1 Awarni řami ɛdun arbeɛṭac n iseggʷusa, ruḥeɣ ɛawed ɣar Urcalim ak-d Bar-Naba uca iwyeɣ akidi ɛawed Titus. ◘2:1 Řex. 15:2. 2 Maca tuɣa ruḥeɣ ɛlaḥsab ijj n usargeb n Arebbi u mřeɣ asen Řexbar Aṣebḥan i ttbarrḥeɣ jar řegnus, i yinni ɣar iǧa uweqqar weḥḥedsen, ḥima war ttizzřeɣ niɣ ad azzřeɣ baṭeř. ◘2:2 Řex. 19:21. 3 Ɛawed Titus, wenni tuɣa akidi, waxxa netta d Aramiyu, war xas ggen s uɣiř maḥend ad ittwaxten. ◘2:3 Řex. 16:3; 1 Kur. 9:21. 4 Maca minzi udfen-dd awmaten issxarriqen ɣarneɣ, ḥima ad cekkmen x tiřelli tenni ɣarneɣ di Yasuɛ Lmasiḥ, ḥima ad ayi ggen d ismeɣ, ◘2:4 Řex. 15:24. 5 aqa neccin war d asen nwaḍeɛ uřa d ict n tzeḥziḥt i řeḥṣaret nsen, ḥima tidett n Řexbar Aṣebḥan ad teqqim akidwem.

6 Inni tuɣa ittbanen d ca jar asen - min ma ɛnan war d ayi icqi, minzi AREBBI war ittegg ca s wudmawen - aqa war xafi nnan walu. ◘2:6 Aɛwd. 10:17; 2 Im. 19:7; Ayub 34:19; Řex. 10:34; Rum. 2:11; Afa. 6:9; Kul. 3:25; 1 Bṭ. 1:17. 7 S řɛeks, maɣar ẓrin, belli ttkellfeɣ x Řexbar Aṣebḥan i yinni břa axtan am mammec ittkellef Buṭrus x Řexbar Aṣebḥan i yinni s wextan, 8 - minzi Wenni iɛarrnen Buṭrus di řxedmet nnes am rrasul jar inni ixetnen, iɛarren ayi ɛawed, ḥima ad ggeɣ řxedmet n rrasul jar řegnus - ◘2:8 Řex. 9:15; 13:2; 22:21; Gal. 1:16; Afa. 3:8. 9 uca umi Yaɛqub d Kifa d Yuḥanna, inni ittwaḥesben d imɣaren, neɛmen s arḍa i d ayi immewcen, wcin aneɣ afus afusi n tmunt n tawmat i necc d Bar-Naba, ḥima neccin ad niři nᵉttsexxar jar řegnus uca nitni jar inni s wextan. 10 Tuɣa ittxeṣṣa aneɣ ad nfekkar deg imezřaḍ waha, uca xenni cḍareɣ ɛawed maḥend ad ggeɣ man aya. ◘2:10 Řex. 11:30; 24:17; Rum. 15:25; 1 Kur. 16:1; 2 Kur. 8:1; 9:1.

11 Maca umi dd-yusa Kifa ɣar Antiyuxiya, mmɛařiɣ akides s bṭayṭay, minzi nitni nnqarḍen zzayes. 12 Minzi qbeř ma dd-usin ca zi Yaɛqub, tuɣa ittett ak-d yinni yumnen zi řegnus, maca awarni řami dd-usin nitni, iɛqeb uca issbeɛɛed ixef nnes zzaysen, minzi tuɣa iggʷed zeg inni iǧan zeg wextan. 13 Uřa d Udayen inneɣni ttwajebbden akides ɣar man aya, amenni ɛawed Bar-Naba, aqa nedhen t di nnifaq nsen. 14 Maca umi ẓriɣ belli war gguren ca nican x webrid n tidett n L’Injil, nniɣ i Kifa zzat i marra: “Mařa cek, am teǧid d Uday, teddared am yijj n Aramiyu, war iǧi am Wuday, mayemmi teggid aɣiř x yinni zi řegnus, ḥima ad ddaren am Wudayen? ◘2:14 Řex. 10:28.

15 Aqa neccin, inni iǧan d Udayen ɛlaḥṣab ṭṭbiɛet, war neǧi ca d imednab zi řegnus, 16 numen di Yasuɛ Lmasiḥ, minzi nessen belli bnadem war ittwasegged ca s řexdayem n Ccariɛa, maca s l’iman n Yasuɛ Lmasiḥ, ařami uřa d neccin ad nettwasegged s l’iman n Lmasiḥ, war iǧi s řexdayem n Ccariɛa, minzi s řexdayem n Ccariɛa uřa d ijj n bnadem war ittwaseggad ca ɛemmarṣ. ◘2:16 Řex. 13:38; Rum. 3:20, 28; 8:3; Gal. 3:11; Ɛbr. 7:18.

17 Maca mařa neccin, am narezzu ad nettwasegged s Lmasiḥ, nufa belli neccin ɛawed d imednab, ma Yasuɛ Lmasiḥ xenni d amsexxar n ddnub? Wayyaw! 18 Minzi mařa bniɣ ɛawed min hedmeɣ, ad ssecneɣ belli necc s ixef inu d wenni iɛeddun x tewṣiyyet. 19 Minzi s Ccariɛa aqa necc mmuteɣ i Ccariɛa, ḥima ad ddareɣ i AREBBI. ◘2:19 Rum. 7:4; 14:7; 2 Kur. 5:15; 1 Ts. 5:10; Ɛbr. 9:14; 1 Bṭ. 4:2. 20 Ttwaṣellbeɣ ak-d Lmasiḥ uca zi ssa d tsawent war qqimeɣ ddareɣ ɛad necc, maca Lmasiḥ iddar dayi. Uca min ddareɣ řexxu ɛad di arrimet, ddareɣ s l’iman n Mmis n AREBBI wenni d aneɣ ittexsen u iwca Ixef nnes xaneɣ. ◘2:20 Gal. 1:4; Afa. 5:2; Tit. 2:14. 21 War beḍřeɣ ca arḍa n AREBBI, minzi mařa tuɣa tasegda s Ccariɛa, ad yiři immut Lmasiḥ x walu.” ◘2:21 Ɛbr. 7:11.