1 Tuɣa din di Antiyuxiya di tmesmunt inabiyyen d imseřmaden: Bar-Naba, d Cimɛun wenni ittkennan Nijer, d Lukiyus zi tendint n Qayrawan, d Manaɛin wenni d mmis n wenni yarebban Hirudus, řḥakem x ijj n arbaɛ n temmurt, d Cawul. ◘13:1 Řex. 14:26. 2 Am tuɣa ttẓumman, ttzawgen AREBBI, inna asen Arruḥ Iqeddsen: “Farzem ayi-dd Bar-Naba d Cawul i řxedmet tenni umi d asen dd-řaɣiɣ.” ◘13:2 Mt. 9:38; Řex. 9:15; 22:21; Rum. 1:1; 10:15; Gal. 1:15; 2:8; Afa. 3:8; 1 Tim. 2:7; 2 Tim. 1:11; Ɛbr. 5:4. 3 Awarni řami ẓummen, ẓẓuǧen, ssarsen xasen ifassen, sekken ten. ◘13:3 Řex. 6:6; 8:15; 19:6.

4 Řami tuɣa dd-ttwassekken zi Arruḥ Iqeddsen, hwan-dd ɣar Salukiya uca ssenni ruḥen di řebḥar ɣar Qubrus. 5 Umi iwḍen ɣar Salamis, barrḥen s wawař n Siditneɣ di temzidawin n Wudayen. Tuɣa Yuḥanna ittsexxar i-ten. ◘13:5 Řex. 12:25.

6 Awarni řami ẓwan marra tagzirt, iwḍen-dd ɣar Pafus. Nitni ufin din ijj n weryaz d Uday, tuɣa wanita d aseḥḥar, d anabi issxarriqen, qqaren as Bar-Cuma. ◼13:6 Bar-Cuma - isem-a wanita ixs ad yini: ‘mmis n yisem’. S řxeṭṭ agřinzi qqaren as ‘Bar-Yasuɛ’, ixs ad yini ‘mmis n Yasuɛ’. Maca ḥima war din ittiři usekkwi jar Lmasiḥ d bnadem wanita, negg as ‘Bar-Cuma’.  ◘13:6 Řex. 8:9; 19:13. 7 Netta ɣares ict n tesɣunt imten ak-d ijj n bnadem d amiɣis, lɛamil umi qqaren Sarjiyus Bulus. Iřaɣa-dd lɛamil i Bar-Naba d Cawul, tuɣa immeẓri ad iseř awař n AREBBI. 8 Maca aseḥḥar Bar-Cuma, isem wanita ittwatarjem s ‘Ilimas’, tuɣa ittɛekkas i-ten, yarzu ad issbeɛɛed lwali x l’iman. ◘13:8 Uf. 7:11; 2 Tim. 3:8 9 Maca Cawul umi qqaren ɛawed Bulus, ittwaccur s Arruḥ Iqeddsen, ijɛar dayes mliḥ, inna: 10 “A cek, aqa teccured s kuř řɣecc d kuř teḥraymect, a cek mmis n ibřis d řeɛdu n marra tasegda. Ma aqa cek war tbedded ɛemmarṣ ad tessxarwḍed ibriden iseggden n SIDI? 11 Řexxu, xzar, aqa da afus n SIDI ḍidd nnec, ad tdewřed d adarɣař, war tᵉttwiřid tafuct ɛad i yijj n řmijař.” Řexdenni tewḍa-dd xas tayyut d taǧest uca ibda iddura ittfafa, yarezzu wi t ɣa igewwden zeg ufus. 12 Řami iẓra lɛamil min imsaren, itebhet uca yumen di tɣuri n SIDI.

13 Bulus d Bar-Naba kkin x řebḥar zi tendint n Pafus uca iwḍen ɣar tendint n Pirxa di Pamfiliya. Ssenni yuyur xasen Yuḥanna, iɛqeb ɣar Urcalim. ◘13:13 Řex. 15:38.

14 Maca nitni ruḥen zi Pirxa, kkin x temmurt, uca iwḍen ɣar Antiyuxiya, ict n tendint di jjwayeh n Pisidiya. Udfen nitni ɣar temzida deg wass n ssebt uca qqimen dinni. 15 Awarni tiɣri n Ccariɛa d Inabiyyen, ssekken ɣarsen imɣaren n temzida, nnan: “A iryazen tawmat, mařa tuɣa ɣarwem ijj n wawař n ucejjeɛ i iwdan, barrḥem zzayes i řgens!” 16 Xenni ikkar Bulus iceyyar s ufus nnes, inna:

