1 Hwan-dd yeryazen zi Yahudiyya ɣar Antiyuxiya uca bdan sseřmaden i tawmat, nnan: “Mařa war tᵉttwaxetnem ɛlaḥsab tnamit n Ccariɛa n Musa, war tzemmarem ad tᵉttwassnejmem.” ◘15:1 Amz. 17:10; Lawi 12:3; Gal. 5:2. 2 Ikkar ijj n uxarweḍ d unaqec akidsen zi ṭṭarf n Bulus d Bar-Naba. Imsar aqa Bulus d Bar-Naba, u akidsen ɛad inneɣni, ruḥen ɣar rrusul d imɣaren di Urcalim zi ssibbet n unaqec-a. ◘15:2 Gal. 2:1.

3 Tessqebbeḍ u tessekk i-ten tmesmunt. Nitni cuqen di marra Finiqiya d temmurt n Samarya uca xebbaren mammec tuben inni iǧan zi řegnus, ssfarḥen marra tawmat aṭṭas. 4 Řami iwḍen ɣar Urcalim, tareḥḥeb zzaysen tmesmunt d rrusul d imɣaren u nitni xebbaren i-ten s marra min zzaysen igga AREBBI.

5 Maca ca zi tebridt n Ifarisiyyen inni idewřen umnen, kkaren, nnan: “Ittxeṣṣa ad ten txetnem u ad ten umuren ad cebbaren di Ccariɛa n Musa.”

6 Munen rrusul d imɣaren ḥima ad mcawaren x tmesřact-a. 7 Awarni řami tuɣa ttqacaḥen aṭṭas, ibedd Cimɛun, inna asen: “A iryazen tawmat, kenniw tessnem belli aṭṭas zeg wami AREBBI ixḍar aqa řegnus ad sřen i wawař n Řexbar Aṣebḥan s uqemmum inu uca ad zzayes amnen. ◘15:7 Řex. 10:20; 11:12. 8 AREBBI, wenni issnen min iǧan deg wuřawen, iched xasen am d asen iwca Arruḥ Iqeddsen am i neccin. ◘15:8 1 Im. 28:9; 29:17; Izhd. 7:10; Irm. 11:20; 17:10; 20:12. 9 Netta war ittegg bu řfarz jar neccin d nitni, am issizdeg uřawen nsen s l’iman. ◘15:9 Řex. 10:43, 44. 10 Iwa řexxu, mayemmi tᵉttjarrabem ɛad AREBBI u tᵉtteggem ijj n uzayřu x irawen n imeḥḍaren i war zemmaren řejdud nneɣ uřa d neccin ad t narbu? ◘15:10 Mt. 23:4. 11 Maca s arḍa n Siditneɣ Yasuɛ Lmasiḥ numen aqa ad neṭṭef Tudart am nitni.” ◘15:11 Afa. 2:8; Tit. 3:4.

12 Isqar řɣaci, nitni sřan i Bar-Naba d Bulus ttɛawaden x řeɛřamat d řeɛjayeb timeqqranin i zzaysen igga AREBBI jar řegnus. 13 Umi qqimen sqaren, ikkar Yaɛqub, inna: “A iryazen tawmat, sřem-dd ɣari. 14 Cimɛun ixebbar mammec tuɣa igga AREBBI deg umezwar ḥima ad ixdar ijj n řgens zi řegnus i Yisem nnes. 15 Man aya ittas-dd ak-d wawařen n inabiyyen am mammec tura:

16 “ ‘Awarni man aya ad dd-ɛeqbeɣ

uca ad ssbeddeɣ ɛawed

Tazeddiɣt iwḍan n Dawud,

u min zzayes yareddǧen

ad tt ssgeɛɛdeɣ

uca ad tt areqqɛeɣ ɛawed,

17 ḥima min iqqimen n iwdan

ad arzun x SIDI,

uřa d marra řegnus

i xef ittwařaɣa s Yisem inu!’,

ammu i iqqar SIDI

wenni iggin marra aya.” ◘15:17 Ɛam. 9:11, 12.

18 Řexdayem n AREBBI aqa ttwassnent zi řebda. 19 S uyenni ttwařiɣ icuwwar war nesseḍqiř ca x yinni dd-iddakkwařen ɣar AREBBI zi řegnus, 20 maca ad asen nari ḥima ad beɛɛden x texmuji zi tɣarṣa i l’aṣnam u x farq-ccɣeř u x jjiyfat u x idammen. ◘15:20 Amz. 9:4; Uf. 20:3; 1 Kur. 8:1; 10:20;1 Ts. 4:3. 21 Minzi Musa tuɣa ɣares di kuř tandint imxeṭṭaben di temzidawin di řejyuř iɛdun, inni zzayes qqaren di marra ussan n ssebt.”

