1 A aytma inu, ad awem ssargbeɣ x L’Injil wenni d awem barrḥeɣ, d wenni tqebřem u d wenni di tbeddem nican, 2 i zi tᵉṭṭfem Tudart, s Wawař i d awem barrḥeɣ, mařa xas tɛeqřem ɛad. Mammec nneɣni, zeɛma tumnem amenni waha. ◘15:2 Rum. 1:16; 1 Kur. 1:21. 3 Minzi zeg umezwar sseɛduɣ awem-dd min tuɣa ṭṭfeɣ s yixef inu, aqa Lmasiḥ immut x ddnub nneɣ ɛlaḥsab min yuran, ◘15:3 Ica. 53:7; Dan. 9:24, 26; 1 Kur. 5:7; 1 Bṭ. 2:24. 4 aqa ittwanḍeř uca ittwassnekkar-dd deg wass wiss třata ɛlaḥsab min yuran. ◘15:4 Izhd. 16:10; Ica. 53:8, 9; Yun. 2:1; Mt. 12:40. 5 Netta iḍhar-dd ɣar Kifa, xenni ɣar tenɛac n imeḥḍaren. ◘15:5 Lk. 24:34; Yḥ. 20:19; Řex. 10:41. 6 Awarni as iban-dd i tiwwa n xemsa-mya n wawmaten deg umur d ijjen, aṭṭas zzaysen ddaren ɛad ař i řexxu, maca inneɣni aqa ṭṭṣen iḍeṣ n řmewt. 7 Awarni as iḍhar-dd i Yaɛqub, xenni i marra rrusul.

8 Am ɣar uneggar n marra, iḍhar ayi-dd ɛawed am i yijj n umexřuq dd-izwaren i řweqt nnes. ◘15:8 Řex. 9:3, 17; 23:11; 1 Kur. 9:1; 2 Kur. 12:2. 9 Minzi necc ǧiɣ d amaẓuẓ qaɛ zi rrusul, war sdihijeɣ ad ayi řaɣan rrasul, minzi necc tuɣa darrceɣ x tmesmunt n AREBBI. ◘15:9 Afa. 3:8; Řex. 8:3; 9:1; 22:4; 26:9; Gal. 1:13; 1 Tim. 1:13. 10 Maca s arḍa n AREBBI i ǧiɣ min ǧiɣ uca arḍa nnes i dayi iǧan war iǧi baṭeř, minzi xedmeɣ mahu qaɛ xasen marra, maca war iǧi d necc, maca arḍa n AREBBI nni iǧan akidi. ◘15:10 2 Kur. 11:23; 12:11. 11 Xenni ma d necc niɣ d nitni, ammu i nettbarreḥ, ammu i tumnem.

12 Maca mařa ittwabarreḥ s Lmasiḥ wenni dd-ittwassnekkaren zi taddart n imettinen, mammec xenni zemmaren ca jar awem ad inin belli war din bu Tudart i imettinen? 13 Minzi mařa war din bu Tudart i imettinen, uřa d Lmasiḥ war dd-ittwassnekkar ca, 14 uca mařa Lmasiḥ war dd-ittwassnekkar, xenni baṭeř i teǧa tbarreḥt nneɣ, baṭeř i yeǧa xenni l’iman nwem. 15 Xenni neccin nban ɛawed d řechud issxarriqen n AREBBI, minzi neched x AREBBI belli aqa issnekkar-dd Lmasiḥ, waxxa Netta war i-t-i-dd-issnekkar ca. 16 Minzi mařa imettinen war dd-ttᵉtwasnekkaren ca, aqa Lmasiḥ war dd-ittwassnekkar ɛawed. 17 U mařa Lmasiḥ war dd-ittwassnekkar ca, aqa l’iman nwem ixwa, u aqa kenniw ɛad di ddnub nwem, 18 uca ttwahellken uřa d inni ittᵉṭṭṣen di Lmasiḥ awarni řami mmuten. 19 Mařa tuɣa nessitim di Lmasiḥ di tudart-a waha, aqa aneɣ qaɛ d imcumen n marra iwdan.