“A kenniw, iryazen n Israil u kenniw inni itteggʷeden AREBBI, sřem! ◘13:16 Řex. 12:17; 19:33; 21:40. 17 AREBBI n řgens-a tuɣa ifarz řejdud nneɣ uca issgeɛɛed i-ten u immarni daysen aṭṭas řami ten tuɣa d imeɛzab di temmurt n Miṣra uca issuffeɣ i-ten s ufus nnes yuɛřan, ◘13:17 Uf. 1:1. 18 issecca i-ten řmijař n arebɛin n iseggʷusa di řexřa. ◘13:18 Uf. 16:35; Řxř. 14:34; Izhd. 95:10. 19 Iteḥḥa sebɛa n řegnus di temmurt n Kenɛan, uca iwca asen temmurt nsen d řwart i nitni. ◘13:19 Aɛwd. 7:1; Yac. 14:2. 20 Netta iwca asen řquḍat i yijj n řmijař n arebɛa-mya u-xemsin n iseggʷusa, ař řweqt n unabi Camwil. ◘13:20 Řqḍ. 2:16; 3:9.

21 Xenni ttaren ijj n ujeǧid i yixef nsen uca AREBBI iwca asen Cawul, mmis n Kis, ijj n weryaz zi teqbič n Binyamin, řmijař n arebɛin n iseggʷusa. ◘13:21 1 Ṣm. 8:5; 9:15; 10:15; Ḥuc. 13:11. 22 Xenni ikkes i-t, issgeɛɛed asen Dawud d ajeǧid, wenni umi x iched AREBBI ɛawed ammu: ‘Ufiɣ Dawud mmis n Yassa, aqa-t d ijj n weryaz yusa-dd x řxaḍar inu, wenni i ɣa iggin marra min xseɣ Necc.’ ◘13:22 1 Ṣm. 13:14; 16:12; Izhd. 89:21; Řex. 7:45.

23 Zi zzariɛet nnes igga AREBBI i Israil Yasuɛ Amsenjem am mammec tuɣa zzayes iwaɛd. 24 Issekk Yuḥanna ḥima ad ibarreḥ s uṣeɣḍaṣ n ttubet qbeř twasit nnes i marra řgens n Israil. ◘13:24 Mt. 3:1; Mk. 1:2; Lk. 3:2; Yḥ. 3:23. 25 Umi dd-yiweḍ Yuḥanna ikemmeř tasexxart nnes, inna: ‘Min d awem ittɣiř aqa d necc? War ǧiɣ d Lmasiḥ, maca, xzar, Netta ad dd-yas awarni ayi, Wenni umi necc war sdiheǧeɣ ad as fesyeɣ ifiřan n sandaliyat nnes!’ ◘13:25 Mt. 3:11; Yḥ. 1:20.

26 A iryazen tawmat, tarwa n jjiř n Ibrahim d yinni akidwem itteggʷeden AREBBI: I kenniw umi dd-ittwassekk Netta, Wenni d Awař Iddaren. ◘13:26 Mt. 10:6; Řex. 3:26; 13:46. 27 Minzi imezdaɣ n Urcalim d imeqqranen nsen war d as fhimen uřa d idlisen n inabiyyen i iqqaren kuř ssebt, maca nitni ḥekmen xas u ammu kemmřen nitni min yuran. ◘13:27 Yḥ. 16:3; Řex. 3:17; 1 Kur. 2:8; 1 Tim. 1:13. 28 Waxxa war ufin uřa d ijj n řesbab ḥima ad xas ḥekmen s řmewt, ttaren zi Pilaṭus ttesřiḥ ḥima ad t nɣen. ◘13:28 Mt. 27:20; Mk. 15:11; Lk. 23:18; Yḥ. 19:6. 29 Umi kemmřen marra min xas yuran, ssehwan t-i-dd zi teḥnact uca ssarsen t deg wenḍeř. 30 Maca AREBBI issnekkar i-t-i-dd zi taddart n imettinen. ◘13:30 Mt. 28:6; Mk. 16:6; Lk. 24:6. 31 Iḍhar asen-dd aṭṭas n wussan i yinni akis igeɛɛden zi Ljalil ɣar Urcalim uca řexxu aqa aten d řechud nnes zzat i řgens. ◘13:31 Mk. 16:14; Yḥ. 20:19; 21:1; Řex. 1:3; 1 Kur. 15:5. 32 Xzar, uřa d neccin nettbarreḥ i kenniw s wawař n lwaɛd i ittwannan i řejdud nneɣ. ◘13:32 Amz. 3:15; 22:18; 26:4; 49:10; Aɛwd. 18:15; 2 Ṣm. 7:12; Izhd. 132:11; Ica. 4:2; 7:14; 9:5; 40:10; Irm. 23:5; 33:14; Ḥiz. 34:23; 37:24; Dan. 9:24, 25. 33 Xzar, AREBBI ikemmeř lwaɛd i neccin, inni iǧan d tarwa nsen, umi dd-issnekkar Yasuɛ zi řmewt. Am mammec tura deg uzehhid wiss tnayen:

‘Cek d Mmi, ass-a jjiɣ-dd Cek!’ ◘13:33 Izhd. 2:7.