22 Xenni ixḍaren rrusul d imɣaren, jmiɛ ak-d marra tamesmunt, iryazen zi řwesṭ nsen uca ssekken Yahuda, umi qqaren ɛawed Bar-Saba, d Sila ak-d Bulus d Bar-Naba ɣar Antiyuxiya. Iryazen-a tuɣa aten d imeqqranen jar tawmat. 23 Urin s ufus nsen ammu:

“Rrusul d imɣaren d tawmat.

I tawmat i yeǧan di Antiyuxiya d Suriya d Kilikiya, i tawmat i yeǧan zi řegnus. Sřam xawem!

24 Nesřa belli ca n yinni dd-yusin zi řwesṭ nneɣ, ṣedɛen kenniw s wawařen nsen, ssenhezzen tanefsect nwem, qqaren: ‘Ittxeṣṣa ad tᵉttwaxetnem u ad tᵉṭṭfem di Ccariɛa!’, umi neccin war d asen numur s man aya. ◘15:24 Gal. 2:4. 25 S uya nemcawar awarni řami nmun marra, uca nfarz ca n yeryazen ḥima ad ten nessekk ɣarwem ak-d imɛizzen nneɣ Bar-Naba d Bulus. 26 Nitni d iryazen inni iṭṭewwɛen tudart nsen i Yisem n Siditneɣ Yasuɛ Lmasiḥ. ◘15:26 Řex. 13:50; 14:19. 27 Nessekk-dd akidsen Yahuda d Sila, inni kenniw i ɣa ixebbaren man aya ɛawed s uqemmum nsen. 28 Minzi aqa-t di řxaḍar n Arruḥ Iqeddsen u di řxaḍar nneɣ, ḥima war xawem nesseḍqiř ca sennej i timesřayin tinni labudda zzaysent, 29 aqa ad taggʷejem x min wehhben d taɣarṣt i l’aṣnam řa x idammen řa x jjiyfat uřa x farq-ccɣeř! Mařa teḥḍam ixef nwem zi man aya, ad teggem mliḥ. Iřim d imtiqqan di Siditneɣ.” ◘15:29 Amz. 9:4; Uf. 20:3; Lawi 17:14; 1 Kur. 8:1; 1 Ts. 4:3.

30 Inni dd-ittwassekken iwḍen ɣar Antiyuxiya uca ssmunen marra iwdan, wcin asen tabrat. 31 Řami tt ɣrin, farḥen nitni, ttwassfewwjen. 32 S wawařen aṭṭas ssjehden nitn tawmat uca ssmetnen inni iǧan ak-d Yahuda d Sila, maɣar uřa d nitni tuɣa aten d inabiyyen. 33 Awarni řami qqimen dinni ca n řweqt, ssqebbḍen ten wawmaten s řehna ḥima ad dd-dewřen ɣar rrusul. 34 Maca Sila tuɣa ixs ad iqqim dinni.

35 Bulus d Bar-Naba qqimen di Antiyuxiya, ssɣaran, ttbarrḥen s Wawař n AREBBI ak-d waṭṭas inneɣni.

36 Awarni ca n wussan inna Bulus i Bar-Naba: “Ejj aneɣ ad neɛqeb ɣar tawmat di kuř tandint mani tuɣa nettbarreḥ s Wawař n AREBBI, ad nargeb mammec ɣa iffeɣ umeddur nsen.” 37 Bar-Naba tuɣa ixs ad kisen indeh Yuḥanna, wenni ittkennan Markus, ◘15:37 Uf. 20:3. 38 maca Bulus tuɣa war ixs ad t yiwi, minzi Markus ismeḥ daysen umi tuɣa aten di Pamfiliya, u minzi war kisen iruḥ. 39 Ikkar ijj n umcubbec d ameqqran jar asen ařami mmsebḍan ijjen x wenneɣni. Bar-Naba yiwi Markus akides uca ibeḥḥar ɣar tegzirt n Qubrus. 40 Maca Bulus ixḍar Sila uca iffeɣ, awarni řami sellmen t wawmaten ɣar arḍa n AREBBI. 41 Icuq di Suriya d Kilikiya, ittcejjaɛ timesmunin.