1 “Umi issiweř Ifrayim, aqa din tarjijet s uweqqar. Netta issgeɛɛed ixef nnes di Israil uca idweř d amednub zi ssibbet n weɛbed nnes i Baɛl, uca xenni immut. 2 Uca řexxu ɛawed arnin tteggen ddnub u ggin s nnuqart nsen ijj n řexyař ifesyen ɛlaḥsab řeɛqeř nsen, aqa-tent d řexyařat n l’aṣnam marra, řxedmet n umziř. Nitni qqaren xasen: ‘Ejj iwdan inni i ɣa iwehhben tiɣarṣa ad ssudumen iɛejmiyyen-a!’ ◘13:2 Ḥuc. 8:6 3 S uya ad dewřen am yijj n useynu n ṣṣbeḥ u am nnda ɣar tuffut nni deɣya iɛeddun, am uřum iṭṭawen zeg unedrar u am ddexxan itteffɣen zi tburjet.”

4 “Necc d SIDI, AREBBI nnec, zeg wami dd-teffɣem kenniw zi temmurt n Miṣra. Cek war tᵉttessned bu arebbi nneɣni mɣir Necc u war din Amsenjem mɣir Necc. ◘13:4 2 Ṣm. 22:32; Izhd. 18:32; Ica. 43:11; Ḥuc. 12:10 5 Necc ssneɣ cek di řexřa, deg ict n temmurt n řeḥmu yareqqen. 6 Ařami iwḍen ɣar ddemnet nsen n tarewsa, dewřen jjiwnen. Ařami jjiwnen, innurfeɛ wuř nsen. X uya ttun ayi. ◘13:6 Aɛwd. 32:15; Ḥuc. 8:14 7 S uyenni Necc dewřeɣ i nitni am weyrad izehharen, am uɣiřas řebteɣ deg webrid. 8 Necc usiɣ-dd ɣarsen am yijj n ddub wenni umi ucaren tarwa nnes u Necc ařẓeɣ idmaren nsen u ṣarḍeɣ ten din am tizemt. Řewḥuc n řexřa mezzqen ten.” ◼13:8 idmaren nsen - s Tɛibranit ‘ařeḥḥef n wuř nsen’.

9 “Man aya idweř d akeḥḥeḍ nnec, a Israil, aqa tɛekksed ayi, ḍidd i Wenni iǧan d amɛawen nnec. 10 Mani iǧa xenni ujeǧid nnec, d wenni izemmaren ad cek issenjem di marra tineddam nnec! U mani ǧan řquḍat nnec umi tennid: ‘Ewc ayi ijj n ujeǧid uřa d řḥukkam’? 11 S weɣḍab inu wciɣ ac ijj n ujeǧid u s uduqqez inu n ufugem kkseɣ ac t. ◘13:11 1 Ṣm. 8:5; 15:23; 16:1 12 Řmuɛṣiyyet n Ifrayim tᵉttwaqebbeḍ am deg ict n tqebbiḍṭ, ddnub nnes ttwaḥḍan. 13 Řeḥriq n tarwa ad ɣares dd-yas. Netta d ijj n uḥenjir iqqim břa tiɣit, maɣar netta war din ibedd di řweqt nnes maḥend ad iffeɣ

xmi i ɣa tarzem řemřawřet ḥima ad ffɣen iḥenjiren.

14 “Zeg ufus n řaxart ad ten fdiɣ, ad ten fekkeɣ zi řmewt. A řmewt, mani ǧan řeḥřacat n ṭṭaɛun nnem, a řaxart, mani teǧa turṣuḍi nnem? Ma ad nedmeɣ ɛad? Lla, aya inuffar zzat i tiṭṭawin inu. ◘13:14 Ica. 25:8; 1 Kur. 15:55

15 Waxxa ggur Ifrayim ad iwc řɣiǧet jar aytmas, ɛad ad dd-yas ijj n usemmiḍ zi ccarq, ijj n usemmiḍ n SIDI nni i-dd i ɣa ikkaren, - tařa nnes ggur ad taẓeɣ, anu nnes ggur ad iwḍa - ggur ad ikecceḍ usemmiḍ ict n txabect zi mkuř řeqcuɛ iɣřan.”