20 Maca řexxu umi dd-ittwassnekkar Lmasiḥ zi taddart n imettinen, aqa idweř Netta d Amenzu n yinni iṭṭṣen deg wenḍeř. ◘15:20 Kul. 1:18; 1 Bṭ. 1:3; Asa. 1:5. 21 U am mammec dd-tusa řmewt zeg ijj n bnadem, ammu uřa d tanukra n imettinen teǧa zeg ijj n Bnadem. ◘15:21 Amz. 2:17; 3:6; Rum. 5:12, 18; 6:23. 22 Minzi am iwdan marra ad mmten di Adam, ammu ɛawed i ɣa ddaren marra nitni ɛawed di Lmasiḥ. 23 Maca kuř ijj di nnubet nnes: Lmasiḥ tuɣa d Amenzu, xenni awarni as inni iǧan n Lmasiḥ ɣar twasit nnes. 24 Awarni man aya d aneggaru, xmi ɣa iwc tageldit i AREBBI, Babatneɣ, xmi ɣa issebḍeř marra řeḥkamet d marra ṣṣulṭa d marra jjehd.

25 Maɣar Netta ad iḥkem am Ujeǧid ař d ɣa yegg marra řɛedyan nnes sadu iḍaren nnes. ◘15:25 Izhd. 110:1; Řex. 2:34; Afa. 1:20; Kul. 3:1; Ɛbr. 1:13; 10:12. 26 Řeɛdu aneggaru wenni i ɣa ittwabeḍřen, aqa-tt d řmewt. 27 Minzi aqa igga marra sadu iḍaren nnes. Maca xmi ittwanna: “Aqa marra timesřayn ttwaggent sadu Netta!”, aqa iban mliḥ belli wenni d as iggin marra sadu Netta, aqa Netta simant nnes war iǧi sadu Netta. ◘15:27 Izhd. 8:7; Mt. 11:27; 28:18; Afa. 1:22; Ɛbr. 2:8. 28 Uca řami d as ittwagg marra sadu i Netta, řexdenni Mmis n AREBBI ɛawed ad ittwagg sadu i Wenni umi d as iggin marra sadu i Netta, ḥima ad yiři AREBBI d marra di min di mma.

29 Niɣ, min ɣa ggen inni ittwassɣeḍṣen di ṭṭweɛ n imettinen mařa war dd-tᵉttwassnekkaren imettinen ɛemmarṣ? Maɣar mayemmi ɣa ttwassɣeḍṣen ɛad di ṭṭweɛ n imettinen? 30 U mayemmi neccin ɛad di lxaṭar di kuř tsaɛɛet? 31 A aytma, ttjaǧiɣ ɣar usemɣar nwem i iǧan ɣari di Siditneɣ Yasuɛ Lmasiḥ, aqa ttmettiɣ kuř ass. 32 U mammec, mařa ttwamenḍareɣ zzat i řewḥuc di Afasus x řeḥsab bnadem, man řefḍeř i ɣari, mařa imettinen war dd-ttwassnekkaren ca? Ejj aneɣ ad necc ad nsu, minzi tiwecca ad nemmet. ◘15:32 Ica. 22:13; 56:12. 33 War ttɣeccim yixef nwem: řhard war iḥřin tjeyyaḥ nneyyet taṣebḥant. 34 Sfaqem uřawen nwem ɣar tsegda, war xeṭṭim ca. Minzi ca zzaywem war ɣarsen teǧi tussna n AREBBI. I řeḥya nwem qqareɣ tt.

35 Ad inin ca zzaywem: “Mammec i dd ɣa ttwassnekkaren imettinen? S man arrimet i dd ɣa yasen?” ◘15:35 Ḥiz. 37:3. 36 A afɣuř, min tzarrɛed cek, war iddar mařa war immut qbeř. ◘15:36 Yḥ. 12:24. 37 Min tzarrɛed, war teǧi ca d arrimet nni i ɣa tiři, maca tzarrɛed taɛeqqact iɣeryen n yirden niɣ n imendi niɣ n ca n zzariɛet nneɣni. 38 Maca AREBBI iwca as arrimet am mammec ixs Netta, i kuř ddab n zzariɛet iwca as arrimet ɛlaḥsab ṭṭbiɛet n kuř icten zzaysent.

39 War iǧi marra arrimet d arrimet d ijj, maca tenni n iwdan immsebḍa x tenni n řmař, u tenni n ijḍaḍ wenneɣni n tenni n iseřman.

