1 Aqa neccin, am imɛacaren n AREBBI, nzaweg kenniw ammu, ḥima arḍa n AREBBI i tᵉṭṭfem, war daywem ittwassbeṭṭeř ca, ◘6:1 1 Kur. 3:9; Ɛbr. 12:15. 2 minzi inna:

“Di řweqt n arḍa sřiɣ ac,

uca deg wass n usenjem ɛawneɣ cek!”

Xzar, aqa da řexxu d řweqt n arḍa, xzar, aqa da řexxu d ass n usenjem. ◘6:2 Ica. 49:8.

3 Mayemmi ɣa tewced ssibbet i ca n yijjen ařami i ɣa inderf? Ittxeṣṣa war din ittiři ca n řɛib di tsexxart nneɣ, ◘6:3 Rum. 14:13; 1 Kur. 10:32. 4 maca di marra nettweṣṣa ixef nneɣ am imsexxaren n AREBBI: deg waṭṭas n ṣṣbar, di řemḥayem, di řeɣben, di řeḥbusat, ◘6:4 1 Kur. 4:1; 2 Kur. 11:23. 5 sadu tiyyita, di ssnaseř, deg uɣuwweɣ, di tamara, di ǧyaři břa iḍeṣ, deg wussan n uẓummi, 6 di řeṣfayet, di tussna, di ttasiɛ n řxaḍar, di řeḍrafet, di Arruḥ Iqeddsen, di tayri břa nnifaq, 7 s wawař n tidett, di jjehd n AREBBI, s řesnaḥ n tsegda ɣar ufusi d uzeřmaḍ, 8 s uɛuǧi d ddeǧ, s ccenɛet taɛeffant u s ccenɛet taṣebḥant, am iɣeccacen, waxxa amenni d imtiqqan, 9 axmi war nettwissen, waxxa nettwassen, axmi nettmetta, u xzar, aqa neddar, axmi nettwaɛaqeb maca war nettmetti ca, ◘6:9 Izhd. 118:18; Ica. 26:19. 10 axmi neccin neffugem, maca nfarreḥ řebda, axmi nezřeḍ, waxxa nᵉttejjar aṭṭas, axmi war ɣarneɣ ca, waxxa ɣarneɣ kuřci.

11 Aqemmum nneɣ innurzem i kenniw, a Ikurintiyyen, uř nneɣ imɣar aṭṭas. 12 Kenniw war tᵉttwaḥṣarem zzayneɣ, maca tᵉttwaḥṣarem s twacit i iǧan di daxeř nwem. 13 Maca ad kiwem ssiwřeɣ axmi ssawařeɣ ak-d iḥenjiren: Arrem ayi-dd s min dayi tᵉttursem u swessɛem tayri nwem i necc! ◘6:13 1 Kur. 4:14.

14 War ttmunem ca deg uzayřu ak-d lkuffar, maɣar man acrac i ɣar teǧa ɣar tsegda ak-d tuɛeffna, u man tamunt i ɣar teǧa i tfawt ak-d taǧest? ◘6:14 Aɛwd. 7:2; 1 Ṣm. 5:1, 2; 1 Ij. 8:21; 1 Kur. 5:9; 10:21; Afa. 5:11 15 Niɣ man arwas i din iǧa jar Lmasiḥ d cciṭan? Niɣ man tasɣart n řmumen ak-d ukafriw? 16 Niɣ man tasɣunt i din jar Zzawect Tameqqrant n AREBBI d tenni n ccwaṭen? Aqa kenniw d zzawect n AREBBI iddaren, am mammec inna AREBBI:

“Necc ad zedɣeɣ akidsen

uca ad uyureɣ jar asen.

Necc ad iřiɣ d AREBBI nsen,

nitni ad iřin d řgens inu. ◘6:16 Uf. 29:45; Lawi 26:11-12; Irm. 32:38; Ḥiz. 37:27; 1 Kur. 3:16; 6:19; 10:7, 14; Afa. 2:21; Ɛbr. 3:6; 1 Bṭ. 2:5

17 S uyenni, ffɣem-dd zi řwesṭ nsen,

bḍam xasen, iqqar SIDI.

War ttḥadam min inegsen,

u Necc ad kenniw qebřeɣ. ◘6:17 Ica. 52:11; Ḥiz. 20:34, 41; Asa. 18:4.

18 Necc ad awem iřiɣ d Babatwem,

kenniw ad ayi tiřim d iḥenjiren d tḥenjirin,

iqqar SIDI, wenni d Amzemmar x kuřci.” ◘6:18 2 Ṣm. 7:8, 14