1 X uyenni ttřaɣiɣ kenniw, a aytma, s arreḥmet tameqqrant n AREBBI, ad tqeddmem arrimat nwem d taɣarṣt iddaren, iqeddsen, yarḍan i AREBBI, wa d aɛbad nwem icuwwaren. ◘12:1 Rum. 6:13, 16; 1 Bṭ. 2:5. 2 War temquddam ak-d ddunect-a, maca beddřem s uřeqqem n řeɛqeř nwem zi jdid, ḥima ad tqeǧbem min ixs AREBBI: min icnan d min yarḍan d min ikemmřen. ◘12:2 Afa. 5:17; 1 Ts. 4:3; 1 Yḥ. 2:15.

3 Aqa s arḍa tenni d ayi immewcen, qqareɣ awem marra: war ttxarriṣem sennej i min ittřiq uxarraṣ nnes, maca xarrṣem nican ɛlaḥsab řqedd n l’iman i iwca AREBBI i kuř ijjen zzaywem. ◘12:3 Rum. 1:5; 1 Kur. 12:11; Afa. 4:7. 4 Am mammec ɣarneɣ aṭṭas n iɣezdisen deg ict n arrimet uca marra iɣezdisen n arrimet war ɣarsen bu řxedmet d icten, ◘12:4 1 Kur. 12:27; Afa. 1:23; 4:16; 5:23; Kul. 1:24. 5 ammu neccin, waxxa d aṭṭas, aqa aneɣ d ict n Arrimet di Lmasiḥ d iɣezdisen ijjen i wenneɣni. ◘12:5 1 Kur. 12:4; 2 Kur. 10:13; 1 Bṭ. 4:10. 6 Maca ɣarneɣ tiwhibin immsebḍan ɛlaḥsab arḍa i d aneɣ immewcen: ijjen ɣares tawhibt maḥend ad inebb ɛlaḥsab řqedd n l’iman, ◘12:6 1 Kur. 12:4. 7 wenneɣni ɣares nneyyet n tsexxart maḥend ad isexxar, niɣ tawhibt n umseɣɣar maḥend ad issɣar, ◘12:7 1 Kur. 12:10; 1 Bṭ. 4:10, 11. 8 niɣ tawhibt n usfewwej maḥend ad issfewwej, niɣ tawhibt maḥend ad iwc s tecrimet, niɣ tawhibt n uḍebbar s wemḥaḍ, niɣ tawhibt n arreḥmet s řefraḥet. ◘12:8 Aɛwd. 15:7; Mt. 6:1, 2, 3; 2 Kur. 9:7.

9 Ad tiři tayri nwem břa nnifaq. Carhem řɣar, tcebbarem di min icnan. 10 Iřim mliḥ ijjen ak-d tawmat nwem, xsem ijj i wenneɣni, izzarem ad tcennɛem ijjen wenneɣni. ◘12:10 Afa. 4:2; Fil. 2:3; 1 Bṭ. 5:5; Ɛbr. 13:1; 1 Bṭ. 1:22; 2:17. 11 Iřim d imḥaḍen, war ttiřim d ifinyanen. Iřim d timessi di arruḥ, ɛebdem Siditwem, 12 Farḥem di min iǧan asitem nwem, di řmeḥnet nwem ṣbarem uca ṭṭfem řebda di tẓaǧit. ◘12:12 Lk. 18:1; Rum. 15:13; Afa. 6:18; Kul. 4:2; 1 Ts. 5:16, 17; Ɛbr. 10:36; 12:1; Yaɛ. 5:7 13 Wcem afus di min iḥdajen imqeddasen. Ggem s řeḍrafet ak-d ibarraniyyen. ◘12:13 1 Kur. 16:1; Ɛbr. 13:2; 1 Bṭ. 4:9. 14 Barkem inni kenniw imarrten, barkem war neɛɛřem ca. ◘12:14 Mt. 5:44; 1 Kur. 4:12. 15 Farḥem ak-d inni ifarḥen, rum ak-d yinni ittrun. 16 Ḥesbem aytmatwem am mammec tḥessbem ixef nwem, War ttiřim d imɛeffaren, maca ruḥem ak-d imwaḍɛen. War ttiřim ca d imiɣisen ak-d yixef nwem. ◘12:16 Awřn. 3:7; Ica. 5:21; Rum. 15:5; 1 Kur. 1:10; Fil. 2:2; 3:16; 1 Bṭ. 3:8. 17 War ttarrim ca ḥed x řɣar s řɣar, maca ggem min icnan i marra iwdan. ◘12:17 Awřn. 20:22; Mt. 5:39; 1 Kur. 6:7; 2 Kur. 8:21; 1 Ts. 5:15; 1 Bṭ. 2:12. 18 Mařa tzemmarem, mecḥař ma i dd-ittasen zzaywem, ṣeřḥem ak-d marra iwdan. ◘12:18 Mk. 9:50; Ɛbr. 12:14. 19 War ttentiqimem ca i yixef nwem, a imɛizzen, maca wcem amcan i weɣḍab, minzi tura: “Mařa kenniw war tarrim tasɣart s yixef nwem, Necc ad arreɣ tasɣart newem, iqqar AREBBI.” ◘12:19 Aɛwd. 32:35; Mt. 5:39; Lk. 6:29; Ɛbr. 10:30.

20 Mařa iǧuẓ řeɛdu nwem, seccem t, mařa ifud, wcem as ad isu, minzi mařa teggid aya, ad tyarwed řefḥem itteḥduduqen x uzeǧif nnes. ◘12:20 Awřn. 25:21-22; Mt. 5:44. 21 War ttejjim ca řɣar ad kenniw iɣřeb, maca ɣeřbem x řɣar s řxar.