1 Ma izɛem ḥed zzaywem, xmi ɣares ccreɛ ak-d wenneɣni, ad zzayes iḥkem zzat n yinni war iseggden, war iǧi zzat i imqeddasen? 2 Niɣ war tessinem ca belli imqeddasen ad ḥekmen ddunect? Uca mařa xenni ddunect ad tᵉttwaḥkem zzaywem, ma war tzemmarem xenni ad tɛedřem ddɛawi timeẓyanin jar awem? ◘6:2 Mt. 19:28; Lk. 22:30. 3 Niɣ war tessinem ca belli ad neḥkem x lmalakat? Mecḥař ɛad ktar i ɣa neḥkem x yinni iǧan n ddunect-a? 4 Maca mařa din jar awem ict n ddeɛwet x tmesřayin n tudart-a, ma tᵉtteggem inni ɣar iǧa drus n uweqqar waha di tmesmunt ḥima ad ḥekmen? 5 Qqareɣ awem t ḥima ad tseḍḥam. Ma xenni war dinni ḥed jar awem d amiɣis wenni izemmaren ad iḥkem jar tawmat d umas? 6 Maca řexxu, ijj n tawmat ad icarreɛ ak-d umas u man aya qibač i yinni war yuminen ca. 7 S uya tḥekkmem x yixef nwem, minzi temcarraɛem jar awem. Mayemmi war tqebbřem ad kenniw ḍeǧen? Mayemmi war tqebbřem ca ad kenniw ɣeccen? ◘6:7 Awřn. 20:22; Mt. 5:39; Rum. 12:17; 1 Ts. 5:15; 1 Bṭ. 3:9. 8 Maca řexxu tᵉtteggem min war iseggden uca tᵉttɣeccam ɛad i aytmatwem.

9 Ma war tessinem ca belli inni war iseggden war warrten ca Tageldit n AREBBI? War ttraḥem ca di ɣalaṭ! Ayt n farq-ccɣeř, niɣ inni iɛebbden l’aṣnam, niɣ inni itteggen zzina, niɣ inni issexsaran, niɣ zzwameř, ◘6:9 Gal. 5:19; Afa. 5:5; Asa. 22:15. 10 niɣ iḍemmaɛen, niɣ iceffaren, niɣ iskarjiyyen, niɣ imceqqafen uřa d ibeɛɛajen war warrten Tageldit n AREBBI. 11 Tuɣa timesřayin-a řesqent ɣar ca zzaywem, maca aqa kenniw tᵉttwassirdem, aqa tᵉttwaqeddsem, aqa tᵉttwaseggdem s Yisem n Siditneɣ Yasuɛ Lmasiḥ u s Arruḥ n AREBBI nneɣ. ◘6:11 Afa. 2:2; Kul. 3:7; Tit. 3:3; Ɛbr. 10:22.

12 Marra timesřayin ḥeǧřent ayi, maca marra war neffɛent. Marra timesřayin ḥeǧřent ayi, maca war d ayi ittḍebbar uřa d ijjen bnadem. ◘6:12 1 Kur. 10:23. 13 Macca i uɛeddis uca aɛeddis i macca, maca AREBBI ad ten ibeṭṭeř s tyuya. Maca arrimet war teǧi i farq-ccɣeř, maca i Siditneɣ, uca Siditneɣ i arrimet. 14 Maca AREBBI wenni dd-issnekkaren Siditneɣ, ad aneɣ dd-issnekkar s jjehd nnes. ◘6:14 Rum. 8:11; 2 Kur. 4:14. 15 Ma war tessinem ca belli arrimat nwem ǧant d iɣezdisen n Lmasiḥ? Ma ad ksiɣ xenni ijj n uɣezdis n Lmasiḥ, maḥend ad t ggeɣ d aɣezdis n ict n temɣart n farq-ccɣeř? Ɛemmarṣ! 16 Niɣ war tessinem ca belli wi imunen ak-d temɣart n farq-ccɣeř, aqa-t d ict n arrimet akides? Minzi iqqar: ‘Nitni s tnayen ad iřin d ict n arrimet.’ ◘6:16 Amz. 2:24; Mt. 19:5, 6; Mk. 10:8; Afa. 5:31 17 Maca wenni imunen ak-d Siditneɣ, aqa-t d ijj n arruḥ akides.

18 Arewřem zi farq-ccɣeř. Kuř ca n ddenb i ittegg bnadem, aqa-t barra i arrimet nnes, maca wenni issefsaden ixef nnes s farq-ccɣeř, aqa netta ixeṭṭa ḍidd i arrimet nnes. 19 Ma war tessinem ca belli arrimet nwem d zzawect n Arruḥ Iqeddsen wenni daywem iǧan, wenni i ṭṭfem zi AREBBI, u aqa kenniw war teǧim ca i yixef nwem? ◘6:19 1 Kur. 3:16; 2 Kur. 6:16; Afa. 2:21; Ɛbr. 3:6; 1 Bṭ. 2:5. 20 Aqa temmesɣem-dd s ttaman. Semɣarem xenni AREBBI di arrimet nwem u di arruḥ nwem tinni iǧan n AREBBI. ◘6:20 1 Kur. 7:23; Gal. 3:13; Ɛbr. 9:12; 1 Bṭ. 1:18.