1 Wi iḍeɛfen di l’iman, wcem as afus, war ttemsebḍam deg ixarriṣen nwem jar awem. 2 Aqa din ḥed yumen izemmar ad icc kuřci, maca wenni iḍeɛfen ad icc tibbi waha. ◘14:2 Awřn. 15:7 3 Wenni ittetten, war isseḥqari wenni war ittetten, d wenni war ittetten, war iḥekkem x wenni ittetten, minzi AREBBI iqbeř i-t. 4 Min teɛnid cek wenni iḥekkmen x umsexxar n wenneɣni? Minzi mařa ibedd, d man aya i bab nnes, u mařa iwḍa, d man aya i bab nnes. Sides izemmar ad t issbedd d abeddi. ◘14:4 Yaɛ. 4:12.

5 Aqa din ḥed ittɣiř as aqa din ass sennej i wass nneɣni, u wenneɣni ittɣiř as aqa kuř ass kifkif. Ejj kuř ijjen ad iqneɛ di řbař nnes nican. ◘14:5 Gal. 4:10; Kul. 2:16. 6 Wenni iweqqaren ijj n wass, i Sides i t ɣa iweqqar. Wenni war iweqqaren ass, i Sides i war t iweqqar. Wenni ittetten, ittett i Sides, minzi ad icekkar AREBBI. Wenni war ittetten ca, i Sides war ittett ca uca netta ad icekkar AREBBI ɛawed. ◘14:6 1 Kur. 10:31; 1 Tim. 4:3. 7 Minzi uřa d ijj zzayneɣ aqa iddar i yixef nnes, uca uřa d ijjen immut i yixef nnes. ◘14:7 2 Kur. 5:15; Gal. 2:20; 1 Ts. 5:10; 1 Bṭ. 4:2. 8 Minzi mařa neddar, ad neddar i Siditneɣ, niɣ mařa nemmut ad nemmet i Siditneɣ. S uya, ma neddar niɣ nemmut, aqa neccin i Siditneɣ. 9 Minzi i uya i immut Lmasiḥ, uca idweř iddar ɛawed uca ikkar-dd, ḥima ad yiři d SIDI i yinni immuten uřa i yinni iddaren. 10 Maca cek, mayemmi ɣa tḥekmed x umac? Niɣ mayemmi ɛawed cek tesseḥqarad umac? Minzi neccin marra ad nbedd qibač i řkursi n ccreɛ n Lmasiḥ. ◘14:10 Mt. 25:31; 2 Kur. 5:10.

11 Am mammec tura:

“S tidett, am ddareɣ Necc, iqqar SIDI,

ad ayi aḍaren marra ifadden

u kuř iřes ad xafi iched.” ◘14:11 Ica. 45:23; 49:18 Fil. 2:10.

12 Xenni ejj kuř ijjen zzayneɣ ad igg řeḥsab x yixef nnes qibač i AREBBI. ◘14:12 Izhd. 62:13; Irm. 17:10; 32:19; Mt. 16:27; Rum. 2:6; 1 Kur. 3:8; 2 Kur. 5:10; Gal. 6:5; Asa. 2:23; 22:12. 13 Zi řexxu d tsawent war ḥekkmem ijjen x wenneɣni, maca ḥsen ad teksed awař maḥend war tessarsed ca ijj n weẓru maḥend ad dayes inqarḍ umac. ◘14:13 1 Kur. 10:32; 2 Kur. 6:3. 14 Minzi necc ssneɣ, aqa ttwassqenɛeɣ di SIDI Yasuɛ, belli uřa d ict n řḥajjet texmej i Netta, mɣir i wenni tt iḥesben d řexmej, aqa i netta waha umi texmej. ◘14:14 Mt. 15:11; Mk. 17:17-23; Řex. 10:15; 1 Kur. 8:4; 1 Tim. 4:4. 15 Mařa ixeyyeq umac x ssibbet n macca i teccid, aqa cek war tuyured di tayri. War tteḥḥi ca s macca nnec wenni i xef immut Lmasiḥ. ◘14:15 1 Kur. 8:11. 16 Min nḥesseb d řxar i neccin, war ttejji ḥed ad xas issiweř s řɣar. 17 Minzi Tageldit n AREBBI war teǧi di macca d tissit, maca di tsegda d řehna d řefraḥet s Arruḥ Iqeddsen. ◘14:17 1 Kur. 8:8. 18 Minzi wenni isexxaren i Lmasiḥ di man aya, aqa yarḍa AREBBI uca netta d ameqbuř ɣar iwdan.

19 Ad neḍfar xenni min iǧan i řehna d řebni n ijjen i wenneɣni. 20 War ttareddeǧ ca řxedmet n AREBBI x ssibbet n macca. Marra timesřayin aqa atent d timezdag, maca uct x bnadem wenni i ɣa igg aẓru i unedref s macca nnes. ◘14:20 Tit. 1:15. 21 Mliḥ umi war nᵉttett ca aysum u war nsess ca binu niɣ war nᵉttegg uřa d ict n řḥajjet i di i ɣa inderf umac. ◘14:21 1 Kur. 8:13. 22 Ma tᵉttwassqenɛed i yixef nnec? Ad ac yiři man aya i yixef nnec zzat i AREBBI. Sseɛd n wenni war ittikkwiḍ ccreɛ x yixef nnes di min d as ittɣiř mliḥ. 23 Maca wenni ittcekkan xmi ittett, ittwaḥaseb, minzi man aya war iǧi zi l’iman. Qaɛ min war iǧin zi l’iman, aqa-t d ddenb. ◘14:23 Tit. 1:15.