34 S uya issnekkar i-t-i-dd AREBBI zi taddart n imettinen ařami war dd-iddikkwiř ɛemmarṣ ařami ɣa ikiccu, am t inna:

‘Necc ad awem wceɣ

timegga n arḍa n Dawud

i daysent řaman.’ ◘13:34 Ica. 55:3.

35 S uyenni iqqar ɛawed deg ijj n wemcan nneɣni:

‘Cek war tᵉttejjid Amsizdeg nnec

ad ikiccu.’ ◘13:35 Izhd. 16:10; Izhd. 49:10; Řex. 2:27.

36 Minzi Dawud isexxar jar jjiř nnes ɛlaḥsab min ixs AREBBI, uca immut, ittwassmun ɣar řejdud nnes, xenni ikiccu. ◘13:36 1 Ij. 2:10; Řex. 2:29. 37 Maca Wanita, wenni dd-issnekkar AREBBI, war ittkicci.

38 S uya, a tawmat, snem aqa s Wa ittwabarreḥ s weɣfar n ddnub i kenniw, ◘13:38 Lk. 24:47; 1 Yḥ. 2:12 39 u snem aqa zi marra min zi war tzemmarem ad tᵉttwaseggdem s Ccariɛa n Musa, aqa ad ttwaseggden marra inni yumnen zzayes Netta. ◘13:39 Rum. 3:28; 8:3; 10:4; Gal. 2:16; Ɛbr. 7:19. 40 Ḥḍam xenni ḥima war xawem dd-iweṭṭi ca n min yuran deg idlisen n inabiyyen:

41 ‘Xzarem, a kenniw inni ittbuṣaren,

tɛejbem u tweddarem,

minzi Necc ad ggeɣ ict n řxedmet

deg wussan nwem

i war tᵉttiqqim

waxxa iɛawed awem tt ca n ijjen.’ ” ◘13:41 Ica. 28:14; Ḥab. 1:5.

42 Řami zzaysen dd-ffɣen, ttaren zzaysen ḥima ad kisen ssiwřen s wawařen d ijjen deg ijj n ssebt nneɣni. 43 Řami immsebḍa umuni n temzida, aṭṭas n Wudayen d waṭṭas n imɛacaren n Wudayen inni itteggʷeden AREBBI ḍfaren Bulus d Bar-Naba. Nitni tuɣa kisen ssawařen, ɛeřmen asen ḥima ad qqimen ttᵉṭṭfen deg arḍa n AREBBI. ◘13:43 Řex. 11:23; 14:22.

44 Di ssebt i dd-yusin tusa-dd tendint marra ḥima ad tseř i Wawař n AREBBI. 45 Ařami ẓrin Wudayen řɣaci d ameqqran, dewřen ɛemmaren s řeḥsed, ɛeksen min xef issiweř Bulus, qacḥen u ceqqfen dayes. 46 Maca Bulus d Bar-Naba nnan s teryast: “Tuɣa ittřiq ad awem nessiweř d amezwaru Awař n AREBBI, maca umi t tugim, u tekksem awař ḍidd i yixef nwem belli war tesdiheǧem Tudart ittduman, xzar, aqa řexxu neccin ad nwejjeh řegnus. ◘13:46 Uf. 32:10; Ica. 55:5; Mt. 8:12; 10:6; 21:43; Řex. 3:26; 13:26; Rum. 10:19. 47 Minzi ammu d aneɣ iweṣṣa Siditneɣ, iqqar:

‘Necc arriɣ Cek d tafawt i řegnus,

ḥima ad tiřid i Tudart ař ṭṭrufa n ddunect.’ ” ◘13:47 Ica. 42:6; 49:6; Lk. 2:32.

48 Umi sřin řegnus man aya, farḥen ssemɣaren awař n Sidi uca umnen marra inni tuɣa ittwafarzen i Tudart ittduman. 49 Uca iffeɣ Awař n SIDI ɣar jjihet nni marra.

50 Maca Udayen ssḥarrcen imcennɛen n tendint d temɣarin tinni ɣarsent ccan u ɛebbdent i AREBBI akidsen. Ammu ssekkaren nitni ict n umarret x Bulus d Bar-Naba uca ssuffɣen ten barra i temmurt nsen. ◘13:50 2 Tim. 3:11. 51 Maca nitni zzerzen taɛejjajt zeg iḍaren nsen xasen uca iwḍen ɣar tendint n Ikuniya.◘13:51 Mt. 10:14; Mk. 6:11; Lk. 9:5; 10:11 52 Imeḥḍaren dewřen ccuren s řefraḥet n Arruḥ Iqeddsen. ◘13:52 Řex. 13:52; Gal. 5:22; 1 Th. 1:6