṣa

ad ittwandeh umenɣi s udebbar,

u s řemɣaret n umcawar ad yiři usenjem. ◘

7 Tiɣit tuɛřa x ubuhaři,

netta war yarezzem aqemmun nnes

di tewwart n tendint. ◘

8 Wenni ittxarriṣen di řɣar,

ad as řaɣan arrays n bu-teḥřaymect.

9 Řemwayař n uxarreṣ n ubuhaři d ddenb,

u amestehziy d nnɛi i bnadem.

10 Mařa tarxud zeg ixef nnec

deg wass n řeḥṣaret,

ammu uřa d jjhed nnec ad tᵉttwaḥṣar.

11 Senjem inni ittwaṭṭfen

maḥend ad ttwanɣen,

inni ten ittawyen

ɣar mani ten i ɣa nɣen,

sbedd i-ten! ◘

12 Mařa cek ad tinid:

“Xzar, aqa war nessin walu x man aya!”,

ma wenni iwezznen uřawen,

war t issargib?

Wenni iḥeṭṭan řeɛmar nnec, issen i-t!

Netta ad ixeǧeṣ bnadem

ɛlaḥsab řxedmet nnes. ◘

13 Ecc tamment, a mmi,

maɣar nettat teṣbeḥ,

tamment n teɣrast

aqa d tmiẓidt i waneɣ nnec.

14 Ammu i teǧa tussna n tiɣit

i řeɛmar nnec.

Mařa tufid tt, xenni teǧa tiwecca,

řayas nnec war ittwaqeṭṭeɛ ca. ◘

15 A aɛeffan, war tᵉttḥama

x tzeddiɣt n umsegged,

war heddem amcan n wareyyeḥ nnes!

16 Maɣar amsegged

ad iwḍa sebɛa n twařawin,

ad dd-ikkar ɛawed,

maca iɛeffanen ad nnqarḍen s řɣar. ◘

17 War farreḥ i uweṭṭu n řeɛdu nnec,

mařa netta inqarḍ,

ejj uř nnec war ifarreḥ, ◘

18 maḥend SIDI war t iẓarr

u man aya ad yiři d řɛib di tiṭṭawin nnes,

ařami Netta ad xas issḥeyyed aɣḍab nnes.

19 War ttxeyyiq aṭṭas

x wenni itteggen řɣar,

war ttasem zeg iɛeffanen, ◘

20 maɣar aqa wenni itteggen řɣar

war ɣares tiwecca,

řefnar n iɛeffanen ad ittwassexsi. ◘

21 A mmi, ggʷed SIDI d ujeǧid,

war ttxeǧeḍ ca ixef nnec

ak-d yinni ixsen ad nqeřben kuřci,

22 maɣar ad dd-yas uḍeyyeɛ nsen

deg ijj n umur,

wi issnen aneggaru aɛeffan

n iseggʷusa nsen?

Awařen iweznen n ayt n tiɣit -tasɣart 2

23 Uřa d yina d awařen iweznen n imiɣisen.

Asfarz n wudmawen di ddeɛwet

war iǧi ca mliḥ. ◘

24 Wenni iqqaren i uɛeffan: “Cek d amsegged!”,

wanita ad t neɛřen řegnus,

ad t carhen ccuɛub. ◘

25 Maca inni ten i ɣa iḥakmen,

ad iřin mliḥ,

lbaraka s marra řxar ad ɣarsen dd-tas.

26 Am ijjen wenni issudumen iyencicen,

ammu i yeǧa wenni dd-ittarran

s wawařen iseggmen.

27 Sewjed řxedmet nnec barra,

kemmeř i-tt i yixef nnec deg iyyar,

uca bna taddart nnec awarni man aya!

28 War ttiři d acehhad břa ssibbet

x jjar nnec.

Ma iɛeddeř ad tɣarred s iyencicen nnec?

29 War qqar: “Am mammec i d ayi igga,

ammu i dd-as ɣa ggeɣ uřa d necc!”,

maɣar Necc ad dd-xeřfeɣ zi kuř ijjen

ɛlaḥsab řxedmet nnes. ◘

30 Necc kkeɣ x yeyyar n ijj n umeɛguz,

x umarjeɛ n uḍiř n ijj n bnadem

s wuř nnes war imtinen.

31 Xzar, tgeɛɛed-dd xas marra teyzit,

tedřa tzeggʷart udem n temmurt nnes,

aqa řḥiḍ nnes n weẓru ittwahdem.

32 Řami tt ẓriɣ, ksiɣ tt ɣar wuř inu,

ẓriɣ tt uca ksiɣ tt am yijj n uwebbex.

33 “Ejj ayi ad ṭṭṣeɣ cwayt drust,

cwayt drust n unudem,

cwayt drust n ubuzzeř s ifassen ḍefṣen, ◘

34 dinni dd ɣa yas zzeřḍ nnec,

uřa d řeɣben nnec

am yijj n weryaz s řesnaḥ.” ◘

◘24:1 24:1 Izhd. 37:1; Awřn. 3:31; 23:17

◘24:2 24:2 Izhd. 10:7

◘24:5 24:5 Awřn. 21:22

◘24:6 24:6 Awřn. 11:14; 15:22; 20:18

◘24:7 24:7 Awřn. 14:6

◘24:11 24:11 Izhd. 82:4

◘24:12 24:12 Ayub 34:11; Izhd. 62:13; Irm. 32:19; Rum. 2:6; Asa. 22:12

◘24:14 24:14 Izhd. 19:11; 119:103; Awřn. 23:18

◘24:16 24:16 Ayub 5:19; Izhd. 34:20; Ɛam. 5:2; 8:14

◘24:17 24:17 Ayub 31:29; Awřn. 17:5

◘24:19 24:19 Izhd. 37:1; 73:3; Awřn. 3:31; 23:17; 24:1

◘24:20 24:20 Ayub 18:5, 6; Awřn. 13:9; 20:20

◘24:23 24:23 Uf. 23:3, 6; Lawi 19:15; Aɛwd. 1:17; 16:19; Awřn. 18:5; 28:21; Yḥ. 7:24; Yaɛ. 2:1

◘24:24 24:24 Awřn. 17:15; Ica. 5:23

◘24:29 24:29 Rum. 12:17, 19

◘24:33 24:33 Awřn. 6:10, 11

◘24:34 24:34 Awřn. 6:11