40 Aqa din arrimat n ujenna d arrimat n temmurt, maca aɛuǧi n yinni n ujenna wenneɣni n yinni n temmurt. 41 Ijjen d aɛuǧi n tfuct, wenneɣni d aɛuǧi n uyur, u wenneɣni d aɛuǧi n itřan, uca aɛuǧi n ijj n itři iɛeddun x uɛuǧi n ijj n itři nneɣni.

42 Ammu xenni i ɣa tiři Tudart i yinni mmuten. Aqa ttwazarrɛen nitni di min iɣeccen uca ttwassnekkaren-dd břa řɣecc. ◘15:42 Dan. 12:3; Mt. 13:43. 43 Aqa ttwazarrɛen nitni di min war icniɛen uca ad dd-ttwassnekkaren deg uɛuǧi. Nitni ttwazarrɛen deg weḍɛaf uca ad dd-ttwassnekkaren di jjehd. 44 Aqa ttwazarrɛen nitni s ict n arrimet n ṭṭbiɛet uca xenni ad dd-ittwassnekkar bnadem s ict n arrimet tarruḥanit. Aqa din arrimet n ṭṭbiɛet, ammu aqa din uřa d arrimet n Arruḥ.

45 Ammu i tura ɛawed: “Aryaz amezwaru Adam, idweř d řeɛmar iddaren!”, Adam aneggaru idweř d Arruḥ i itticen Tudart. ◘15:45 Amz. 2:7. 46 Maca min iǧan zi Arruḥ war dd-yusi ca d amezwaru, maca min iǧan n ṭṭbiɛet, xenni awarni man aya min iǧan zi Arruḥ. 47 Bnadem amezwaru ikka-dd zeg ucař n temmurt, Bnadem wiss tnayen d SIDI i dd-ikkin zeg ujenna. 48 Am mammec iǧa wenni zeg ucař, ammu i ǧan uřa d nitni zeg ucař, uca am mammec iǧa Wenni n ujenna, ammu i ǧan uřa d inni n ujenna. 49 Uca am mammec narbu ṣṣifet n wenni ittwaggen zeg ucař, ammu xenni ad narbu ṣṣifet n Wenni iǧan zeg ujenna. ◘15:49 2 Kur. 4:11.

50 A aytma inu, ddegga xseɣ ad iniɣ: Aqa aysum d idammen war zemmaren ad warten Tageldit n ijenwan, uca min ifennan war iwarret min war ifennin. ◘15:50 Yḥ. 1:13. 51 Xzarem, ad kenniw ssaregbeɣ x ijj n ssirr: aqa aneɣ war nettᵉṭṭeṣ ca marra s yiḍeṣ n řmewt, maca neccin marra ad nettwabeddeř, ◘15:51 1 Ts. 4:16. 52 deɣya, deg wermac n wabřiwen, ɣar řḥess n usuḍi aneggaru deg uyicc n icarri: imettinen ad dd-ttwassnekkaren ɣar min war ifennin uca neccin ad nettwabeddeř. ◘15:52 Mt. 24:31; 1 Ts. 4:16. 53 Minzi min ifennan ittxeṣṣa as ad yarḍ min war ifennin u min ɣa immuten ittxeṣṣa as ad yarḍ min war ittmettin.

54 Uca xmi min ifennan ad yarḍ min war ifennin u min ɣa immuten ad yarḍ min war ittmettin, řexdenni ad ikemmeř wawař i ittwarin:

“Řmewt aqa tᵉttwaṣarḍ deg řeɣřeb.” ◘15:54 Ica. 25:8.

55 “A řmewt, mani iǧa usennan nnem?

A řaxart, mani iǧa řeɣřeb nnem?” ◘15:55 Ḥuc. 13:14; Ɛbr. 2:14.

56 Aqa asennan n řmewt d ddenb, uca jjehd n ddenb aqa-tt d Ccariɛa. 57 Maca aqadi i AREBBI, wenni d aneɣ iwcin řeɣřeb s Siditneɣ Yasuɛ Lmasiḥ. ◘15:57 1 Yḥ. 5:5.

58 S uya, a aytma iɛizzen, beddem nican u břa anhezzi, arnim řebda di řxedmet n SIDI s ufeyyeḍ, am tessnem belli řxedmet nwem war teǧi baṭeř di SIDI.