25
Izři n uqadi x usenjem
1 “A SIDI, Cek d AREBBI inu,
necc ad Cek ssɛuǧeɣ,
ad ṣebbḥeɣ Isem nnec,
maɣar Cek teggid řeɛjeb,
aṭṭas n ccwar nnec
zeg wecḥař uya,
aqa-t d tidett u dayes řaman.
2 Cek tarrid tandint d aɛurric n yeẓra,
tandint ittwassjehden d řxirbet,
řeqṣar n ibarraniyyen di tandint,
war t ssbeddin ɛemmarṣ ɛawed. ◘25:2 Ica. 21:9; 23:13; Asa. 14:8; 18:2
3 X uya ad Cek issɛuǧa ijj n řgens ijhed,
tandint n řegnus iqesḥen aṭṭas
ad zzayek teggʷed.
4 Maɣar tuɣa Cek d lqelɛa i umarxu,
d lqelɛa i umezřuḍ
xmi ittneḥṣar,
Cek d adurri i wenẓar iccaten,
uřa d tiři di řeḥmu
minzi lḥaraj n ayt n bu-řexcunect
aqa-t am wenẓar iccaten x řḥiḍ.
5 Am řeḥmu deg ijj n wemcan yuẓeɣ,
ammu i ɣa tesseɣded lḥaraj n ibarraniyyen,
am tiři n useynu tessesmiḍ řehmu,
ammu i ɣa ittwasseɣd
izři n ayt n bu-řexcunect.”
6 “SIDI n řɛeskarat ad issewjed x wedrar-a
ict n zzardet s macca
teccur s tadunt x wedrar-a
i marra regnus,
ict n zzardet s binu iṣebḥen qaɛ,
s ict n macca teccur s tadunt d waduf,
s binu iṣebḥen iṣfan.
7 Netta ad ibeṭṭeř x wedrar-a ařeḥḥaf
i zi ttřeḥḥafen marra řegnus
uřa d dduri i zi ttwassdurruyen marra řegnus.
8 Netta ad isarḍ řmewt i řebda
uca Sidi inu, SIDI,
ad imseḥ imeṭṭawen zi marra iɣembab,
ad ikkes řefḍiḥet n řgens nnes
zi marra tammurt,
maɣar ammu i inna SIDI.” ◘25:8 1 Kur. 15:54
9 “Deg wass nni ad inin:
‘Aqa da, Wa d AREBBI nneɣ,
xas i negga asitem nneɣ
u Netta ad aneɣ issenjem.
Wa d SIDI nni x negga asitem nneɣ,
ad nesřiwřew, ad nfarḥ
x usenjem nnes!’
10 Maɣar afus n SIDI ad yars x wedrar-a,
maca Mu’ab ad ittwaddez di temmurt nnes,
am mammec ittwaddez uřum,
ad idweř d tazubact.
11 Mu’ab ad dayes ibezzeɛ s ifassen nnes,
am ufettaḥ deg weftaḥ.
AREBBI ad issaḍar nnfaxet nnes
jmiɛ ak-d marra
min izemmar ad igg
s teḥraymect n ifassen nnes. ◘25:11 Ica. 16:6
12 Netta ad ihdem lburj n iɣebřawen nnec yuɛřan,
ad ten issehwa, ad ten immenḍar
ɣar temmurt, deg ucař.”